പൊതുസ്ഥലത്ത് സ്ത്രീകളെ പിന്തുടർന്ന് വീഡിയോയെടുക്കുകയും അധിക്ഷേപിക്കുകയും ചെയ്ത ഏഷ്യൻ വംശജനായ ഒരു ഇൻഫ്ലുവൻസറുടെ മറുപടി കാനഡയിൽ വലിയ പ്രതിഷേധത്തിന് വഴിവെച്ചു. തൻ്റെ പ്രവൃത്തി ചോദ്യം ചെയ്ത സ്ത്രീയോട്, “സ്വകാര്യത വേണമെങ്കിൽ വീട്ടിലിരിക്കുക” എന്ന് ഇയാൾ പരിഹസിച്ചു പറഞ്ഞതാണ് സമൂഹമാധ്യമങ്ങളിൽ വൻ വിമർശനം ഏറ്റുവാങ്ങിയത്.
ശ്രീലങ്കൻ വംശജനായ അസ്കർ റസിക് (Askar Razik) എന്ന ഇൻഫ്ലുവൻസറാണ് സാമൂഹ്യ മാധ്യമങ്ങളിൽ വൈറലാകാൻ വേണ്ടി കാനഡയിലെ വഴിയാത്രക്കാരെ അനാവശ്യമായി തടഞ്ഞുനിർത്തി വീഡിയോ എടുക്കുന്നത്. ഇത്തരത്തിൽ ഇയാൾ ഒരു സ്ത്രീയുടെ വീഡിയോയെടുത്തുകൊണ്ട് അവരുടെ ഉയരത്തെക്കുറിച്ച് മോശം കമന്റ് പറയുകയായിരുന്നു. “നിങ്ങൾ വളരെ ഉയരമുള്ളവളാണ്” എന്നായിരുന്നു ഇയാളുടെ കമന്റ്.ഇയാളുടെ പ്രവൃത്തി ‘ഭയപ്പെടുത്തുന്നതും (Creepy)’ അധിക്ഷേപകരവുമാണെന്ന് സ്ത്രീ തുറന്നടിച്ചു. എന്നാൽ ഈ വിമർശനം ഇയാളെ കൂടുതൽ പ്രകോപിപ്പിച്ചു. “നിങ്ങൾക്ക് സ്വകാര്യത വേണമെങ്കിൽ, നിങ്ങൾ വീട്ടിലിരിക്കണം, ഡാർലിംഗ്! വീട്ടിലിരിക്കുക… എല്ലാവർക്കും ക്യാമറയുണ്ട്. സ്വകാര്യത വേണമെങ്കിൽ വീട്ടിലിരിക്കുക,” എന്ന് ഇയാൾ പരിഹാസത്തോടെ സ്ത്രീയോട് പറഞ്ഞു.
ഈ മറുപടിക്ക് പിന്നാലെ ഇയാളുടെ വീഡിയോ സോഷ്യൽ മീഡിയയിൽ അതിവേഗം പ്രചരിക്കുകയും വൻ വിമർശനത്തിന് വഴിവെക്കുകയും ചെയ്തു. ഒരു ‘ഏഷ്യൻ’ വംശജൻ ഈ രാജ്യത്തെ സ്ത്രീകൾ അവരുടെ ‘വീട്ടിൽ’ സുരക്ഷിതരായിരിക്കണമെന്ന് ആവശ്യപ്പെടുന്നത് അംഗീകരിക്കാനാവില്ലെന്ന് പലരും അഭിപ്രായപ്പെട്ടു. തരംതാണ പ്രശസ്തിക്കുവേണ്ടി സ്ത്രീകളെ ഉപദ്രവിക്കുന്ന ഇയാളുടെ പ്രവൃത്തികളെ ശക്തമായി അപലപിച്ചുകൊണ്ട് നിരവധി പേർ രംഗത്തെത്തി. ഇയാൾക്കെതിരെ ശല്യം ചെയ്യലിനും സ്വകാര്യതയിലേക്കുള്ള കടന്നുകയറ്റത്തിനും കേസെടുക്കണമെന്നും പലരും ആവശ്യപ്പെടുന്നുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
‘Creepy Asian man’ in Canada asks women to ‘stay at home’ after being called out, sparks outrage
