കുടിയേറ്റ നയങ്ങളിൽ കാനഡ നിയന്ത്രണങ്ങൾ കടുപ്പിക്കുന്നു എന്ന ആശങ്കകൾക്കിടയിലും വൻ പ്രതീക്ഷ നൽകുന്ന കണക്കുകൾ പുറത്ത്. 2026 ഫെബ്രുവരി മാസത്തിൽ മാത്രം 25,722 പേർക്കാണ് കാനഡ സ്ഥിരതാമസത്തിന് (Permanent Residence) ക്ഷണം നൽകിയത്. ഫെഡറൽ ഗവൺമെന്റിന്റെ എക്സ്പ്രസ് എൻട്രി വഴിയും വിവിധ പ്രൊവിൻഷ്യൽ നോമിനി പ്രോഗ്രാമുകൾ വഴിയുമാണ് ഇത്രയധികം പേർക്ക് അവസരം ലഭിച്ചത്.
ആർക്കെല്ലാമാണ് കൂടുതൽ അവസരം?
കാനഡയുടെ പുതിയ കുടിയേറ്റ പാറ്റേൺ പരിശോധിച്ചാൽ ചില പ്രത്യേക വിഭാഗങ്ങളിൽ ഉള്ളവർക്ക് വളരെ വേഗത്തിൽ പിആർ ലഭിക്കുന്നതായി കാണാം. ഇത്തവണത്തെ ഏറ്റവും വലിയ നറുക്കെടുപ്പ് ഫ്രഞ്ച് ഭാഷാ പ്രാവീണ്യമുള്ളവർക്ക് വേണ്ടിയായിരുന്നു. 8,500 പേർക്കാണ് ഈ വിഭാഗത്തിൽ അവസരം ലഭിച്ചത്. വെറും 400 സിആർഎസ് (CRS) സ്കോർ ഉള്ളവർക്ക് പോലും ഇതിലൂടെ കുടിയേറാൻ സാധിച്ചു. ഡോക്ടർമാർക്കും മറ്റ് ആരോഗ്യ പ്രവർത്തകർക്കും കാനഡ വൻ പരിഗണനയാണ് നൽകുന്നത്. പ്രത്യേകിച്ച് കാനഡയിൽ പ്രവൃത്തിപരിചയമുള്ള ഡോക്ടർമാർക്ക് ചരിത്രത്തിലെ ഏറ്റവും കുറഞ്ഞ സ്കോറായ 169-ൽ വരെ ക്ഷണം ലഭിച്ചു എന്നത് ശ്രദ്ധേയമാണ്. നിലവിൽ കാനഡയിൽ ജോലി ചെയ്യുന്ന 6,000 പേർക്ക് ഫെബ്രുവരിയിൽ പിആർ ക്ഷണം ലഭിച്ചു. ഇലക്ട്രീഷ്യൻമാർ, പ്ലംബർമാർ, വെൽഡർമാർ തുടങ്ങിയ വിദഗ്ധ തൊഴിലാളികൾക്ക് ഒന്റാറിയോ പോലുള്ള പ്രവിശ്യകൾ വലിയ തോതിൽ മുൻഗണന നൽകുന്നുണ്ട്.
പ്രധാന പ്രവിശ്യകളിലെ കണക്കുകൾ:
വിവിധ പ്രവിശ്യകൾ വഴി ലഭിച്ച ക്ഷണങ്ങളുടെ വിവരങ്ങൾ ഇതാ:
ഒന്റാറിയോ (OINP): 3,229 ക്ഷണങ്ങൾ
അൽബെർട്ട (AAIP): 1,376 ക്ഷണങ്ങൾ
ബ്രിട്ടീഷ് കൊളംബിയ (BC PNP): 889 ക്ഷണങ്ങൾ
ന്യൂ ബ്രൺസ്വിക് & പിഇഐ: 635 ക്ഷണങ്ങൾ
മൊത്തം ക്ഷണങ്ങളിൽ 76 ശതമാനവും എക്സ്പ്രസ് എൻട്രി വഴിയാണ് നടന്നത്. കാനഡയിലേക്കുള്ള കുടിയേറ്റം ലക്ഷ്യമിടുന്നവർ തങ്ങളുടെ സ്കോർ ഉയർത്താൻ ഫ്രഞ്ച് ഭാഷാ പഠനത്തിനോ അല്ലെങ്കിൽ പ്രൊവിൻഷ്യൽ നോമിനേഷൻ വഴിയുള്ള അപേക്ഷകൾക്കോ മുൻഗണന നൽകുന്നത് ഗുണകരമാകുമെന്ന് വിദഗ്ധർ ചൂണ്ടിക്കാട്ടുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada Sent 25,722 PR Invitations In February 2026
