ന്യൂ ബ്രൺസ്വിക്കിൽ ഓൾ ടെറൈൻ വെഹിക്കിളുകൾ (ATV – All-Terrain Vehicle) ഉൾപ്പെടെയുള്ള ഓഫ്-റോഡ് വാഹനങ്ങൾ അശ്രദ്ധമായും നിയമവിരുദ്ധമായും ഓടിക്കുന്നത് വർദ്ധിച്ചതോടെ, സുരക്ഷാ മുന്നറിയിപ്പുമായി റോയൽ കനേഡിയൻ മൗണ്ടഡ് പോലീസ് രംഗത്ത്. അടുത്തിടെയായി അശ്രദ്ധമായ ഡ്രൈവിംഗിനെക്കുറിച്ച് പൊതുജനങ്ങളിൽ നിന്ന് നിരവധി കോളുകളും വിവരങ്ങളും ലഭിച്ചതിനെ തുടർന്നാണ് പോലീസ് നടപടി ശക്തമാക്കിയത്. മെംറാംകൂക്ക്, വില്ലോ ഗ്രോവ്, ബാക്സ്റ്റേഴ്സ് കോർണർ തുടങ്ങിയ പ്രദേശങ്ങളിലാണ് നിയമലംഘനം പ്രധാനമായും വർദ്ധിച്ചിരിക്കുന്നത്.
മേഖലകളിൽ സുരക്ഷ ഉറപ്പാക്കുന്നതിനായി പോലീസ് ഇപ്പോൾ “പ്രോ-ആക്റ്റീവ് എൻഫോഴ്സ്മെൻ്റ് ഓപ്പറേഷനുകൾ” നടത്തിവരികയാണ്. ഈ വർഷം ഇതുവരെ, ഹാമ്പ്ടൺ ഡിറ്റാച്ച്മെൻ്റിൽ മാത്രം റിപ്പോർട്ട് ചെയ്യപ്പെട്ട കേസുകളുടെ കണക്കുകൾ ഗൗരവകരമാണ്. പോലീസ് നിർത്താൻ ആവശ്യപ്പെട്ടിട്ടും നിർത്താതെ പോയ 15 സംഭവങ്ങൾ, എട്ട് ഗുരുതരമായ അപകടങ്ങൾ, ഒൻപത് പരാതികൾ, ATV മോഷണവുമായി ബന്ധപ്പെട്ട രണ്ട് കേസുകൾ എന്നിവയാണ് ഇവർ രേഖപ്പെടുത്തിയത്. സ്ഥിതിഗതികൾ ഗുരുതരമായതോടെയാണ് ATV ഉപയോക്താക്കൾക്ക് കർശന നിർദ്ദേശങ്ങൾ നൽകി RCMP രംഗത്തെത്തിയത്.
“നിങ്ങൾ പരിചയസമ്പന്നനായ റൈഡറായാലും പുതിയ ആളായാലും, ATVകളും ഓഫ്-റോഡ് വാഹനങ്ങളും ഓടിക്കുമ്പോൾ സുരക്ഷയ്ക്ക് എപ്പോഴും പ്രാധാന്യം നൽകണം,” ഹാമ്പ്ടൺ RCMP-യിലെ സെർജൻ്റ് കർട്ടിസ് മക്കാൻ ഒരു വാർത്താക്കുറിപ്പിൽ പറഞ്ഞു. ഓഫ്-റോഡ് വെഹിക്കിൾ ആക്ട് പ്രകാരമുള്ള പിഴകൾ $172.50 (ഏകദേശം $14,000 രൂപ) മുതൽ ആരംഭിക്കുന്നു, എന്നാൽ ചില ഗുരുതരമായ കേസുകളിൽ ഇത് $20,500 (ഏകദേശം $16.8 ലക്ഷം രൂപ) വരെ ഉയരാൻ സാധ്യതയുണ്ടെന്നും പോലീസ് മുന്നറിയിപ്പ് നൽകി. നിയമങ്ങൾ പാലിക്കാത്ത പക്ഷം ഡ്രൈവർക്കും റോഡിലുള്ള മറ്റുള്ളവർക്കും ഗുരുതരമായ പ്രത്യാഘാതങ്ങൾ ഉണ്ടാകുമെന്നും അധികൃതർ ഓർമ്മിപ്പിച്ചു.
16 വയസ്സിന് താഴെയുള്ള കുട്ടികൾക്ക് നിയമപരമായി ഓഫ്-റോഡ് വാഹനങ്ങൾ ഓടിക്കാമെങ്കിലും, രക്ഷാകർത്താക്കൾക്ക് ചില സുപ്രധാന ഉത്തരവാദിത്തങ്ങൾ RCMP എടുത്തുപറയുന്നു. പ്രായപരിധി പരിഗണിക്കാതെ എല്ലാ യാത്രക്കാർക്കും ഹെൽമറ്റ് നിർബന്ധമാണ്. കുട്ടികൾക്ക് അവരുടെ പ്രായത്തിന് അനുയോജ്യമായ വാഹനങ്ങൾ മാത്രമേ നൽകാവൂ. അംഗീകൃത സുരക്ഷാ പരിശീലന കോഴ്സ് പൂർത്തിയാക്കിയ ഒരാളായിരിക്കണം 16 വയസ്സിൽ താഴെയുള്ള കുട്ടികളെ ATV ഓടിക്കുമ്പോൾ മേൽനോട്ടം വഹിക്കേണ്ടത്. മേൽനോട്ടം വഹിക്കുന്നയാൾക്ക് കുറഞ്ഞത് 19 വയസ്സും സുരക്ഷാ കോഴ്സ് പൂർത്തിയാക്കുകയും വേണം.
അപകടകരമായ രീതിയിൽ ആരെങ്കിലും വാഹനം ഓടിക്കുന്നതായി കണ്ടാലോ, അല്ലെങ്കിൽ മദ്യപിച്ച് വാഹനമോടിക്കുന്നതായി സംശയം തോന്നിയാലോ ഉടൻ തന്നെ 911 എന്ന നമ്പറിൽ വിളിച്ച് അറിയിക്കണമെന്നും പോലീസ് പൊതുജനങ്ങളോട് അഭ്യർത്ഥിച്ചു. താൽക്കാലിക ലാഭത്തിനും അശ്രദ്ധമായ വിനോദത്തിനും വേണ്ടി സ്വന്തം ജീവനും മറ്റുള്ളവരുടെ ജീവനും അപകടത്തിലാക്കുന്ന ഇത്തരം പ്രവണതകൾക്കെതിരെ സമൂഹം ജാഗ്രത പാലിക്കണമെന്നും RCMP ആവശ്യപ്പെട്ടു.
