ബെർലിൻ: ഒരു രാജ്യത്ത് മന്ത്രിയായി മനുഷ്യനല്ലാത്ത ഒരംഗം ചുമതലയേറ്റെന്ന വാർത്ത ലോകത്തെ അത്ഭുതപ്പെടുത്തിയിട്ട് അധികമായിട്ടില്ല. അൽബേനിയൻ മന്ത്രിസഭയിലെ ഏക AI മന്ത്രിയായ ‘ഡിയേല’ക്ക് ഇപ്പോൾ ‘വിശേഷമുണ്ട്’ എന്ന വിചിത്രമായ പ്രഖ്യാപനവുമായി രംഗത്തെത്തിയിരിക്കുകയാണ് പ്രധാനമന്ത്രി എഡി റാമ. ഡിയേല ഗർഭിണിയാണെന്നും, പാർലമെന്റിലെ 83 അംഗങ്ങൾക്ക് സഹായികളായി ’83 കുട്ടികളെ’ സൃഷ്ടിക്കാൻ പദ്ധതിയിടുന്നതായും അദ്ദേഹം വെളിപ്പെടുത്തി.
ബെർലിനിൽ നടന്ന ഗ്ലോബൽ ഡയലോഗിൽ സംസാരിക്കവെയാണ് എഡി റാമ ഈ കൗതുകകരമായ പ്രഖ്യാപനം നടത്തിയത്. സോഷ്യലിസ്റ്റ് പാർട്ടി പാർലമെന്റിലെ ഓരോ അംഗത്തിനും ഒരു പേഴ്സണൽ അസിസ്റ്റന്റ് എന്ന നിലയിലായിരിക്കും ഈ ‘AI കുട്ടികൾ’ എത്തുക. 2026 അവസാനത്തോടെ ഈ AI അസിസ്റ്റന്റുകൾ എത്തുമെന്നാണ് പ്രതീക്ഷിക്കുന്നത്. ഈ കുട്ടികൾക്കെല്ലാം അവരുടെ ‘അമ്മയുടെ (ഡിയേലയുടെ) അറിവുണ്ടാകും’ എന്നും പ്രധാനമന്ത്രി വ്യക്തമാക്കി.
ഈ എഐ കുട്ടികളുടെ പ്രവർത്തനം എങ്ങനെയായിരിക്കുമെന്നും എഡി റാമ വിശദീകരിച്ചു. “ഉദാഹരണത്തിന്, നിങ്ങൾ കാപ്പി കുടിക്കാൻ പോയി തിരികെ ജോലിക്ക് എത്തുമ്പോൾ, ആ സമയത്ത് സെഷനിൽ നടന്ന കാര്യങ്ങൾ ഈ കുട്ടി നിങ്ങളെ അറിയിക്കും. നിങ്ങൾ ആരെയാണ് വിമർശിക്കേണ്ടതെന്നും അവർ പറഞ്ഞു തരും,” അദ്ദേഹം കൂട്ടിച്ചേർത്തു. പാർലമെന്റ് സെഷനുകളിൽ പങ്കെടുക്കുകയും അവിടെ നടക്കുന്ന എല്ലാ കാര്യങ്ങളും രേഖപ്പെടുത്തി അംഗങ്ങൾക്ക് നിർദ്ദേശങ്ങൾ നൽകുകയും ചെയ്യുക എന്നതാണ് ഇവരുടെ പ്രധാന ചുമതല.
പൊതു സംഭരണ സംവിധാനം പൂർണ്ണമായും സുതാര്യവും അഴിമതി രഹിതവുമാക്കാൻ ലക്ഷ്യമിട്ടാണ് ‘സൂര്യൻ’ എന്ന് അർത്ഥം വരുന്ന ഡിയേലയെ കഴിഞ്ഞ സെപ്റ്റംബറിൽ അൽബേനിയൻ സർക്കാർ മന്ത്രിയായി അവതരിപ്പിച്ചത്. സർക്കാർ സ്വകാര്യ കമ്പനികൾക്ക് നൽകുന്ന ടെൻഡറുകൾ, ചെലവുകൾ, കമ്പനികളുടെ യോഗ്യത എന്നിവയെല്ലാം ഡിയേലയാണ് പരിശോധിക്കുന്നത്. ഈ എഐ മന്ത്രിക്ക് ശമ്പളമോ സുരക്ഷാ അകമ്പടിയോ ആവശ്യമില്ലെന്നത് സർക്കാരിന് വലിയ ലാഭമാണ്. പുതിയ AI കുട്ടികളുടെ വരവോടെ അൽബേനിയൻ ഭരണ സംവിധാനം കൂടുതൽ കാര്യക്ഷമമാകുമെന്നാണ് പ്രതീക്ഷ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
AI Minister pregnant, children 83′: Albanian Prime Minister’s bizarre announcement draws world attention
