കമാൻഡുകൾക്ക് വിട; അലക്‌സ ഇനി നമ്മുടെ ആളായി! കാനഡക്കാർക്കായി പുതിയ ‘Alexa+’ എത്തി

കാനഡയിലെ സാങ്കേതികവിദ്യാ പ്രേമികൾക്ക് സന്തോഷ വാർത്തയുമായി ആമസോൺ എത്തിയിരിക്കുന്നു. യുഎസിന് പുറത്ത് ആദ്യമായി തങ്ങളുടെ അടുത്ത തലമുറ ഡിജിറ്റൽ അസിസ്റ്റന്റായ ‘Alexa+’ (അലക്‌സ പ്ലസ്) കാനേഡിയൻ വിപണിയിൽ അവതരിപ്പിച്ചതോടെ, സ്മാർട്ട് ഹോം അനുഭവങ്ങൾക്ക് ഒരു പുതിയ മാനം കൈവന്നിരിക്കുകയാണ്. ആമസോൺ കസ്റ്റം-ബിൽറ്റ് എഐ മോഡലുകളുടെ ശക്തിയിൽ പ്രവർത്തിക്കുന്ന ഈ അസിസ്റ്റന്റ്, യന്ത്രങ്ങളോടുള്ള നമ്മുടെ സംഭാഷണ രീതിയെ തന്നെ മാറ്റിമറിക്കാൻ പോവുകയാണ്.

പഴയ അലക്‌സയുമായുള്ള സംഭാഷണങ്ങളിൽ കൃത്യമായ കമാൻഡുകൾ ആവശ്യമായിരുന്നെങ്കിൽ, ‘Alexa+’ ഈ രീതി പൂർണ്ണമായും മാറ്റുന്നു. ഒരു ഉറ്റ ചങ്ങാതിയുമായി സംസാരിക്കുന്നതുപോലെ അനായാസമായി നിങ്ങൾക്ക് ഇനി സംവദിക്കാം. സാധാരണ സംഭാഷണ രീതികൾ, സങ്കീർണ്ണമായ ചോദ്യങ്ങൾ, സൂചനകൾ, എന്നിവയെല്ലാം മനസ്സിലാക്കാൻ ഈ പുതിയ പതിപ്പിന് കഴിയും.

“എനിക്ക് തണുക്കുന്നു” എന്ന് പറഞ്ഞാൽ ഉടൻ തന്നെ റൂമിലെ ചൂട് കൂട്ടാനും, “ഇരുട്ടായി” എന്ന് പറഞ്ഞാൽ ലൈറ്റ് ഓൺ ചെയ്യാനും ഇതിന് സാധിക്കും. നിങ്ങൾ എന്താണ് ഉദ്ദേശിക്കുന്നത് എന്ന് മനസ്സിലാക്കി, അതിനനുസരിച്ചുള്ള പ്രതികരണം നൽകാൻ ഈ ജനറേറ്റീവ് എഐയ്ക്ക് കഴിയുന്നു എന്നതാണ് ഏറ്റവും വലിയ പ്രത്യേകത.

കാനേഡിയൻ ഉപയോക്താക്കൾക്കായി പ്രത്യേകമായി പ്രാദേശികവൽക്കരിച്ചാണ് ‘Alexa+’ എത്തിയിരിക്കുന്നത്. കാനഡൻ സംസാരശൈലികളും, പ്രാദേശിക ഭാഷാ പ്രയോഗങ്ങളും തിരിച്ചറിയാനും, അവിടുത്തെ കായിക ടീമുകളെയും (Blue Jays, Roughriders പോലുള്ളവ) സംഗീതത്തെയും കുറിച്ചുള്ള വിവരങ്ങൾ നൽകാനും ഇതിന് പ്രത്യേക കഴിവുണ്ട്. ഓരോ ഉപയോക്താവിന്റെയും ഇഷ്ട്ടങ്ങൾ, പതിവുകൾ, മുൻഗണനകൾ എന്നിവ മനസ്സിലാക്കി വ്യക്തിഗതമാക്കിയ സഹായം നൽകാനും പുതിയ അലക്‌സയ്ക്ക് സാധിക്കും. ഒരുപാട് തിരക്കുള്ള ഒരാൾക്ക് ധ്യാനം ചെയ്യാനുള്ള നിർദ്ദേശം നൽകുന്നതു മുതൽ, ഭക്ഷണ ക്രമീകരണങ്ങൾ ഓർമ്മിപ്പിക്കുന്നത് വരെ അലക്‌സ പ്ലസ് ചെയ്യും.

നിലവിലെ Echo (എക്കോ) ഉപകരണങ്ങളിലും പുതിയ ‘Alexa+’ പ്രവർത്തിക്കുമെങ്കിലും, ഇതിനായി രൂപകൽപ്പന ചെയ്ത പുതിയ എക്കോ ഉപകരണങ്ങൾ മികച്ച അനുഭവം നൽകും. ഈ AI അസിസ്റ്റന്റ് ഇപ്പോൾ Early Access ഘട്ടത്തിൽ സൗജന്യമായി ലഭ്യമാണ്. ഈ ഘട്ടം കഴിഞ്ഞാൽ, ആമസോൺ പ്രൈം അംഗങ്ങൾക്ക് ഇത് പൂർണ്ണമായും സൗജന്യമായി ലഭിക്കുന്ന ഒരു പുതിയ ആനുകൂല്യമായി മാറും. പ്രൈം ഇല്ലാത്തവർക്ക് പ്രതിമാസം $27.99 കനേഡിയൻ ഡോളർ നൽകേണ്ടി വരും. സ്വകാര്യതയ്ക്കും ഡാറ്റാ സുരക്ഷയ്ക്കും ഊന്നൽ നൽകിക്കൊണ്ടാണ് ‘Alexa+’ രൂപകൽപ്പന ചെയ്തിരിക്കുന്നത് എന്നും ആമസോൺ വ്യക്തമാക്കുന്നു.

amazon-alexa-plus-launch-canada-prime-members-ai


കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt