ന്യൂ ഡൽഹി: ആഗോള ടെക് ഭീമനായ ആപ്പിൾ തങ്ങളുടെ ഉൽപ്പന്ന നിരയിൽ വൻ പരിഷ്കാരം നടപ്പിലാക്കുന്നു. 2025-ൽ ഐഫോൺ, ഐപാഡ്, ആപ്പിൾ വാച്ച് തുടങ്ങി വിവിധ വിഭാഗങ്ങളിലായി ഇരുപതിലധികം ഉൽപ്പന്നങ്ങളുടെ നിർമ്മാണം കമ്പനി ഔദ്യോഗികമായി അവസാനിപ്പിച്ചു. ആധുനിക സാങ്കേതികവിദ്യയും കൂടുതൽ കരുത്തുറ്റ ചിപ്പുകളും ഉൾപ്പെടുത്തിയ പുതിയ മോഡലുകൾ വിപണിയിൽ എത്തിയതോടെയാണ് പഴയ പതിപ്പുകൾ പിൻവലിക്കാൻ കമ്പനി തീരുമാനിച്ചത്.
ഐഫോൺ വിഭാഗത്തിൽ ഏഴോളം ജനപ്രിയ മോഡലുകളാണ് ഇതോടെ വിപണിയിൽ നിന്ന് മാറുന്നത്. ഐഫോൺ 16 പ്രോ മാക്സ്, 16 പ്രോ, ഐഫോൺ 15 പ്ലസ്, ഐഫോൺ 15 എന്നിവ ഇതിൽ ഉൾപ്പെടുന്നു. കൂടാതെ ഐഫോൺ 14 പ്ലസ്, ഐഫോൺ 14, ഐഫോൺ എസ്ഇ എന്നീ മോഡലുകളുടെ ഉത്പാദനവും കമ്പനി നിർത്തിവച്ചിട്ടുണ്ട്. ഇതോടെ ആപ്പിൾ സ്റ്റോറുകളിൽ നിന്ന് ഈ മോഡലുകൾ ഘട്ടംഘട്ടമായി നീക്കം ചെയ്യും.
ഐപാഡ്, ആപ്പിൾ വാച്ച് നിരകളിലും സമാനമായ മാറ്റങ്ങളാണ് വരുത്തിയിരിക്കുന്നത്. എം4 ചിപ്പോടു കൂടിയ ഐപാഡ് പ്രോ, എം2 ചിപ്പുള്ള ഐപാഡ് എയർ, ഐപാഡ് 10 എന്നിവ ഇനി കമ്പനി നേരിട്ട് വിതരണം ചെയ്യില്ല. ആപ്പിൾ വാച്ച് അൾട്രാ 2, സീരീസ് 10, വാച്ച് എസ്ഇ 2 എന്നിവയും ഈ പട്ടികയിലുണ്ട്. കൂടുതൽ വ്യക്തതയുള്ള ഡിസ്പ്ലേകളും വേഗതയേറിയ പ്രോസസറുകളുമുള്ള പുതിയ മോഡലുകളിലേക്ക് ഉപഭോക്താക്കളെ ആകർഷിക്കുകയാണ് കമ്പനിയുടെ ലക്ഷ്യം.
കമ്പ്യൂട്ടർ വിഭാഗത്തിൽ മാക്ബുക്ക് പ്രോ 14 ഇഞ്ച് (M4 ചിപ്പ്), മാക്ബുക്ക് എയർ 13, 15 ഇഞ്ച് (M3 ചിപ്പ്), എം2 ചിപ്പുള്ള 13 ഇഞ്ച് മാക്ബുക്ക് എയർ എന്നിവയും നിർത്തലാക്കിയവയിൽ പെടുന്നു. ഇതിന് പുറമെ വിപ്ലവകരമായ ഉൽപ്പന്നമായി അവതരിപ്പിക്കപ്പെട്ട ആപ്പിൾ വിഷൻ പ്രോ (M2 ചിപ്പ്), എയർപോഡ്സ് പ്രോ 2 എന്നിവയും നിർമ്മാണം അവസാനിപ്പിച്ച പ്രധാന ഉപകരണങ്ങളാണ്.
നിർമ്മാണം നിർത്തിയെങ്കിലും നിലവിൽ വിപണിയിലുള്ള സ്റ്റോക്കുകൾ തീരുന്നത് വരെ തേർഡ് പാർട്ടി റീട്ടെയിലർമാരിൽ നിന്നും ഓൺലൈൻ പ്ലാറ്റ്ഫോമുകളിൽ നിന്നും ഈ ഉൽപ്പന്നങ്ങൾ ലഭ്യമാകും. പഴയ ആക്സസറികൾക്ക് പകരം പുതിയ 40W ഡൈനാമിക് പവർ അഡാപ്റ്ററുകളും മാഗ്സേഫ് ചാർജറുകളും കമ്പനി വിപണിയിൽ എത്തിച്ചിട്ടുണ്ട്. ലൈറ്റ്നിംഗ് കേബിളുകളിൽ നിന്ന് യുഎസ്ബി-സി ടൈപ്പിലേക്കുള്ള പൂർണ്ണമായ മാറ്റവും ഈ നടപടിയോടെ പൂർത്തിയാകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Apple's product line-up undergoes major overhaul; 20 models, including iPhone, discontinued
