ക്യുബക് സിറ്റി: ക്യുബക് ലിബറൽ പാർട്ടിക്കെതിരെ (Quebec Liberal Party – PLQ) അഴിമതി വിരുദ്ധ സേനയായ യൂണിറ്റ് പെർമനന്റ് ആന്റികറപ്ഷൻ (UPAC) ക്രിമിനൽ അന്വേഷണം ആരംഭിച്ചു. പാർട്ടിയിലെ ആഭ്യന്തര പ്രതിസന്ധിയും, വോട്ട് നേടുന്നതിനായി പണം നൽകിയെന്ന ആരോപണങ്ങളും ശക്തമായ പശ്ചാത്തലത്തിലാണ് ഈ നിർണായക നീക്കം. പാർട്ടി നേതാവ് പാബ്ലോ റോഡ്രിഗസിന്റെ നേതൃത്വത്തിലേക്ക് എത്താനുള്ള മത്സരവുമായി ബന്ധപ്പെട്ട ആരോപണങ്ങളാണ് അന്വേഷണത്തിന് വഴിവെച്ചത്.റോഡ്രിഗസിനെ പിന്തുണയ്ക്കുന്ന ചില അംഗങ്ങൾക്ക് പണമായി പ്രതിഫലം ലഭിച്ചതായി സന്ദേശങ്ങൾ പുറത്തുവന്നിരുന്നു. ഇത് സംബന്ധിച്ച ആരോപണങ്ങൾ UPAC പരിശോധിക്കും.
പാർട്ടിയിലെ എംഎൻഎ ആയിരുന്ന മർവാ റിസ്കി, റോഡ്രിഗസിന്റെ അടുത്ത അനുയായി ആയിരുന്ന തൻ്റെ ചീഫ് ഓഫ് സ്റ്റാഫിനെ പിരിച്ചുവിട്ടതിനെ തുടർന്നുണ്ടായ തർക്കം പാർട്ടിയിൽ വലിയ പ്രതിസന്ധി സൃഷ്ടിച്ചിരുന്നു. ഇതിന് പിന്നാലെ റിസ്കിയെ പാർട്ടി സസ്പെൻഡ് ചെയ്തു. ചില എംഎൻഎ ഫണ്ടുകൾ രാഷ്ട്രീയ ആവശ്യങ്ങൾക്കായി ദുരുപയോഗം ചെയ്തു എന്ന ആരോപണങ്ങളും ഈ സമയത്ത് ഉയർന്നിരുന്നു.
അഴിമതി വിരുദ്ധ സേന തങ്ങളുടെ നടപടികളെക്കുറിച്ച് കൂടുതൽ വിവരങ്ങൾ പുറത്തുവിട്ടിട്ടില്ല. അന്വേഷണത്തോട് പൂർണ്ണമായി സഹകരിക്കുമെന്ന് ലിബറൽ പാർട്ടി നേതാവ് പാബ്ലോ റോഡ്രിഗസ് അറിയിച്ചു. അദ്ദേഹം തന്നെയാണ് ഈ വിഷയത്തിൽ ഒരു സ്വതന്ത്ര അന്വേഷണം ആവശ്യപ്പെട്ടതും, അതിന്റെ റിപ്പോർട്ട് പരസ്യമാക്കുമെന്ന് ഉറപ്പ് നൽകിയതും. ലിബറൽ പാർട്ടി ഉൾപ്പെട്ട പഴയ അഴിമതി ആരോപണങ്ങളെക്കുറിച്ച് ഓർമ്മിപ്പിച്ചുകൊണ്ട് മറ്റ് രാഷ്ട്രീയ എതിരാളികൾ ഈ പുതിയ സംഭവവികാസത്തെ വിമർശിച്ചിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Anti-corruption squad launches investigation into Quebec Liberal Party
