ടൊറന്റോ: ആഗോള വിപണിയിൽ വിമാന ഇന്ധനത്തിന് (Jet Fuel) വില കുതിച്ചുയരുന്ന പശ്ചാത്തലത്തിൽ, ഈ വേനൽക്കാലത്തെ നാല് പ്രധാന സീസണൽ സർവീസുകൾ എയർ കാനഡ നേരത്തെ അവസാനിപ്പിക്കുന്നു. ഇറാൻ യുദ്ധം ആരംഭിച്ചതിന് പിന്നാലെ ഇന്ധനവില ഇരട്ടിയിലധികം വർധിച്ചതാണ് വിമാനക്കമ്പനികളെ കടുത്ത തീരുമാനങ്ങളിലേക്ക് നയിച്ചിരിക്കുന്നത്. ടൊറന്റോ, വാൻകൂവർ, മോൺട്രിയൽ എന്നിവിടങ്ങളിൽ നിന്നുള്ള സർവീസുകളെയാണ് ഇത് പ്രധാനമായും ബാധിക്കുക.
നിലവിലെ തീരുമാനമനുസരിച്ച് ടൊറന്റോ – സാക്രമെന്റോ, വാൻകൂവർ – റാലി, ടൊറന്റോ – ചാർൽസ്റ്റൺ, മോൺട്രിയൽ – ഓസ്റ്റിൻ എന്നീ റൂട്ടുകളിലെ സർവീസുകളാണ് നിശ്ചയിച്ചതിലും നേരത്തെ നിർത്തലാക്കുന്നത്. ടൊറന്റോയിൽ നിന്ന് സാക്രമെന്റോയിലേക്കുള്ള അവസാന വിമാനം ഓഗസ്റ്റ് ഒന്നിന് സർവീസ് നടത്തും. വാൻകൂവർ – റാലി സർവീസ് ജൂലൈ 29-ഓടെയും അവസാനിക്കും. ടൊറന്റോ – ചാർൽസ്റ്റൺ (സെപ്റ്റംബർ 6), മോൺട്രിയൽ – ഓസ്റ്റിൻ (സെപ്റ്റംബർ 7) എന്നിവയാണ് സർവീസ് അവസാനിപ്പിക്കുന്ന മറ്റ് റൂട്ടുകൾ. 2027 വേനൽക്കാലത്തോടെ മാത്രമേ ഈ റൂട്ടുകളിൽ പൂർണ്ണതോതിലുള്ള സർവീസുകൾ പുനഃരാരംഭിക്കാൻ സാധ്യതയുള്ളൂ എന്ന് എയർ കാനഡ വക്താവ് വ്യക്തമാക്കി.
വിമാനങ്ങൾ റദ്ദാക്കുന്ന സാഹചര്യത്തിൽ ടിക്കറ്റ് ബുക്ക് ചെയ്ത യാത്രക്കാർക്ക് ബദൽ യാത്രാ സൗകര്യങ്ങൾ ഉറപ്പാക്കുമെന്ന് എയർ കാനഡ അറിയിച്ചിട്ടുണ്ട്. ഇതിന് താല്പര്യമില്ലാത്തവർക്ക് ടിക്കറ്റ് തുക പൂർണ്ണമായും റീഫണ്ട് (Full Refund) നൽകുമെന്നും കമ്പനി പ്രസ്താവനയിൽ വ്യക്തമാക്കി. നേരത്തെ, ജൂൺ ഒന്നു മുതൽ ഒക്ടോബർ 25 വരെയുള്ള കാലയളവിൽ ടൊറന്റോ, മോൺട്രിയൽ എന്നിവിടങ്ങളിൽ നിന്ന് ന്യൂയോർക്കിലെ ജെ.എഫ്.കെ വിമാനത്താവളത്തിലേക്കുള്ള സർവീസുകളും എയർ കാനഡ സസ്പെൻഡ് ചെയ്തിരുന്നു. ഇന്ധനവിലയിലെ അസ്ഥിരത തുടരുന്നത് വരും മാസങ്ങളിലും വിമാന യാത്രയെ ബാധിക്കുമെന്ന ആശങ്ക ശക്തമാണ്.
എയർ കാനഡയ്ക്ക് പുറമെ കാനഡയിലെ മറ്റൊരു പ്രമുഖ വിമാനക്കമ്പനിയായ വെസ്റ്റ് ജെറ്റും (WestJet) പ്രവർത്തനക്ഷമത നിലനിർത്താൻ സമാനമായ നടപടികളിലേക്ക് നീങ്ങുകയാണ്. മെയ് മാസത്തിൽ മൂന്ന് ശതമാനവും ജൂണിൽ ആറ് ശതമാനവും സർവീസുകൾ വെട്ടിക്കുറയ്ക്കാനാണ് വെസ്റ്റ് ജെറ്റിന്റെ തീരുമാനം. നിലവിലെ വേനൽക്കാല ഷെഡ്യൂൾ കമ്പനി പുനഃപരിശോധിച്ചു വരികയാണ്. ഇന്ധനച്ചെലവ് ക്രമാതീതമായി വർധിക്കുന്നത് വിമാന ടിക്കറ്റ് നിരക്കുകൾ ഉയരാനും സർവീസുകൾ കൂട്ടത്തോടെ റദ്ദാക്കാനും വരും ദിവസങ്ങളിൽ കാരണമായേക്കാം.
Airlines hit by fuel price hike; Air Canada cancels more flights; routes affected
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
