ഒട്ടാവ: കാനഡയിൽ ഭക്ഷ്യവസ്തുക്കളുടെ വില 2026-ൽ നാല് മുതൽ ആറ് ശതമാനം വരെ ഉയരാൻ സാധ്യതയുണ്ടെന്ന് ഡൽഹൗസി സർവകലാശാലയുടെ ‘കാനഡാസ് ഫുഡ് പ്രൈസ് റിപ്പോർട്ട്’ മുന്നറിയിപ്പ് നൽകി. പ്രധാനമായും മാംസ ഉത്പന്നങ്ങളുടെ വിലയിൽ ഉണ്ടാകുന്ന ഗണ്യമായ വർധനവാണ് ഇതിന് കാരണമെന്ന് റിപ്പോർട്ട് വ്യക്തമാക്കുന്നു.
റിപ്പോർട്ട് പ്രകാരം, ബീഫിനാണ് ഏറ്റവും വലിയ വിലവർധനവ് പ്രതീക്ഷിക്കുന്നത്-ഇത് ഏഴ് ശതമാനം വരെ ഉയരാം. കന്നുകാലികളുടെ എണ്ണം കുറയുന്നതും, ഈ മേഖലയിലെ വെല്ലുവിളികളും, കർഷകരുടെ കുറവും കാരണം വിതരണത്തിൽ വരുന്ന ഇടിവാണ് വില വർദ്ധനവിന് പ്രധാന കാരണം.ഈ വിതരണ പ്രതിസന്ധി കുറഞ്ഞത് 2027 വരെ തുടരാനാണ് സാധ്യതയെന്ന് റിപ്പോർട്ട് ചൂണ്ടിക്കാട്ടുന്നു. ഡിമാൻഡ് നിറവേറ്റാൻ കാനഡ ഇറക്കുമതി വർദ്ധിപ്പിക്കുമ്പോഴും ഈ പ്രശ്നം നിലനിൽക്കും. ബീഫ് വിലയിലെ വർധനവ് കാരണം അടുത്ത വർഷവും ഈ മേഖലയ്ക്ക് വെല്ലുവിളിയുണ്ടാകുമെന്നും, ഉപഭോക്താക്കൾ ചിക്കനിലേക്ക് തിരിയുന്നത് കാരണം ചിക്കൻ വിലയും ഉയരാൻ സാധ്യതയുണ്ടെന്നും ഡൽഹൗസി അഗ്രി-ഫുഡ് അനലിറ്റിക്സ് ലാബ് ഡയറക്ടർ സിൽവെയ്ൻ ചാർലെബോയിസ് ചൂണ്ടിക്കാട്ടി.
മാംസത്തിന് പുറമെ, ടിന്നിലടച്ചതും കേടാകാത്തതുമായ മറ്റ് സാധനങ്ങളുടെ വിലയിലും വർധനവ് ഉണ്ടായേക്കാമെന്ന് റിപ്പോർട്ട് മുന്നറിയിപ്പ് നൽകുന്നു. വർഷങ്ങളായി താരതമ്യേന സ്ഥിരതയുണ്ടായിരുന്ന ഈ ഉൽപ്പന്നങ്ങളുടെ വില ഇനി വർധിക്കുമെന്നാണ് സൂചന. പണപ്പെരുപ്പത്തിൽ നിന്ന് ആശ്വാസം തേടുന്ന ഉപഭോക്താക്കൾക്ക് 2026-ലും ആശ്വാസം ലഭിക്കില്ലെന്നും ചാർലെബോയിസ് അഭിപ്രായപ്പെട്ടു. അമേരിക്കയുമായുള്ള വ്യാപാര തർക്കങ്ങൾ, ഭക്ഷ്യോത്പാദനത്തിലെ മാറ്റങ്ങൾ, തൊഴിൽ ചെലവിലെ വർധനവ് എന്നിവയാണ് വില കൂടാൻ കാരണമാകുന്ന മറ്റ് പ്രധാന ഘടകങ്ങൾ.
അതേസമയം, രാജ്യത്തുടനീളം ഭക്ഷ്യ അരക്ഷിതാവസ്ഥ രൂക്ഷമായിക്കൊണ്ടിരിക്കുകയാണ്. കാനഡയിലെ നാലിലൊന്ന് പൗരന്മാരും ഭക്ഷ്യ അരക്ഷിതാവസ്ഥയിലാണെന്നണ് ഫുഡ് ബാങ്ക്സ് കാനഡ റിപ്പോർട്ട് ചെയ്യുന്നത്. ടൊറന്റോയിലെ ഡെയ്ലി ബ്രെഡ് ഫുഡ് ബാങ്ക് മുമ്പ് പ്രതിമാസം 60,000 പേർക്ക് സഹായം നൽകിയിരുന്ന സ്ഥാനത്ത് ഇപ്പോൾ 330,000 പേർക്കാണ് സഹായം നൽകുന്നത്. വിലവർധനവ് കാരണം കൂടുതൽ കനേഡിയൻ പൗരന്മാർ സഹായം തേടാൻ നിർബന്ധിതരാകുന്ന ഈ അവസ്ഥ, രാജ്യത്തിന്റെ വർധിച്ചുവരുന്ന ഭക്ഷ്യ അരക്ഷിതാവസ്ഥയുടെ തീവ്രത വ്യക്തമാക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada Food prices to soar; 4 to 6 percent increase in 2026, Dalhousie report says
