മോങ്ക്ടൺ : കാനഡയിലെ വീട്ടുപടിക്കലുള്ള തപാൽ വിതരണ സേവനം ഘട്ടംഘട്ടമായി നിർത്തലാക്കി കമ്മ്യൂണിറ്റി മെയിൽ ബോക്സ് സംവിധാനത്തിലേക്ക് മാറാനുള്ള കാനഡ പോസ്റ്റിന്റെ തീരുമാനത്തിനെതിരെ പ്രതിഷേധം ശക്തമാകുന്നു. ഏകദേശം 40 ലക്ഷം വിലാസങ്ങളിലെ തപാൽ വിതരണ രീതിയിൽ മാറ്റം വരുത്തുന്ന അഞ്ചുവർഷത്തെ പദ്ധതിയുടെ ഭാഗമായി ആദ്യഘട്ടത്തിൽ രാജ്യത്തെ 13 കമ്മ്യൂണിറ്റികളിലാണ് ഈ പരിഷ്കാരം നടപ്പിലാക്കുന്നത്. അറ്റ്ലാന്റിക് കാനഡയിൽ മോൺക്റ്റണിലെ മാർക്ക് അവന്യൂ ഡിസ്ട്രിബ്യൂഷൻ സെന്ററിലായിരിക്കും പുനഃസംഘടന ആദ്യം ബാധിക്കുകയെന്ന് കനേഡിയൻ യൂണിയൻ ഓഫ് പോസ്റ്റൽ വർക്കേഴ്സ് (CUPW) മോങ്ക്ടൺ ലോക്കൽ പ്രസിഡന്റ് ലൈൻ ഡൗസെറ്റ് അറിയിച്ചു.
ഈ തീരുമാനത്തിലൂടെ മോങ്ക്ടണിലെ ഡിപ്പോയിൽ 25 മുതൽ 35 ശതമാനം വരെ തൊഴിൽ നഷ്ടമുണ്ടാകുമെന്ന് യൂണിയൻ ആശങ്ക പ്രകടിപ്പിച്ചു. ഏകദേശം 80 പേർ ജോലി ചെയ്യുന്ന ഇവിടെ 500-ഓളം യൂണിയൻ അംഗങ്ങൾ തൊഴിൽ സുരക്ഷിതത്വത്തെക്കുറിച്ച് ആശങ്കാകുലരാണെന്ന് ഡൗസെറ്റ് വ്യക്തമാക്കി. പൊതുജനങ്ങളുമായി കൂടിയാലോചന നടത്താതെ സേവനങ്ങൾ വെട്ടിക്കുറയ്ക്കുന്നത് ശരിയല്ലെന്നും വീട്ടുപടിക്കലുള്ള തപാൽ വിതരണത്തിനായി ശക്തമായ പോരാട്ടം തുടരുമെന്നും യൂണിയൻ അറിയിച്ചു. പദ്ധതിയുടെ ഭാഗമായി ചില തപാൽ ഓഫീസുകളും നിർത്തലാക്കാൻ നിർദ്ദേശമുണ്ട്.
തീരുമാനത്തോടുള്ള പൊതുജന പ്രതികരണം സമ്മിശ്രമാണ്. ദൂരസ്ഥലങ്ങളിലെ മെയിൽ ബോക്സുകളിൽ പോയി കത്തുകൾ ശേഖരിക്കുന്നത് പ്രായമായവർക്ക് ബുദ്ധിമുട്ടാകുമെന്ന് ഒരു വിഭാഗം ചൂണ്ടിക്കാട്ടുമ്പോൾ, കാനഡ പോസ്റ്റിന്റെ സാമ്പത്തിക പ്രതിസന്ധി പരിഹരിക്കാൻ ഇത്തരം നടപടികൾ ആവശ്യമാണെന്ന് മറ്റുള്ളവർ വിലയിരുത്തുന്നു. കമ്മ്യൂണിറ്റി മെയിൽ ബോക്സ് സംവിധാനത്തോട് തങ്ങൾക്ക് എതിർപ്പില്ലെന്ന് ചില താമസക്കാർ പ്രതികരിച്ചപ്പോൾ, നികുതി നൽകുന്ന തങ്ങൾക്ക് ലഭിക്കുന്ന സേവനം നിർത്തലാക്കുന്നത് അംഗീകരിക്കാനാവില്ലെന്ന് മറ്റുചിലർ വ്യക്തമാക്കി. സാധ്യമായ തൊഴിൽ നഷ്ടങ്ങളെക്കുറിച്ച് കാനഡ പോസ്റ്റിൽ നിന്ന് വിശദീകരണം തേടിയെങ്കിലും പ്രതികരണം ലഭ്യമായിട്ടില്ല.
Canada Post to stop door-to-door mail delivery; Labor union protests
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
