സ്വപ്നതുല്യമായ ശമ്പളവും സുരക്ഷിതമായ കരിയറും; കാനഡ ബോർഡർ സർവീസസിലേക്ക് ഇപ്പോൾ അപേക്ഷിക്കാം, അപേക്ഷിക്കേണ്ട രീതിയും വിവരങ്ങളും

ഒട്ടാവ: കാനഡ ബോർഡർ സർവീസസ് ഏജൻസിയിലേക്ക് (CBSA) ആയിരം പുതിയ ബോർഡർ സർവീസ് ഓഫീസർമാരെ നിയമിക്കുന്നു. രാജ്യത്തെ അതിർത്തി സുരക്ഷ ശക്തമാക്കുന്നതിന്റെയും അനധികൃത ഇടപാടുകൾ തടയുന്നതിന്റെയും ഭാഗമായാണ് വലിയ തോതിലുള്ള ഈ റിക്രൂട്ട്‌മെന്റ് നടപടി. തിരഞ്ഞെടുക്കപ്പെടുന്നവർക്ക് 80,344 ഡോളർ മുതൽ 89,462 ഡോളർ വരെയാണ് തുടക്കത്തിൽ ലഭിക്കുന്ന വാർഷിക ശമ്പളം. ഒരു വർഷത്തെ സേവനത്തിന് ശേഷം ഇത് 1,01,058 ഡോളർ വരെയായി വർദ്ധിക്കും.

രാജ്യത്തേക്കുള്ള മയക്കുമരുന്ന് കടത്ത്, അനധികൃത ആയുധക്കടത്ത്, മോഷ്ടിച്ച വസ്തുക്കളുടെ നീക്കം എന്നിവ തടയുന്നതിനാണ് പുതിയ ഉദ്യോഗസ്ഥരെ നിയമിക്കുന്നതെന്ന് പ്രധാനമന്ത്രി മാർക്ക് കാർണി അറിയിച്ചു. യാത്രക്കാരുടെ പരിശോധന, ചരക്ക് നീക്കം നിരീക്ഷിക്കൽ, വ്യാപാര നിയമങ്ങൾ നടപ്പിലാക്കൽ തുടങ്ങിയ സുപ്രധാന ചുമതലകളാണ് ഈ ഓഫീസർമാർക്ക് നിർവഹിക്കാനുള്ളത്. രാജ്യത്തിന്റെ സുരക്ഷാ ക്രമീകരണങ്ങളിൽ വലിയ മാറ്റം കൊണ്ടുവരാൻ ഈ നിയമനം സഹായിക്കുമെന്ന് അധികൃതർ കരുതുന്നു.

സെക്കൻഡറി സ്കൂൾ ഡിപ്ലോമയോ അതിനു മുകളിലുള്ള വിദ്യാഭ്യാസ യോഗ്യതയോ ഉള്ളവർക്ക് തസ്തികയിലേക്ക് അപേക്ഷിക്കാം. അപേക്ഷകർക്ക് സാധുവായ ഡ്രൈവിംഗ് ലൈസൻസ്, പ്രഥമശുശ്രൂഷാ സർട്ടിഫിക്കറ്റ് (Standard First Aid Certificate), കനേഡിയൻ ഫയർആംസ് സേഫ്റ്റി കോഴ്സ് എന്നിവ പൂർത്തിയാക്കിയ സർട്ടിഫിക്കറ്റുകൾ ഉണ്ടായിരിക്കണം. ഇംഗ്ലീഷ്, ഫ്രഞ്ച് ഭാഷകളിൽ വൈദഗ്ധ്യമുള്ളവർക്ക് നിയമനത്തിൽ പ്രത്യേക മുൻഗണനയും വാർഷിക ബോണസും ലഭിക്കുന്നതാണ്.

തിരഞ്ഞെടുക്കപ്പെടുന്ന ഉദ്യോഗസ്ഥർക്ക് കൃത്യമായ പരിശീലന പരിപാടികൾ ഏജൻസി നിശ്ചയിച്ചിട്ടുണ്ട്. നാലാഴ്ചത്തെ ഓൺലൈൻ പരിശീലനത്തിന് ശേഷം, ക്യൂബെക്കിലെ റിഗോഡിലുള്ള കാനഡ ബോർഡർ സർവീസസ് കോളേജിൽ 14 ആഴ്ചത്തെ നേരിട്ടുള്ള പരിശീലനം നൽകും. കാനഡയിലെ ഏത് ഭാഗത്തും ജോലി ചെയ്യാൻ സന്നദ്ധരായിരിക്കണം. ഉൾപ്രദേശങ്ങളിൽ ജോലി ചെയ്യാൻ തയ്യാറുള്ള ഉദ്യോഗാർത്ഥികളെ മുൻഗണനാ ക്രമത്തിൽ പരിഗണിക്കുമെന്നും ഏജൻസി വ്യക്തമാക്കി.

ഭിന്നലിംഗക്കാർ (2SLGBTQI+) ഉൾപ്പെടെയുള്ള എല്ലാ വിഭാഗത്തിൽപ്പെട്ടവർക്കും അപേക്ഷിക്കാനുള്ള അവസരമുണ്ട്. കനത്ത സുരക്ഷാ പരിശോധനകൾക്കും ശാരീരികക്ഷമതാ പരിശോധനകൾക്കും ശേഷമായിരിക്കും അന്തിമ നിയമനം. താല്പര്യമുള്ള ഉദ്യോഗാർത്ഥികൾക്ക് emploisfp-psjobs.cfp-psc.gc.ca എന്ന വെബ്സൈറ്റ് വഴി ഓൺലൈനായി അപേക്ഷിക്കാം. ഫെബ്രുവരി 27 ആണ് അപേക്ഷ സ്വീകരിക്കുന്ന അവസാന തീയതി.

canada-hiring-border-services-officers/

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt