ടൊറന്റോ: ടൊറന്റോയിൽ മുപ്പതുകാരിയായ ഇൻഡോ-കനേഡിയൻ യുവതി കൊല്ലപ്പെട്ട സംഭവത്തിൽ പ്രതിക്കായി കാനഡയിലുടനീളം തിരച്ചിൽ ഊർജ്ജിതം. ടൊറന്റോ സ്വദേശിയായ ഹിമാൻഷി ഖുറാനയാണ് കൊല്ലപ്പെട്ടത്. സംഭവത്തിൽ പ്രതിയെന്ന് സംശയിക്കുന്ന 32-കാരനായ അബ്ദുൾ ഗഫൂറിക്കെതിരെ കനേഡിയൻ പോലീസ് രാജ്യവ്യാപകമായി അറസ്റ്റ് വാറണ്ട് പുറപ്പെടുവിച്ചു.
കഴിഞ്ഞ വെള്ളിയാഴ്ച രാത്രി 10:41 ഓടെ ഒരു യുവതിയെ കാണാനില്ലെന്ന പരാതി ലഭിച്ചതിനെത്തുടർന്നാണ് ടൊറന്റോ പോലീസ് അന്വേഷണം ആരംഭിച്ചത്. ശനിയാഴ്ച രാവിലെ 6:30 ഓടെ ഹിമാൻഷിയെ മരിച്ച നിലയിൽ കണ്ടെത്തുകയായിരുന്നു. ഹിമാൻഷിയുടെ മരണം കൊലപാതകമാണെന്ന് സ്ഥിരീകരിച്ചതോടെ കേസ് homicide വിഭാഗത്തിന് കൈമാറി. ഈ വർഷം ടൊറന്റോയിൽ റിപ്പോർട്ട് ചെയ്യപ്പെടുന്ന 40-ാമത്തെ കൊലപാതകമാണിത്.
കൊല്ലപ്പെട്ട ഹിമാൻഷിയും പ്രതിയായ അബ്ദുൾ ഗഫൂറിയും തമ്മിൽ അടുത്ത പരിചയമുണ്ടായിരുന്നുവെന്ന് പോലീസ് അറിയിച്ചു. ഇരുവരും തമ്മിൽ പ്രണയത്തിലായിരുന്നുവെന്നും ഇരുവർക്കുമിടയിലെ പ്രശ്നങ്ങളാണ് കൊലപാതകത്തിൽ കലാശിച്ചതെന്നുമാണ് പ്രാഥമിക നിഗമനം. പ്രതിക്കെതിരെ ഫസ്റ്റ് ഡിഗ്രി മർഡർ (ആസൂത്രിതമായ കൊലപാതകം) കുറ്റമാണ് ചുമത്തിയിരിക്കുന്നത്. കുറ്റം തെളിയിക്കപ്പെട്ടാൽ പരോൾ ഇല്ലാത്ത ജീവപര്യന്തം ശിക്ഷ വരെ പ്രതിക്ക് ലഭിക്കാം.
ഹിമാൻഷി ഖുറാന സോഷ്യൽ മീഡിയയിൽ സജീവമായ ഒരു ഡിജിറ്റൽ ക്രിയേറ്ററായിരുന്നു. പ്രതിയുടെ ചിത്രം പുറത്തുവിട്ടിട്ടുണ്ടെന്നും ഇയാളെക്കുറിച്ച് എന്തെങ്കിലും വിവരം ലഭിക്കുന്നവർ ഉടൻ പോലീസിനെ അറിയിക്കണമെന്നും അധികൃതർ പൊതുജനങ്ങളോട് അഭ്യർത്ഥിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada issues warrant for suspect alleged to have killed Indo-Canadian woman
