പ്രശസ്തമായ കാൽഗറി സ്റ്റാംപീഡ് മേളയ്ക്കിടെ മിഡ്വേയിൽ ചൊവ്വാഴ്ച രാത്രിയുണ്ടായ ആക്രമണത്തിൽ മൂന്ന് പേർക്ക് പരിക്കേറ്റു. നടന്നത് ആസൂത്രിത ആക്രമണമാണെന്ന് കാൽഗറി പോലീസ് അറിയിച്ചു. രാത്രി 11:05 ഓടെ സ്റ്റാംപീഡ് മിഡ്വേയിലെ യൂറോസ്ലൈഡ് റൈഡിന് സമീപമാണ് ആദ്യ ആക്രമണം റിപ്പോർട്ട് ചെയ്തത്. ഇവിടെ കുത്തേറ്റ നിലയിൽ കണ്ടെത്തിയ ഒരാളെ അതീവ ഗുരുതരാവസ്ഥയിൽ ഉടൻതന്നെ ആശുപത്രിയിൽ പ്രവേശിപ്പിച്ചു.
തുടർന്ന്, മറ്റ് രണ്ട് പേർക്ക് കൂടി പരിക്കേറ്റെന്ന വിവരം പോലീസിന് ലഭിച്ചു. 17-ആം അവന്യൂ, മാക്ലിയോഡ് ട്രെയിൽ എസ്.ഇ പ്രദേശത്തുനിന്ന് ഒരു യുവാവിനെയും, എർൾട്ടൺ സ്ട്രീറ്റ് & 27-ആം അവന്യൂ എസ്.ഡബ്ല്യു സമീപത്തുനിന്ന് മറ്റൊരു പുരുഷനെയും കണ്ടെത്തുകയായിരുന്നു. ഇവരും ആദ്യ ആക്രമണത്തിന്റെ ഇരകളാണെന്ന് പോലീസ് പിന്നീട് സ്ഥിരീകരിച്ചു. ഭാഗ്യവശാൽ, ഈ രണ്ടുപേരും ഗുരുതരമല്ലാത്ത പരിക്കുകളോടെ ആശുപത്രിയിൽ ചികിത്സയിലാണ്.
രണ്ടുപേരുടെയും പരിക്ക് ഗുരുതരമല്ല. ആക്രമണവുമായി ബന്ധപ്പെട്ട് ഇതുവരെ ആരെയും അറസ്റ്റ് ചെയ്തിട്ടില്ലെന്ന് പോലീസ് അറിയിച്ചു.
ആക്രമണത്തെക്കുറിച്ച് എന്തെങ്കിലും വിവരങ്ങളുള്ളവർ 403-266-1234 എന്ന നമ്പറിൽ ബന്ധപ്പെടണമെന്ന് കാൽഗറി പൊലീസ് അഭ്യർത്ഥിച്ചു. അജ്ഞാതമായി വിവരം നൽകാൻ ക്രൈം സ്റ്റോപ്പേഴ്സിൻ്റെ 1-800-222-8477 എന്ന ടോൾ ഫ്രീ നമ്പറിലോ, അവരുടെ വെബ്സൈറ്റായ www.calgarycrimestoppers.org വഴിയോ, അല്ലെങ്കിൽ P3 Tips എന്ന ആപ്പ് ഉപയോഗിച്ചോ വിവരങ്ങൾ കൈമാറാം. അന്വേഷണത്തിൻ്റെ പുരോഗതി അനുസരിച്ച് കൂടുതൽ വിവരങ്ങൾ പുറത്തുവിടുമെന്ന് പോലീസ് വ്യക്തമാക്കി.
