പ്രത്യേക അനുമതി ഇനി ആവശ്യമില്ല; മദ്യവിൽപ്പന സമയത്തിൽ ഇളവുമായി ആൽബർട്ട സർക്കാർ

എഡ്മന്റൺ: ഫിഫ ലോകകപ്പ് ഉൾപ്പെടെയുള്ള പ്രധാന കായിക-സാംസ്കാരിക ആഘോഷങ്ങൾ മുന്നിൽക്കണ്ട് പ്രവിശ്യയിലെ മദ്യവിൽപ്പന സമയത്തിൽ ഇളവുകൾ വരുത്തി ആൽബർട്ട സർക്കാർ. അന്താരാഷ്ട്ര മത്സരങ്ങളും ആഘോഷങ്ങളും നടക്കുന്ന വേളകളിൽ സാധാരണ സമയത്തിന് മുൻപായി മദ്യസേവനം ആരംഭിക്കാൻ ബിസിനസ് സ്ഥാപനങ്ങൾ ഇനി പ്രത്യേക അനുമതി വാങ്ങേണ്ടതില്ല. പുതിയ നിയമപ്രകാരം ആൽബർട്ടയിലെ ലൈസൻസുള്ള റെസ്റ്റോറന്റുകൾ, ബാറുകൾ, സ്വകാര്യ ക്ലബ്ബുകൾ എന്നിവയ്ക്ക് ഇനിമുതൽ രാവിലെ 6 മണി മുതൽ മദ്യവിൽപ്പനയും സേവനവും ആരംഭിക്കാൻ സാധിക്കും. അന്താരാഷ്ട്ര മത്സരങ്ങൾ കാണാൻ പുലർച്ചെ തന്നെ ആളുകൾ ഒത്തുകൂടുന്ന സാഹചര്യത്തിലാണ് ബിസിനസ് ഉടമകൾക്ക് സഹായകരമാകുന്ന ഈ തീരുമാനം അധികൃതർ കൈക്കൊണ്ടിട്ടുള്ളത്.

ആൽബർട്ട ഗെയിമിംഗ്, ലിക്കർ ആൻഡ് കാനബിസ് (AGLC) നിയന്ത്രണത്തിലുള്ള ക്ലാസ് A, B, C, F ലൈസൻസുകൾ ഉള്ള സ്ഥാപനങ്ങൾക്കാണ് പുതിയ ഇളവിന്റെ ആനുകൂല്യം ലഭിക്കുക. എന്നാൽ സ്ഥാപനങ്ങൾ അടയ്ക്കേണ്ട സമയത്തിൽ മാറ്റമില്ലാതെ രാവിലെ 3 മണിയായി തന്നെ തുടരും. അവസാന മദ്യ ഓർഡർ സ്വീകരിക്കേണ്ടത് സ്ഥാപനം അടയ്ക്കുന്നതിന് ഒരു മണിക്കൂർ മുൻപായിരിക്കണമെന്ന നിലവിലെ നിബന്ധനയും കർശനമായി പാലിക്കേണ്ടതുണ്ട്. മുൻപ് രാവിലെ 9 മണിക്ക് മുൻപ് മദ്യവിൽപ്പന നടത്താൻ ആഗ്രഹിക്കുന്ന സ്ഥാപനങ്ങൾ ഓരോ പ്രത്യേക പരിപാടിക്കും പ്രത്യേകം അപേക്ഷ നൽകി അനുമതി നേടേണ്ടതുണ്ടായിരുന്നു. മുൻകാലങ്ങളിൽ ശീതകാല ഒളിമ്പിക്സ് ഉൾപ്പെടെയുള്ള വലിയ കായിക മേളകളുടെ സമയത്ത് ഇത്തരത്തിൽ പ്രത്യേകം സമയമാറ്റ അറിയിപ്പും അനുമതിയും വാങ്ങുന്നത് നിർബന്ധമായിരുന്നു.

പ്രധാന കായികമത്സരങ്ങൾ, പ്രത്യേക ആഘോഷങ്ങൾ എന്നിവ നടക്കുന്ന സാഹചര്യങ്ങളിലും പുലർച്ചെയുണ്ടാകുന്ന വലിയ ജനത്തിരക്ക് കൈകാര്യം ചെയ്യുന്നതിനും ബിസിനസ് ഉടമകൾക്ക് കൂടുതൽ പ്രവർത്തന സ്വാതന്ത്ര്യം നൽകാനാണ് ഈ മാറ്റമെന്ന് റെഡ് ടേപ്പ് റഡക്ഷൻ മന്ത്രി ഡെയ്ൽ നാലി വാർത്താക്കുറിപ്പിൽ അറിയിച്ചു. 2026-ൽ നടക്കുന്ന ഫിഫ ലോകകപ്പ് പോലുള്ള അന്താരാഷ്ട്ര കായികമേളകൾക്കിടെ, ലോകത്തിന്റെ വിവിധ ഭാഗങ്ങളിലെ സമയവ്യത്യാസം കാരണം പുലർച്ചെ തന്നെ മത്സരങ്ങൾ തത്സമയം കാണാൻ കായിക പ്രേമികൾ ബാറുകളിലും റെസ്റ്റോറന്റുകളിലും ഒത്തുകൂടാറുണ്ട്. പുതിയ സർക്കാർ തീരുമാനം ഇത്തരം സ്ഥാപനങ്ങൾക്ക് വലിയ രീതിയിൽ ബിസിനസ് മെച്ചപ്പെടുത്താനും ജനങ്ങൾക്ക് കൂടുതൽ സൗകര്യപ്രദമായി മത്സരങ്ങൾ ആസ്വദിക്കാനും വഴിയൊരുക്കുമെന്നാണ് വിലയിരുത്തപ്പെടുന്നത്.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Special permits no longer required; Alberta government relaxes alcohol sales hours