മോൺട്രിയലിൽ ഒഴിഞ്ഞുകിടക്കുന്നത് നിരവധി ഫ്ലാറ്റുകൾ; സാധാരണക്കാർക്ക് വീടുകിട്ടാക്കനി; ഭവന വിപണിയിൽ പ്രതിസന്ധി രൂക്ഷം

മോൺട്രിയൽ: മോൺട്രിയൽ നഗരത്തിൽ വാടകയ്ക്ക് നൽകാനുള്ള ഫ്ലാറ്റുകളുടെ എണ്ണത്തിൽ വർധനവുണ്ടായിട്ടും സാധാരണക്കാർക്ക് ഭവനലഭ്യത ഇപ്പോഴും വെല്ലുവിളിയായി തുടരുന്നു. ലക്ഷ്വറി അപ്പാർട്ട്‌മെന്റുകൾ വൻതോതിൽ ഒഴിഞ്ഞുകിടക്കുമ്പോഴും കുറഞ്ഞ വാടകയ്ക്കുള്ള വീടുകൾക്ക് കടുത്ത ക്ഷാമമാണ് നേരിടുന്നത്. കാനഡ മോർട്ട്ഗേജ് ആൻഡ് ഹൗസിംഗ് കോർപ്പറേഷൻ (CMHC) പുറത്തുവിട്ട 2025-ലെ വാർഷിക റിപ്പോർട്ടിലാണ് നഗരത്തിലെ ഭവന വിപണിയിലെ ഈ വൈരുദ്ധ്യം വ്യക്തമാകുന്നത്.

പുതിയ കണക്കുകൾ പ്രകാരം മോൺട്രിയൽ മേഖലയിലെ ശരാശരി ഒഴിവുനിരക്ക് (Vacancy Rate) 2.9 ശതമാനമാണ്. ഇത് വിപണി സന്തുലിതാവസ്ഥയിലേക്ക് നീങ്ങുന്നതിന്റെ ലക്ഷണമായി പൊതുവെ വിലയിരുത്തപ്പെടാറുണ്ടെങ്കിലും, യാഥാർത്ഥ്യം ഇതിൽ നിന്നും വിഭിന്നമാണെന്ന് വിദഗ്ധർ ചൂണ്ടിക്കാട്ടുന്നു. നഗരത്തിലെ ആഡംബര ഫ്ലാറ്റുകളുടെ ഒഴിവുനിരക്ക് 5.9 ശതമാനമായി ഉയർന്നപ്പോൾ, സാധാരണക്കാർക്ക് താങ്ങാനാവുന്ന നിരക്കിലുള്ള വീടുകളുടെ ഒഴിവുനിരക്ക് കേവലം 1.5 ശതമാനം മാത്രമാണ്.

ആഡംബര ഫ്ലാറ്റുകൾ വാടകയ്ക്ക് എടുക്കാൻ ആളുകളെ ആകർഷിക്കുന്നതിനായി ഉടമകൾ ഒന്നുമുതൽ മൂന്നുമാസം വരെ വാടക ഇളവ് പ്രഖ്യാപിക്കുന്നുണ്ടെങ്കിലും, സാധാരണക്കാർക്ക് ഇത് അപ്രാപ്യമാണ്. ഇത്തരം ഇളവുകൾ നൽകിയാലും മാസവാടക ഭീമമായ തുകയായി തുടരുന്നതാണ് ഇതിന് കാരണം. ഇതോടൊപ്പം തന്നെ, രണ്ട് വിഭാഗം ഫ്ലാറ്റുകളുടെയും വാടക നിരക്ക് പണപ്പെരുപ്പത്തേക്കാൾ ഉയർന്ന തോതിലാണ് ഈ വർഷവും വർധിച്ചിരിക്കുന്നത്.

നഗരത്തിലെ വിവിധ മേഖലകൾ തമ്മിലും വലിയ അന്തരമാണ് നിലനിൽക്കുന്നത്. ആഡംബര ഫ്ലാറ്റുകൾ കൂടുതലുള്ള മോൺട്രിയൽ ഡൗൺടൗൺ പോലുള്ള ഇടങ്ങളിൽ ഒഴിവുനിരക്ക് 8.3 ശതമാനമാണ്. എന്നാൽ സാധാരണക്കാർ താമസിക്കുന്ന മോൺട്രിയൽ നോർത്ത് പോലുള്ള പ്രദേശങ്ങളിൽ ഇത് 0.9 ശതമാനം മാത്രമാണ്. ശരാശരി ഒഴിവുനിരക്ക് മാത്രം കണക്കിലെടുത്ത് നഗരത്തിലെ ഭവന പ്രതിസന്ധി അവസാനിച്ചുവെന്ന് കരുതുന്നത് തെറ്റാണെന്ന് ലേബർ ഓർഗനൈസർ ആയ എമിൽ ബുഷെ പറഞ്ഞു.

90-കളിലെ സാഹചര്യത്തിൽ നിന്നും വ്യത്യസ്തമായി ഫെഡറൽ സബ്‌സിഡികളുടെയും നികുതി ഇളവുകളുടെയും സഹായത്തോടെ ലക്ഷ്വറി ടവറുകൾ വ്യാപകമായി നിർമ്മിക്കപ്പെട്ടതാണ് ഇപ്പോഴത്തെ അസമത്വത്തിന് കാരണമെന്ന് നിരീക്ഷകർ കരുതുന്നു. വരുമാനത്തിന്റെ വലിയൊരു ശതമാനം വാടകയ്ക്കായി ചെലവാക്കേണ്ടി വരുന്നതാണ് സാധാരണക്കാർ നേരിടുന്ന പ്രധാന വെല്ലുവിളി. ശരാശരി ഒഴിവുനിരക്ക് 3 ശതമാനത്തിന് മുകളിൽ എത്തിയാൽ വിപണി സന്തുലിതമാകുമെന്ന് പറയപ്പെടുന്നുണ്ടെങ്കിലും, സാധാരണക്കാരുടെ വരുമാനത്തിനനുസരിച്ചുള്ള വാടക നിരക്ക് ലഭ്യമാകാൻ ഇനിയും ഏറെ സമയമെടുക്കുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു.

are-new-realities-in-montreals-rental-market-making-age-old-vacancy-rate-obsolete

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt