ബ്രിട്ടീഷ് കൊളംബിയ: ബ്രിട്ടീഷ് കൊളംബിയയിലെ (ബി.സി.) ബെല്ല കൂളയിൽ (Bella Coola) സ്കൂൾ വിദ്യാർത്ഥികളും ജീവനക്കാരും ഉൾപ്പെട്ട സംഘത്തിന് നേരെ ഗ്രിസ്ലി കരടിയുടെ ആക്രമണം. ആക്രമണത്തിൽ മൂന്ന് കുട്ടികൾ ഉൾപ്പെടെ നാല് പേരെ ആശുപത്രിയിൽ പ്രവേശിപ്പിച്ചു. ഇതിൽ രണ്ടുപേരുടെ നില അതീവ ഗുരുതരമാണെന്നാണ് റിപ്പോർട്ടുകൾ. കഴിഞ്ഞ വ്യാഴാഴ്ച ഉച്ചയ്ക്ക് 1:35 ഓടെ ഹൈവേ 20 ന് സമീപമുള്ള ഒരു വഴിയിൽ ഉച്ചഭക്ഷണം കഴിക്കുകയായിരുന്ന സ്കൂൾ സംഘത്തിന് നേരെയാണ് വനത്തിൽ നിന്ന് പുറത്തുവന്ന കരടി ആക്രമണം നടത്തിയത്. ബി.സി. കൺസർവേഷൻ ഓഫീസർ സർവീസ് ആണ് ഇക്കാര്യം അറിയിച്ചത്.
നക്സൽക്ക് ഫസ്റ്റ് നേഷൻ (Nuxalk First Nation) നടത്തുന്ന സ്വതന്ത്ര സ്കൂളായ ആക്സ്വാൽക്താ സ്കൂളിലെ (Acwsalcta School) വിദ്യാർത്ഥികളും ജീവനക്കാരുമാണ് ആക്രമിക്കപ്പെട്ടത്. വിദ്യാർത്ഥികളെ പ്രതിരോധിക്കാൻ അധ്യാപകർ ബിയർ സ്പ്രേയും മറ്റ് ഉപകരണങ്ങളും ഉപയോഗിച്ച് ശക്തമായി പ്രതിരോധിച്ചു.
ബി.സി. എമർജൻസി ഹെൽത്ത് സർവീസസ് നൽകുന്ന വിവരമനുസരിച്ച്, നാല് പേർക്ക് സംഭവസ്ഥലത്ത് അടിയന്തര ചികിത്സ നൽകിയ ശേഷം ആശുപത്രിയിലേക്ക് മാറ്റി. ആക്രമണത്തിനിരയായ കുട്ടികൾക്ക് ഒമ്പതും പത്തും വയസ്സാണ് പ്രായം.
ആക്രമണത്തിന് ശേഷം കൺസർവേഷൻ ഓഫീസർമാർ കരടിക്കായി തിരച്ചിൽ നടത്തിയെങ്കിലും കണ്ടെത്താൻ കഴിഞ്ഞില്ല. 4 മൈലിനടുത്തുള്ള വനപ്രദേശത്തേക്കും നദിക്കരികിലേക്കും പോകരുതെന്നും വീടിനുള്ളിൽ തന്നെ തുടരണമെന്നും അധികൃതർ പ്രദേശവാസികളോട് അഭ്യർത്ഥിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Bear attacks schoolchildren in British Columbia; 4 injured, alert issued
