ഇന്ത്യയിൽ ഉത്പാദനം, കാനഡ വഴി വിതരണം; അമേരിക്കൻ പ്രമേഹരോഗികൾക്ക് ഇനി കുറഞ്ഞ ചിലവിൽ ചികിത്സ

ഒന്റാറിയോ: പ്രമേഹ ചികിത്സയ്ക്ക് ഉപയോഗിക്കുന്ന ‘ഒസെംപിക്’ (Ozempic), ഇന്ത്യയിൽ നിന്നും അമേരിക്കയിലെ രോഗികൾക്ക് കുറഞ്ഞ വിലയ്ക്ക് നൽകാൻ തീരുമാനിച്ച് കനേഡിയൻ ഓൺലൈൻ ഫാർമസി പ്ലാറ്റ്‌ഫോമായ SaveRxCanada.to. അമേരിക്കയിൽ ഈ മരുന്നിന് വലിയ വില നൽകേണ്ടി വരുന്ന സാഹചര്യത്തിലാണ് ഇന്ത്യയിൽ നിന്നുള്ള മരുന്ന് ലഭ്യമാക്കാൻ കമ്പനി മുന്നോട്ടുവന്നത്.

ഇന്ത്യയിൽ നിന്നുള്ള ഒസെംപിക് ഇൻജക്ഷനുകൾക്ക് പെൻ ഒന്നിന് ഏകദേശം 280 ഡോളർ മുതലായിരിക്കും വിലയെന്ന് കമ്പനി അറിയിച്ചു. നിലവിൽ യുഎസിലെ റീട്ടെയിൽ ഫാർമസികളിൽ ഇതേ മരുന്നിന് 900 ഡോളർ മുതൽ 1,100 ഡോളർ വരെയാണ് വില ഈടാക്കുന്നത്. ഡോസുകളിലെ വ്യത്യാസവും പ്രദേശവും അനുസരിച്ച് വിലയിൽ മാറ്റം വരാമെങ്കിലും, ഇന്ത്യയിൽ നിന്നുള്ള മരുന്നുകൾക്ക് യുഎസിനേക്കാൾ നാലിലൊന്ന് വില മാത്രമേ വരുന്നുള്ളൂ എന്നത് ശ്രദ്ധേയമാണ്.

ഓൺലൈൻ വഴി സുരക്ഷിതമായി മരുന്നുകൾ വാങ്ങുന്നതിനെക്കുറിച്ച് എഫ്ഡിഎയുടെ (FDA) നിർദ്ദേശങ്ങൾ പാലിക്കണമെന്ന് യുഎസ് ആരോഗ്യ-മാനവ സേവന വകുപ്പ് ഉപഭോക്താക്കൾക്ക് മുന്നറിയിപ്പ് നൽകി. മരുന്നുകൾ എപ്രകാരമാണ് ഇന്ത്യയിൽ നിന്ന് ശേഖരിക്കുന്നത് എന്നതിനെക്കുറിച്ച് കൂടുതൽ വിവരങ്ങൾ ലഭ്യമാക്കാൻ ഫാർമസി പ്ലാറ്റ്‌ഫോം ഇതുവരെ തയ്യാറായിട്ടില്ല.

0.25 mg, 0.5 mg, 1 mg എന്നീ അളവുകളിലുള്ള പ്രീ-ഫിൽഡ് പെനുകളാണ് പ്ലാറ്റ്‌ഫോം വഴി വിതരണം ചെയ്യുന്നത്. മരുന്നിന്റെ ഉത്ഭവ രാജ്യം, നിർമ്മാതാവ് എന്നിവയെക്കുറിച്ചുള്ള കൃത്യമായ വിവരങ്ങൾ പാക്കേജിംഗിൽ രേഖപ്പെടുത്തിയിട്ടുണ്ടെന്ന് കമ്പനി വ്യക്തമാക്കി. ഡോക്ടറുടെ സാധുവായ നിർദ്ദേശപത്രം (Prescription) ഉണ്ടെങ്കിൽ മാത്രമേ മരുന്നുകൾ ഓർഡർ ചെയ്യാൻ സാധിക്കൂ. നിലവിൽ സൗജന്യ ഷിപ്പിംഗ് സൗകര്യവും കമ്പനി വാഗ്ദാനം ചെയ്യുന്നുണ്ട്.

അമേരിക്കയിൽ മരുന്നുകളുടെ വില ക്രമാതീതമായി വർധിക്കുന്ന സാഹചര്യത്തിൽ പല രോഗികളും അന്താരാഷ്ട്ര വിപണികളെയാണ് ഇപ്പോൾ ആശ്രയിക്കുന്നത്. ഇതിന്റെ ഭാഗമായാണ് വിവിധ രാജ്യങ്ങളിലെ വിലകൾ താരതമ്യം ചെയ്ത് കുറഞ്ഞ നിരക്കിൽ മരുന്നുകൾ എത്തിക്കാൻ രോഗികൾ താൽപ്പര്യം കാണിക്കുന്നത്. അന്തർദേശീയ പ്രിസ്ക്രിപ്ഷൻ റഫറൽ സേവനമെന്നാണ് കമ്പനി തങ്ങളെ വിശേഷിപ്പിക്കുന്നത്.

കഴിഞ്ഞ 24 വർഷമായി യുഎസിന് പുറത്തുള്ള ലൈസൻസുള്ള ഫാർമസികളുമായി രോഗികളെ ബന്ധിപ്പിച്ചു പ്രവർത്തിക്കുന്ന സ്ഥാപനമാണ് SaveRxCanada.to. അമേരിക്കയിൽ മരുന്നുകൾക്കായി വ്യക്തികൾ നടത്തുന്ന വലിയ തോതിലുള്ള ചെലവ് കുറയ്ക്കാൻ ഇത്തരത്തിലുള്ള അന്താരാഷ്ട്ര ഫാർമസി സേവനങ്ങൾ സഹായിക്കുമെന്നാണ് വിപണിയിലെ വിലയിരുത്തൽ.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Manufactured in India, distributed through Canada; American diabetics will now get treatment at a lower cost