ചെന്നൈ: കുടുംബജീവിതത്തിലെ പ്രതിസന്ധികളും സൈബർ ആക്രമണങ്ങളും അതിരുകടന്ന സാഹചര്യത്തിൽ, ഔദ്യോഗികമായി വിവാഹമോചനം ലഭിക്കുന്നത് വരെ സിനിമകളിൽ നിന്ന് വിട്ടുനിൽക്കാൻ പ്രമുഖ ചലച്ചിത്ര താരം രവി മോഹൻ. ചെന്നൈയിൽ വിളിച്ചുചേർത്ത വാർത്താസമ്മേളനത്തിലാണ് തന്റെ വ്യക്തിജീവിതവുമായി ബന്ധപ്പെട്ട വിവാദങ്ങളിൽ നടൻ നിലപാട് വ്യക്തമാക്കിയത്. വർഷങ്ങളായി തുടരുന്ന മാനസിക ബുദ്ധിമുട്ടുകൾക്കൊടുവിലാണ് താൻ വീടുവിട്ടിറങ്ങിയതെന്നും നിലവിൽ വാടകവീട്ടിലാണ് താമസിക്കുന്നതെന്നും താരം വെളിപ്പെടുത്തി.
തമിഴ് സിനിമയിൽ 23 വർഷത്തെ പ്രവർത്തന പരിചയമുള്ള തനിക്ക് നേരെ കഴിഞ്ഞ കുറച്ച് ദിവസങ്ങളായി അതിരൂക്ഷമായ സൈബർ ആക്രമണം നടക്കുകയാണെന്ന് രവി മോഹൻ പറഞ്ഞു. സുഹൃത്തും ഗായികയുമായ കെനിഷ ഫ്രാൻസിസിനെയും ഭാര്യ ആരതി രവിയെയും കേന്ദ്രീകരിച്ച് സോഷ്യൽ മീഡിയയിൽ ഉയർന്ന വിവാദങ്ങളാണ് വാർത്താസമ്മേളനത്തിലേക്ക് നയിച്ചത്. പാലക്കാട് നടന്ന ഒരു പരിപാടിയിൽ കെനിഷയോടൊപ്പം പങ്കെടുത്തതിനെച്ചൊല്ലി വലിയ രീതിയിലുള്ള പ്രചാരണങ്ങൾ നടന്നിരുന്നു. തുടർന്നുണ്ടായ സൈബർ അധിക്ഷേപങ്ങൾക്കൊടുവിൽ കെനിഷ സോഷ്യൽ മീഡിയയിൽ നിന്ന് പിൻവാങ്ങുന്നതായി അറിയിച്ചിരുന്നു.
വാർത്താസമ്മേളനത്തിൽ അതീവ വികാരാധീനനായാണ് നടൻ സംസാരിച്ചത്. സെലിബ്രിറ്റി പദവിയും പേരും പ്രശസ്തിയും പരിഗണിച്ച് ദാമ്പത്യജീവിതത്തിലെ പല ബുദ്ധിമുട്ടുകളും കഴിഞ്ഞ രണ്ട് വർഷമായി സഹിച്ചുവെന്നാണ് അദ്ദേഹം പറഞ്ഞത്. വീട്ടിൽ നിന്ന് ഇറങ്ങിപ്പോകാൻ ആവശ്യപ്പെട്ടതിനെ തുടർന്ന് പണമൊന്നുമില്ലാതെയാണ് താൻ പുറത്തുപോയതെന്നും താരം കൂട്ടിച്ചേർത്തു. താൻ അനുഭവിച്ച കാര്യങ്ങൾക്കെല്ലാം കൃത്യമായ തെളിവുകളുണ്ടെന്നും അവ വരും ദിവസങ്ങളിൽ പുറത്തുവിടുമെന്നും അദ്ദേഹം വ്യക്തമാക്കി.
മക്കളെ കാണാനോ ഫോണിൽ സംസാരിക്കാനോ നിലവിൽ അനുവദിക്കുന്നില്ലെന്ന ഗുരുതര ആരോപണവും രവി മോഹൻ ഉന്നയിച്ചു. കുട്ടികളുടെ സ്കൂൾ ഫീസായി 50 ലക്ഷം രൂപ നൽകുന്നത് താനാണെന്നും, എന്നാൽ ഇപ്പോൾ അവരെ ബോഡിഗാർഡുകളുടെ സംരക്ഷണത്തിലാണ് സ്കൂളിലേക്ക് അയക്കുന്നതെന്നും അദ്ദേഹം പറഞ്ഞു. സ്ത്രീകളെ ബഹുമാനിക്കാൻ അറിയാത്തയാളെന്ന രീതിയിലുള്ള പ്രചാരണങ്ങൾ തെറ്റാണെന്നും, 14 വർഷത്തെ ദാമ്പത്യജീവിതത്തിനിടെ നടന്ന യാഥാർത്ഥ്യങ്ങൾ ഉടൻ പുറത്തുവരുമെന്നും താരം പറഞ്ഞു. തന്റെ ജീവിതം തകർക്കാൻ ഒരു സംഘം പ്രവർത്തിച്ചതായും അദ്ദേഹം ആരോപിച്ചു. വിവാദങ്ങൾക്കും സൈബർ ആക്രമണങ്ങൾക്കും പൂർണ്ണ വിരാമമാകുന്നതുവരെ പുതിയ സിനിമകളിൽ അഭിനയിക്കില്ലെന്ന ഉറച്ച തീരുമാനത്തിലാണ് താരം.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'I endured everything out of fear of losing my image, but I can't anymore': Actor Ravi Mohan explodes at press conference
