ടൊറോന്റോ: ക്രിസ്മസ് ആഘോഷങ്ങളുടെ പൊലിമയും യൂറോപ്യൻ തെരുവുകളുടെ ഭംഗിയും ആസ്വദിക്കാൻ ഇനി യൂറോപ്പിലേക്ക് വിമാനം കയറേണ്ടതില്ല. ഒന്റാറിയോയിലുള്ള പ്രശസ്തമായ ബ്ലൂ മൗണ്ടൻ വില്ലേജ് സഞ്ചാരികൾക്കായി വിപുലമായ ക്രിസ്മസ് ആഘോഷങ്ങൾക്ക് ഒരുങ്ങുന്നു. കരിങ്കല്ലു പാകിയ തെരുവുകളും മഞ്ഞുമൂടിയ മലനിരകളും അലങ്കരിച്ച കടകളും നിറഞ്ഞ ഈ പ്രദേശം ഒരു ക്രിസ്മസ് കാർഡ് പോലെ മനോഹരമാണെന്നാണ് സഞ്ചാരികളുടെ വിലയിരുത്തൽ.
ബ്ലൂ മൗണ്ടൻ വില്ലേജിന്റെ വാർഷിക ‘ഹോളിഡേ മാജിക്’ ആഘോഷങ്ങൾ 2026 നവംബർ 20 മുതൽ 2027 ജനുവരി 3 വരെയാണ് നടക്കുന്നത്. ദീപാലങ്കാരങ്ങളാൽ സമൃദ്ധമായ തെരുവുകളിലൂടെയുള്ള നടത്തവും വിവിധ വിനോദ പരിപാടികളും സഞ്ചാരികൾക്ക് വേറിട്ട അനുഭവമാകും. ഇതിൽ പ്രധാന ആകർഷണം ഒരു കിലോമീറ്റർ നീളമുള്ള ‘ഹോളിഡേ മാജിക് ലൈറ്റ് ട്രെയിൽ’ ആണ്. തിളങ്ങുന്ന പ്രവേശന കവാടങ്ങളും കളർഫുൾ ലൈറ്റ് ഇൻസ്റ്റലേഷനുകളും ഫോട്ടോ സ്‌പോട്ടുകളും ഉൾപ്പെടുന്ന ഈ ട്രെയിൽ ദിവസവും സന്ധ്യ മുതൽ രാത്രി 10 മണി വരെ സൗജന്യമായി സന്ദർശിക്കാം.
മുപ്പതിലധികം കേന്ദ്രങ്ങൾ പങ്കാളികളാകുന്ന ‘ഹോട്ട് ചോക്ലേറ്റ് ഹോപ്പ്’ ആണ് ആഘോഷങ്ങളിലെ മറ്റൊരു പ്രധാന ആകർഷണം. കൂടാതെ കുട്ടികൾക്കും കുടുംബങ്ങൾക്കുമായി ‘ദി ജിഞ്ചർബ്രെഡ് എസ്കേപ്പ്’ എന്ന പേരിൽ സ്കാവഞ്ചർ ഹണ്ടും ഒരുക്കിയിട്ടുണ്ട്. വില്ലേജിൽ ഒളിപ്പിച്ചിരിക്കുന്ന 13 അക്ഷരങ്ങൾ കണ്ടെത്തി ദുരൂഹ വാചകം പൂരിപ്പിച്ച്, ജിഞ്ചർബ്രെഡ് മാന്റെ പസിൽ പൂർത്തിയാക്കുന്നവർക്ക് വെൽക്കം സെന്ററിൽ നിന്ന് പ്രത്യേക സമ്മാനങ്ങളും ലഭിക്കും.
ആഘോഷക്കാലത്ത് തത്സമയ സംഗീത കച്ചേരികൾ, സാന്റാ ക്ലോസുമായുള്ള കൂടിക്കാഴ്ച, കഥപറച്ചിൽ, മാന്ത്രിക കഥാപാത്രങ്ങളുടെ സാന്നിധ്യം, ക്രിസ്മസ് ട്രെയിൻ യാത്രകൾ എന്നിവയും ക്രമീകരിച്ചിട്ടുണ്ട്. തണുപ്പകറ്റാൻ ഔട്ട്‌ഡോർ ഫയർ പിറ്റുകൾ, ഷോപ്പിംഗ് കേന്ദ്രങ്ങൾ, റെസ്റ്റോറന്റുകൾ എന്നിവയും വില്ലേജിൽ ലഭ്യമാണ്. സ്കീയിംഗ്, സ്നോബോർഡിംഗ്, മൗണ്ടൻ കോസ്റ്റർ റൈഡ് തുടങ്ങിയ സാഹസിക വിനോദങ്ങളിൽ ഏർപ്പെടാനും ഇവിടെ സൗകര്യമുണ്ട്.
ALSO READ: ആഗോളതാപനം നിയന്ത്രണം വിടുന്നു: ലോകത്തെ കാത്തിരിക്കുന്നത് വൻ ദുരന്തമോ?
സ്വന്തം ജന്മനാടായ യൂറോപ്യൻ ഗ്രാമങ്ങളുടെ മാതൃകയിൽ ഒരു ടൂറിസം കേന്ദ്രം നിർമ്മിക്കുക എന്ന സ്ഥാപകൻ ജോസോ വൈഡറുടെ സ്വപ്ന പദ്ധതിയായിരുന്നു ബ്ലൂ മൗണ്ടൻ. ഈ വർഷം ബ്ലൂ മൗണ്ടന്റെ 85-ാം വാർഷികം കൂടിയാണ് ആഘോഷിക്കുന്നത്. യൂറോപ്യൻ ചാരുതയും ആകർഷകമായ ദീപാലങ്കാരങ്ങളും ചേർന്ന് ബ്ലൂ മൗണ്ടൻ വില്ലേജിനെ കാനഡയിലെ ഏറ്റവും മികച്ച അവധിക്കാല കേന്ദ്രങ്ങളിൽ ഒന്നാക്കി മാറ്റുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
