ടൊറന്റോ: അമേരിക്കൻ വിപണികളോടുള്ള അമിത ആശ്രിതത്വം കുറയ്ക്കുന്നതിനും വ്യാപാരം വൈവിധ്യവത്കരിക്കുന്നതിനുമുള്ള തന്ത്രങ്ങളുടെ ഭാഗമായി ഇന്ത്യയെ പ്രധാന പങ്കാളിയാക്കാൻ കാനഡ. തങ്ങളുടെ ഇൻഡോ-പസഫിക് തന്ത്രത്തിന്റെ അവിഭാജ്യ ഘടകമാണ് ഇന്ത്യയുമായുള്ള സാമ്പത്തിക ബന്ധം ശക്തിപ്പെടുത്തുന്നതെന്ന് കനേഡിയൻ വിദേശകാര്യ മന്ത്രാലയം (Global Affairs Canada – GAC) അറിയിച്ചു.
കനേഡിയൻ അന്താരാഷ്ട്ര വ്യാപാര മന്ത്രി മനിന്ദർ സിദ്ദുവിന്റെ അടുത്തിടെ നടന്ന ഇന്ത്യാ സന്ദർശനത്തിന് പിന്നാലെയാണ് GAC ഈ പ്രസ്താവന പുറത്തിറക്കിയത്. വ്യാപാരം, നിക്ഷേപം, കണക്റ്റിവിറ്റി, നവീകരണം എന്നിവയിൽ ഇന്ത്യയുമായുള്ള ബന്ധം ശക്തിപ്പെടുത്തുന്നതിലുള്ള കാനഡയുടെ പ്രതിബദ്ധത ഈ സന്ദർശനം ഊട്ടിയുറപ്പിച്ചതായി മന്ത്രി സിദ്ദു പറഞ്ഞു.
ഇന്ത്യയുടെ ഊർജ്ജ മാറ്റത്തിനും വ്യാവസായിക വളർച്ചയ്ക്കും നിർണായകമായ ദ്രവീകൃത പ്രകൃതി വാതകം (LNG), കാർബൺ ക്യാപ്ചർ, നിർണായക ധാതുക്കൾ എന്നിവയിൽ കാനഡ വിശ്വസ്ത പങ്കാളിയാകുമെന്ന് മന്ത്രി സിദ്ദു ഉറപ്പുനൽകി. ഇരു രാജ്യങ്ങളും ചേർന്ന് പുനരുജ്ജീവിപ്പിച്ച മന്ത്രിതല വ്യാപാര, നിക്ഷേപ ചർച്ചാ സമിതിക്ക് (Ministerial Dialogue on Trade and Investment) വാണിജ്യ വ്യവസായ മന്ത്രി പിയൂഷ് ഗോയലും മനിന്ദർ സിദ്ദുവും സഹ-ചെയർമാൻമാരായി തുടരും.
ലോകത്തിലെ അതിവേഗം വളരുന്ന സമ്പദ്വ്യവസ്ഥകളിൽ ഒന്നാണ് ഇന്ത്യ. അതുകൊണ്ട് തന്നെ കനേഡിയൻ ബിസിനസ്സുകൾക്ക് ഈ അവസരം നഷ്ടപ്പെടുത്താൻ കഴിയില്ലെന്ന് കനേഡിയൻ ഹിന്ദു ചേംബർ ഓഫ് കൊമേഴ്സ് (CHCC) പ്രസിഡന്റ് കുശാഗ്ര ശർമ്മ അഭിപ്രായപ്പെട്ടു. ഉഭയകക്ഷി ബന്ധം മെച്ചപ്പെടുത്തുന്നതിന്റെ ഭാഗമായി വിവിധ കനേഡിയൻ വ്യാപാര സംഘങ്ങൾ അടുത്ത വർഷം ഇന്ത്യ സന്ദർശിക്കുമെന്നും അറിയിച്ചിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada identifies India as a key partner in its strategy to diversify trade
