ബ്രിട്ടീഷ് കൊളംബിയ: 2026-ൽ പ്രൊവിൻഷ്യൽ നോമിനി പ്രോഗ്രാം (PNP) വഴി അനുവദിക്കുന്ന നോമിനേഷനുകളുടെ എണ്ണം ഔദ്യോഗികമായി പ്രഖ്യാപിച്ച് ബ്രിട്ടീഷ് കൊളംബിയ. 2026-ലേക്കുള്ള നോമിനേഷൻ വിഹിതം പ്രഖ്യാപിക്കുന്ന കാനഡയിലെ ആദ്യ പ്രവിശ്യയാണ് ബി.സി. എന്നാൽ പ്രവിശ്യ ഭരണകൂടം ആവശ്യപ്പെട്ടതിനേക്കാൾ വളരെ കുറഞ്ഞ ക്വാട്ടയാണ് ഫെഡറൽ സർക്കാർ ഇത്തവണ അനുവദിച്ചിരിക്കുന്നത്.
2026-ലേക്ക് ആകെ 5,254 നോമിനേഷൻ ഒഴിവുകളാണ് ഫെഡറൽ സർക്കാർ ബ്രിട്ടീഷ് കൊളംബിയക്ക് അനുവദിച്ചിട്ടുള്ളത്. പ്രവിശ്യയിലെ തൊഴിൽ വിപണിയിലെ കടുത്ത ക്ഷാമം പരിഹരിക്കുന്നതിനായി 9,000 ഒഴിവുകൾ വേണമെന്നായിരുന്നു ബി.സി ആവശ്യപ്പെട്ടിരുന്നത്. അതായത് ആവശ്യപ്പെട്ടതിനേക്കാൾ 41.6% കുറഞ്ഞ വിഹിതം മാത്രമാണ് ഇപ്പോൾ ലഭിച്ചിരിക്കുന്നത്. 2025-ന്റെ തുടക്കത്തിൽ അനുവദിച്ച 4,000 ക്വാട്ടയുമായി താരതമ്യം ചെയ്യുമ്പോൾ ഇത് 31 ശതമാനം കൂടുതലാണെങ്കിലും, 2025 അവസാന പാദത്തിൽ ലഭിച്ച അധിക ക്വാട്ടകൾ കൂടി ചേർത്താൽ കഴിഞ്ഞ വർഷം ആകെ 6,214 നോമിനേഷനുകൾ ലഭ്യമായിരുന്നു. ഇതിനേക്കാൾ കുറഞ്ഞ എണ്ണമാണ് 2026-ലേക്ക് നിലവിൽ നിശ്ചയിച്ചിരിക്കുന്നത്.
ലഭ്യമായ പരിമിതമായ ഈ ക്വാട്ട എങ്ങനെ ഏറ്റവും ഫലപ്രദമായി വിനിയോഗിക്കാം എന്നതിനെക്കുറിച്ചുള്ള ചർച്ചകളിലാണ് പ്രവിശ്യ ഭരണകൂടം. 2025-ൽ ആരോഗ്യ പ്രവർത്തകർക്കും സംരംഭകർക്കുമായിരുന്നു ഇമിഗ്രേഷനിൽ മുൻഗണനയെങ്കിൽ, 2026-ലെ മുൻഗണനാ വിഭാഗങ്ങൾ ഏതൊക്കെയെന്ന് പുതുവർഷത്തിൽ മാത്രമേ പ്രഖ്യാപിക്കൂ. നോമിനേഷൻ വിഹിതം വർദ്ധിപ്പിക്കുന്നതിനായി ഫെഡറൽ ഇമിഗ്രേഷൻ വിഭാഗവുമായി (IRCC) ചർച്ചകൾ തുടരുമെന്ന് ബി.സി അറിയിച്ചു. ഈ ചർച്ചകൾ വിജയിച്ചാൽ കൂടുതൽ നോമിനേഷനുകൾ പ്രവിശ്യയ്ക്ക് ലഭിക്കാൻ സാധ്യതയുണ്ട്.
ഫെഡറൽ സർക്കാരിന്റെ 2026-2028 ഇമിഗ്രേഷൻ പ്ലാൻ പ്രകാരം പി.എൻ.പി വഴി സ്ഥിരതാമസത്തിന് (PR) അനുമതി നൽകുന്നവരുടെ എണ്ണത്തിൽ ആകെ വർദ്ധനവ് വരുത്തിയിട്ടുണ്ട്. അതിനാൽ വരും ആഴ്ചകളിൽ മറ്റ് പ്രവിശ്യകളും തങ്ങളുടെ വിഹിതം പ്രഖ്യാപിക്കുമ്പോൾ സമാനമായ വർദ്ധനവ് ഉണ്ടായേക്കാം എന്നാണ് സൂചന.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Lower Than Expected! British Columbia Announces 2026 Provincial Nomination Quota
