തിരുവനന്തപുരം: ഏഷ്യാനെറ്റ് റിയാലിറ്റി ഷോയായ ബിഗ് ബോസ് മലയാളം സീസൺ 8-ന്റെ ഔദ്യോഗിക പ്രഖ്യാപനത്തിന് മുന്നോടിയായി മത്സരാർത്ഥികളുടെ പ്രവചന പട്ടിക സോഷ്യൽ മീഡിയയിൽ ചർച്ചയാകുന്നു. സാധാരണക്കാർക്കായുള്ള ഓഡിഷൻ പ്രൊമോ വീഡിയോ ചാനൽ പുറത്തുവിട്ടതിന് പിന്നാലെയാണ് വിവിധ മേഖലകളിലെ പ്രമുഖരുടെ പേരുകൾ ഉൾപ്പെടുത്തിയുള്ള സാധ്യതാ ലിസ്റ്റുകൾ സോഷ്യൽ മീഡിയ റിവ്യൂവർമാർ പങ്കുവെക്കാൻ തുടങ്ങിയത്.
പ്രമുഖ ബിഗ് ബോസ് റിവ്യൂവർ അൻസിഫ് പുറത്തുവിട്ട ഇരുപത് പേരുടെ ആദ്യഘട്ട പ്രവചന പട്ടികയാണ് ഇപ്പോൾ ഡിജിറ്റൽ പ്ലാറ്റ്ഫോമുകളിൽ പ്രധാനമായും പ്രചരിക്കുന്നത്. മുൻ സീസണുകളിലും ഇത്തരം പ്രവചന പട്ടികകളിലെ ചില മത്സരാർത്ഥികൾ ഷോയിൽ പങ്കെടുത്തിട്ടുള്ളതിനാൽ പ്രേക്ഷകർക്കിടയിൽ ഈ ലിസ്റ്റിന് വലിയ സ്വീകാര്യത ലഭിക്കുന്നുണ്ട്. സിനിമ, സീരിയൽ, സോഷ്യൽ മീഡിയ, അവതരണം തുടങ്ങിയ മേഖലകളിൽ നിന്നുള്ള പ്രമുഖരാണ് നിലവിലെ ലിസ്റ്റിലുള്ളത്.
പ്രചരിക്കുന്ന പട്ടികയിൽ ചലച്ചിത്ര-ടെലിവിഷൻ താരങ്ങളായ നീന കുറുപ്പ്, റോഷൻ ബഷീർ, മീര വാസുദേവ്, ബിജു സോപാനം, സാജൻ സൂര്യ, ഐശ്വര്യ റംസായി, സിദ്ധാർത്ഥ് പ്രഭു, തനൂജ് മേനോൻ, അഞ്ജലി നായർ, ആയിഷ, ആദിത്യൻ ജയൻ, മൃദുല വിജയ്, യുവ എന്നിവരുടെ പേരുകളാണുള്ളത്. ഇവർക്കൊപ്പം അവതാരകരായ ലക്ഷ്മി നക്ഷത്ര, കാർത്തിക് സൂര്യ, രാഹുൽ ഈശ്വർ, എയ്ഞ്ചൽ ബേബി അശ്വതി, സോഷ്യൽ മീഡിയ റിവ്യൂവർ ഡോ. രേവതി, ഫുഡ് വ്ലോഗർ സന്ധ്യാമ്മ (കടൽ മച്ചാൻ അമ്മ), പിആർ പ്രൊഫഷണൽ വിനു വിജയ്, ആക്ടിവിസ്റ്റ് ശ്രീലക്ഷ്മി അറയ്ക്കൽ എന്നിവരും സാധ്യതാ ലിസ്റ്റിലുണ്ട്. എന്നാൽ ഈ ലിസ്റ്റിൽ ഉൾപ്പെട്ടവരോ ചാനൽ അധികൃതരോ ഔദ്യോഗികമായി വിവരങ്ങളൊന്നും സ്ഥിരീകരിച്ചിട്ടില്ല. വരും ദിവസങ്ങളിൽ കൃത്യമായ വിവരങ്ങൾ പുറത്തുവരുമെന്ന പ്രതീക്ഷയിലാണ് ബിഗ് ബോസ് പ്രേക്ഷകർ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Bigg Boss Season 8: Prediction report shakes up social media; 'Drishyam' star also on the list!
