ബ്രിട്ടീഷ് കൊളംബിയ: ബ്രിട്ടീഷ് കൊളംബിയയിലുള്ള കോമോക്സ് വാലിയിൽ വൻതോതിൽ മലിനജലം (Sewage) ചോർന്നതിനെത്തുടർന്ന് ജനങ്ങൾക്ക് കർശന നിർദ്ദേശവുമായി അധികൃതർ. പ്രതിസന്ധി രൂക്ഷമായതോടെ കോർട്ടേനി, കോമോക്സ്, കോമോക്സ് ഫസ്റ്റ് നേഷൻ തുടങ്ങിയ പ്രദേശങ്ങളിലെ താമസക്കാരോട് ടോയ്ലറ്റുകൾ ഫ്ലഷ് ചെയ്യരുതെന്നും അനാവശ്യമായി കുളിക്കുകയോ വാഷിംഗ് മെഷീൻ, ഡിഷ്വാഷർ എന്നിവ ഉപയോഗിക്കുകയോ ചെയ്യരുതെന്നും പ്രാദേശിക ഭരണകൂടം ആവശ്യപ്പെട്ടു.
ചൊവ്വാഴ്ച കോമോക്സ് മറീനയ്ക്ക് സമീപമുള്ള പ്രധാന പമ്പ് സ്റ്റേഷനിലാണ് വൻതോതിലുള്ള ചോർച്ചയുണ്ടായത്. പമ്പ് സ്റ്റേഷനിൽ നിന്നും അതിശക്തമായ രീതിയിൽ മലിനജലം കടലിലേക്ക് ഒഴുകുകയാണെന്നും പ്രദേശം മുഴുവൻ കടുത്ത ദുർഗന്ധം വമിക്കുകയാണെന്നും പ്രദേശവാസികൾ പറയുന്നു. ഇതോടെയാണ് അടിയന്തിര സാഹചര്യത്തിന് സമാനമായ നിർദ്ദേശങ്ങൾ അധികൃതർ ജനങ്ങൾക്ക് നൽകിയത്.
ശുചിമുറികളിൽ നിന്നും കിച്ചണുകളിൽ നിന്നും ഡ്രെയിനേജ് സംവിധാനത്തിലേക്ക് വെള്ളം എത്താതിരിക്കുന്നത് ചോർച്ച അടയ്ക്കാനുള്ള അറ്റകുറ്റപ്പണികൾ വേഗത്തിലാക്കാൻ സഹായിക്കുമെന്ന് എഞ്ചിനീയറിംഗ് സർവീസസ് ജനറൽ മാനേജർ ക്രിസ് ലാ റോസ് വ്യക്തമാക്കി. മലിനജലം കടലിലേക്ക് കലരുന്നതിന്റെ തോത് കുറയ്ക്കാൻ ജനങ്ങളുടെ സഹകരണം അത്യാവശ്യമാണെന്നും അദ്ദേഹം കൂട്ടിച്ചേർത്തു.
ചോർച്ചയെത്തുടർന്ന് മുൻകരുതൽ നടപടിയായി പ്രദേശത്തെ സ്പോർട്സ് സെന്ററുകൾ, അക്വാട്ടിക് സെന്ററുകൾ, പാർക്കുകളിലെ പൊതു ശൗചാലയങ്ങൾ എന്നിവ താൽക്കാലികമായി അടച്ചുപൂട്ടിയിരിക്കുകയാണ്. അതേസമയം, കുടിവെള്ള വിതരണത്തെ ഈ ചോർച്ച ബാധിച്ചിട്ടില്ലെന്ന് അധികൃതർ ഉറപ്പുനൽകുന്നുണ്ട്.
മലിനജലം വൻതോതിൽ കടലിൽ കലർന്നതിനാൽ തീരപ്രദേശങ്ങളിലും മറീനയ്ക്ക് സമീപവും നീന്തുന്നതിനും ബോട്ടിംഗ് നടത്തുന്നതിനും വിലക്കേർപ്പെടുത്തിയിട്ടുണ്ട്. കൂടാതെ ഈ പ്രദേശങ്ങളിൽ നിന്നും കക്ക, മറ്റ് കടൽ വിഭവങ്ങൾ എന്നിവ ശേഖരിക്കരുതെന്നും കർശനമായ മുന്നറിയിപ്പുണ്ട്. വരും ദിവസങ്ങളിൽ ഈ മേഖലയിൽ കടുത്ത പരിസ്ഥിതി നിരീക്ഷണമുണ്ടാകുമെന്നാണ് റിപ്പോർട്ടുകൾ.
B.C.’s Comox Valley issues sewer use warning due to ‘ongoing emergency’
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
