ടൊറന്റോ: ലോകത്തിന്റെ വിവിധ ഭാഗങ്ങളിൽ മാധ്യമസ്വാതന്ത്ര്യം കടുത്ത വെല്ലുവിളി നേരിടുന്ന സാഹചര്യത്തിൽ, ജീവൻ രക്ഷിക്കാൻ ജന്മനാട് വിടേണ്ടി വന്ന മാധ്യമപ്രവർത്തകരുടെ പ്രധാന അഭയകേന്ദ്രമായി കാനഡ മാറുന്നു. സ്വന്തം രാജ്യങ്ങളിലെ ഭരണാധികാരികളുടെയും ക്രിമിനൽ സംഘങ്ങളുടെയും ഭീഷണിയെ തുടർന്ന് നാടുവിട്ട നിരവധി പ്രമുഖ ജേർണലിസ്റ്റുകളാണ് ഇപ്പോൾ ടൊറന്റോയും പരിസര പ്രദേശങ്ങളും കേന്ദ്രീകരിച്ച് തങ്ങളുടെ വാർത്താപ്രവർത്തനം തുടരുന്നത്. അമേരിക്കയെ അപേക്ഷിച്ച് കാനഡയിലെ പല സംസ്കാരങ്ങൾ ഒത്തുചേരുന്ന അന്തരീക്ഷവും ഉയർന്ന മാധ്യമസ്വാതന്ത്ര്യവുമാണ് ഇവരെ ഇങ്ങോട്ട് ആകർഷിക്കുന്നത്. അന്താരാഷ്ട്ര മാധ്യമസ്വാതന്ത്ര്യ സൂചികയിൽ കാനഡ 20-ാം സ്ഥാനത്തുള്ളപ്പോൾ അമേരിക്ക 64-ാം സ്ഥാനത്താണ്. കഴിഞ്ഞ വർഷം മാത്രം ലോകമെമ്പാടും 130 മാധ്യമപ്രവർത്തകർ കൊല്ലപ്പെട്ട പശ്ചാത്തലത്തിലാണ് ഈ കുടിയേറ്റം.
ഇക്വഡോറിലെ രാഷ്ട്രീയക്കാരും മയക്കുമരുന്ന് മാഫിയയും തമ്മിലുള്ള ബന്ധം പുറത്തുവിട്ട പ്രമുഖ മാധ്യമപ്രവർത്തകരായ ആൻഡേഴ്സൺ ബോസ്കനും ഭാര്യ മോണിക്ക വെലാസ്ക്വസും 2024 സെപ്റ്റംബർ മുതൽ കാനഡയിലെ ഓക്വില്ലിലാണ് താമസം. മുൻ ഇക്വഡോർ പ്രസിഡന്റിനെതിരെയുള്ള അഴിമതി അന്വേഷണങ്ങൾക്ക് വഴിവെച്ചത് ഇവരുടെ റിപ്പോർട്ടുകളായിരുന്നു. തുടർച്ചയായ വധഭീഷണികളെ തുടർന്നാണ് അഞ്ചംഗ കുടുംബവുമായി ഇവർക്ക് രാജ്യം വിടേണ്ടി വന്നത്. നാട്ടിൽ നിന്ന് മാറിനിന്നുകൊണ്ട് സംഘടിത കുറ്റകൃത്യങ്ങൾ റിപ്പോർട്ട് ചെയ്യുക അസാധ്യമാണെന്ന് കരുതിയിരുന്നെങ്കിലും, കാനഡയിലെ സുരക്ഷിത സാഹചര്യത്തിൽ ഇരുന്ന് തങ്ങൾക്ക് കൂടുതൽ സ്വതന്ത്രമായി ജോലി ചെയ്യാൻ സാധിക്കുന്നുണ്ടെന്ന് ബോസ്കൻ വ്യക്തമാക്കുന്നു.
വെസ്റ്റ് ബാങ്കിലെ കടുത്ത പീഡനങ്ങളും അറസ്റ്റ് ഭീഷണികളും കാരണം നാടുവിടേണ്ടി വന്ന പലസ്തീൻ മാധ്യമപ്രവർത്തകൻ വലീദ് ബത്രാവിയും ഇപ്പോൾ ടൊറന്റോയിലാണ്. ഇവിടെയിരുന്ന് അറബിക് ഭാഷയിൽ ലേഖനങ്ങൾ എഴുതുന്ന അദ്ദേഹം, പ്രവാസി മാധ്യമപ്രവർത്തകർക്കായി ഓൺലൈൻ കൂട്ടായ്മയും ഒരുക്കുന്നുണ്ട്. സാഹചര്യങ്ങൾ അനുകൂലമാകുമ്പോൾ ഒരുനാൾ സ്വന്തം നാട്ടിലേക്ക് മടങ്ങുമെന്നാണ് അദ്ദേഹത്തിന്റെ പ്രതീക്ഷ. 2021-ൽ താലിബാൻ അധികാരം പിടിച്ചതോടെ നൂറുകണക്കിന് മാധ്യമങ്ങൾ പൂട്ടിയ അഫ്ഗാനിസ്ഥാനിൽ നിന്നുള്ള സഹ്റ നാദർ എന്ന വനിതാ മാധ്യമപ്രവർത്തകയും കാനഡയിൽ നിന്നാണ് ‘സാൻ ടൈംസ്’ എന്ന ഓൺലൈൻ മാധ്യമം നടത്തുന്നത്. നാട്ടിലുള്ള തങ്ങളുടെ റിപ്പോർട്ടർമാരുടെ സുരക്ഷയ്ക്കായി വ്യാജപ്പേരുകളിലാണ് ഇവർ വാർത്തകൾ തയ്യാറാക്കുന്നത്.
വിദേശത്ത് നിന്ന് ജീവൻ രക്ഷാർത്ഥം എത്തുന്ന മാധ്യമപ്രവർത്തകർക്ക് കാനഡ സർക്കാർ കൂടുതൽ സാമ്പത്തികവും പ്രൊഫഷണലുമായ പിന്തുണ നൽകണമെന്ന് ഫ്രീ സ്പീച്ച് സെന്റർ ഭാരവാഹികൾ ആവശ്യപ്പെടുന്നുണ്ട്. കാനഡയിലും ഓൺലൈൻ വിദ്വേഷവും സർക്കാർ രേഖകൾ ലഭിക്കാനുള്ള തടസ്സങ്ങളും മാധ്യമപ്രവർത്തകർ നേരിടുന്നുണ്ടെന്ന് കനേഡിയൻ അസോസിയേഷൻ ഓഫ് ജേർണലിസ്റ്റ്സ് ചൂണ്ടിക്കാണിക്കുന്നു. എങ്കിലും, സ്വന്തം നാട്ടിലെ അഴിമതിയും മനുഷ്യാവകാശ ലഘനങ്ങളും ലോകത്തെ അറിയിക്കാനുള്ള പോരാട്ടത്തിൽ ഈ പ്രവാസി മാധ്യമപ്രവർത്തകർക്ക് കാനഡ വലിയൊരു തണലാവുകയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Journalists overcome restrictions; Canada now provides shelter for journalists who had to leave the country
