ഒട്ടാവ: അമേരിക്കയിലെ വർദ്ധിച്ചുവരുന്ന രാഷ്ട്രീയ അനിശ്ചിതത്വങ്ങളും സാമൂഹിക ധ്രുവീകരണവും മൂലം സുരക്ഷിതമായ മറ്റൊരു താവളം തേടുകയാണ് ആയിരക്കണക്കിന് അമേരിക്കൻ പൗരന്മാർ. അയൽരാജ്യമായ കാനഡയുടെ പൗരത്വ നിയമത്തിലുണ്ടായ പുതിയ ഭേദഗതി (Bill C-3) തങ്ങളുടെ കനേഡിയൻ പാരമ്പര്യം വീണ്ടെടുക്കാനുള്ള വലിയൊരു അവസരമായി ഇവർ കാണുന്നു. ഇതോടെ, തങ്ങളുടെ പൂർവ്വികർ കാനഡക്കാരായിരുന്നു എന്ന് തെളിയിക്കുന്ന രേഖകൾക്കായി ക്യൂബെക്കിലെയും നോവ സ്കോഷ്യയയിലെയും ആർക്കൈവ്സുകളിൽ അപേക്ഷകളുടെ പ്രളയമാണ് ദൃശ്യമാകുന്നത്.
നേരത്തെ നിലനിന്നിരുന്ന നിയമപ്രകാരം, വിദേശത്ത് ജനിച്ചവർക്ക് ആദ്യ തലമുറയ്ക്ക് മാത്രമേ കനേഡിയൻ പൗരത്വത്തിന് അവകാശമുണ്ടായിരുന്നുള്ളൂ. എന്നാൽ 2025 ഡിസംബർ 15-ന് പ്രാബല്യത്തിൽ വന്ന ‘ബിൽ സി-3’ (Bill C-3) ഈ നിയന്ത്രണം നീക്കി. കാനഡയ്ക്ക് പുറത്ത് ജനിച്ചവർക്കും തങ്ങളുടെ പൂർവ്വികർ കനേഡിയൻ പൗരന്മാരായിരുന്നു എന്ന് തെളിയിക്കാൻ സാധിച്ചാൽ ഇനി പൗരത്വത്തിന് അപേക്ഷിക്കാം. 2023-ലെ ഒന്റാറിയോ സുപ്പീരിയർ കോർട്ട് വിധിയെത്തുടർന്നാണ് ഈ ചരിത്രപരമായ നിയമഭേദഗതി ഉണ്ടായത്. ഇതോടെ എത്ര തലമുറ പിന്നിലായാലും രേഖകൾ കൃത്യമാണെങ്കിൽ പൗരത്വം ലഭിക്കുമെന്നതാണ് പ്രത്യേകത.
പൗരത്വത്തിനായുള്ള അപേക്ഷകൾ വർദ്ധിച്ചതോടെ പഴയകാല രേഖകൾ സൂക്ഷിക്കുന്ന സർക്കാർ ഓഫീസുകൾ കനത്ത ജോലിഭാരത്തിലാണ്. ക്യൂബെക്കിലെ ‘ബിബ്ലിയോതെക് എറ്റ് ആർക്കൈവ്സ് നാഷണൽസ് ഡു ക്യൂബെക്’ (BAnQ) നൽകുന്ന വിവരമനുസരിച്ച്, 2025 ജനുവരിയിൽ വെറും 32 അപേക്ഷകൾ ലഭിച്ചിടത്ത് 2026 ജനുവരിയിൽ അത് ആയിരത്തിന് മുകളിലായി ഉയർന്നു. അതായത് 3,000 ശതമാനത്തിലധികം വർദ്ധനവ്. 1621 മുതലുള്ള മാമോദീസ സർട്ടിഫിക്കറ്റുകൾ, വിവാഹ രേഖകൾ, ജനന സർട്ടിഫിക്കറ്റുകൾ എന്നിവ തേടിയാണ് ആളുകൾ എത്തുന്നത്. പലപ്പോഴും പേരുകളിലെ മാറ്റങ്ങളും കാലപ്പഴക്കവും രേഖകൾ കണ്ടെത്തുന്നത് ദുഷ്കരമാക്കുന്നുണ്ട്.
അമേരിക്കയിലെ രാഷ്ട്രീയ സാഹചര്യം മോശമാകുന്നത് മുൻകൂട്ടി കണ്ടാണ് പലരും ഈ നീക്കം നടത്തുന്നത്. “ഇതൊരു പ്ലാൻ ബി ആണ്. ഇവിടെ കാര്യങ്ങൾ കൂടുതൽ വഷളായാൽ ഞങ്ങൾക്ക് പോകാൻ ഒരിടം വേണം,” എന്ന് മസാച്യുസെറ്റ്സ് സ്വദേശിനിയായ ലിൻ റട്ട്മാൻ പറയുന്നു. ലിന്നിനെപ്പോലെ പതിനായിരക്കണക്കിന് ആളുകളാണ് നിലവിൽ കാനഡയിലെ ഇമിഗ്രേഷൻ വിഭാഗത്തിന്റെ (IRCC) തീരുമാനത്തിനായി കാത്തിരിക്കുന്നത്. മാർച്ച് ആദ്യവാരത്തിലെ കണക്കനുസരിച്ച് ഏകദേശം 48,000 അപേക്ഷകൾ തീരുമാനമാകാതെ കെട്ടിക്കിടക്കുകയാണ്. ഒരു അപേക്ഷയിൽ തീരുമാനമാകാൻ ശരാശരി 11 മാസമെങ്കിലും എടുക്കുമെന്നാണ് അധികൃതർ നൽകുന്ന സൂചന.
1840-നും 1930-നും ഇടയിൽ കാനഡയിൽ നിന്ന് ഏകദേശം പത്ത് ലക്ഷത്തോളം പേർ ജോലി തേടി അമേരിക്കയിലേക്ക് കുടിയേറിയിരുന്നു. ‘ഗ്രേറ്റ് ഹെമറേജ്’ (Great Hemorrhage) എന്നറിയപ്പെടുന്ന ഈ കുടിയേറ്റത്തിലൂടെ അമേരിക്കയിലെത്തിയവരുടെ പിൻഗാമികളാണ് ഇപ്പോൾ പൗരത്വത്തിനായി ശ്രമിക്കുന്നത്. ഫ്രഞ്ച് കനേഡിയൻ സംസ്കാരവുമായും ഭക്ഷണരീതികളുമായും ഇന്നും ഇവർ ആത്മബന്ധം പുലർത്തുന്നു. കേവലം ഒരു പാസ്പോർട്ടിന് അപ്പുറം, തങ്ങളുടെ വേരുകൾ തേടിയുള്ള ഒരു മടക്കയാത്രയായാണ് പലരും ഈ അവസരത്തെ കാണുന്നത്.
bill-c-3-canadian-citizenship-by-descent-american-interest
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
