ഒട്ടാവ: കാനഡയിൽ മാർച്ചിൽ തൊഴിൽ മേഖലയിൽ നേരിയ വർധനവ് രേഖപ്പെടുത്തിയെങ്കിലും തൊഴിലില്ലായ്മ നിരക്കിൽ മാറ്റമില്ലാതെ തുടരുന്നതായാണ് പുതിയ റിപ്പോർട്ടുകൾ സൂചിപ്പിക്കുന്നത്. സ്റ്റാറ്റിസ്റ്റിക്സ് കാനഡ പുറത്തുവിട്ട കണക്കുകൾ പ്രകാരം മാർച്ചിൽ രാജ്യത്ത് 14,000 പുതിയ തൊഴിലവസരങ്ങൾ സൃഷ്ടിക്കപ്പെട്ടു. ഫെബ്രുവരിയിൽ ഏകദേശം 84,000 തൊഴിലുകൾ നഷ്ടപ്പെട്ടതിനെത്തുടർന്ന് 6.7 ശതമാനമായി ഉയർന്ന തൊഴിലില്ലായ്മ നിരക്ക് മാർച്ചിലും അതേ നിലയിൽ തന്നെ തുടരുകയാണ്.
നാച്ചുറൽ റിസോഴ്സ് മേഖലയിലാണ് ഇത്തവണ ഏറ്റവും വലിയ മുന്നേറ്റമുണ്ടായത്. ഈ മേഖലയിൽ പുതുതായി ഉണ്ടായ 10,000 തൊഴിലുകളിൽ പകുതിയോളം ആൽബർട്ട പ്രവിശ്യയിൽ നിന്നാണ്. കൂടാതെ പ്രൊഫഷണൽ, സയന്റിഫിക്, ടെക്നിക്കൽ മേഖലകളിലും മെയിന്റനൻസ് ജോലികളിലും വർധനവ് ദൃശ്യമാണ്. അതേസമയം ഫിനാൻസ്, ഇൻഷുറൻസ്, റിയൽ എസ്റ്റേറ്റ് മേഖലകളിൽ കഴിഞ്ഞ മാസം തിരിച്ചടി നേരിട്ടു. ആരോഗ്യ മേഖലയിൽ കാര്യമായ മാറ്റങ്ങളില്ലെങ്കിലും കഴിഞ്ഞ ഒരു വർഷത്തിനിടെ ഈ രംഗത്ത് 94,000 പുതിയ അവസരങ്ങൾ ഉണ്ടായിട്ടുണ്ട്. എന്നാൽ ഇതേ കാലയളവിൽ മാനുഫാക്ചറിംഗ് രംഗത്ത് 44,000 തൊഴിലുകൾ നഷ്ടപ്പെട്ടതായും കണക്കുകൾ വ്യക്തമാക്കുന്നു.
തൊഴിലന്വേഷകർക്ക് ആശ്വാസം പകരുന്ന മറ്റൊരു കാര്യം ശരാശരി മണിക്കൂർ വേതനത്തിൽ ഉണ്ടായ വർധനവാണ്. കഴിഞ്ഞ വർഷം ഇതേ സമയത്തെ അപേക്ഷിച്ച് വേതനത്തിൽ 4.7 ശതമാനം വർധനവുണ്ടായി. ഇത് കഴിഞ്ഞ 18 മാസത്തിനിടയിലെ ഏറ്റവും വേഗത്തിലുള്ള വളർച്ചയാണ്. യുവജനങ്ങൾക്കിടയിലെ തൊഴിലില്ലായ്മ നിരക്ക് 13.8 ശതമാനമായി തുടരുമ്പോൾ, 25 മുതൽ 54 വയസ്സുവരെയുള്ളവരിൽ ഇത് 5.8 ശതമാനമാണ്. വരാനിരിക്കുന്ന വ്യാപാര ചർച്ചകളും വർധിച്ചുവരുന്ന ഇന്ധനവിലയും കനേഡിയൻ സമ്പദ്വ്യവസ്ഥയ്ക്ക് വരും മാസങ്ങളിൽ വെല്ലുവിളിയായേക്കാമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada added 14K jobs in March but unemployment rate unchanged
