ഇന്ന് ഓഗസ്റ്റ് 16-ന് ക്യുബെക്കിന്റെ വടക്കൻ മേഖലയിലെ ഒരു വിദൂര സ്ഥലത്ത് നിന്ന് കനേഡിയൻ സർവകലാശാല വിദ്യാർത്ഥികൾ നിർമ്മിച്ച റോക്കറ്റ് വിജയകരമായി വിക്ഷേപിച്ചു. 25 വർഷത്തിനു ശേഷം ആദ്യമായാണ് കാനഡയിൽ ഇങ്ങനെയൊരു ബഹിരാകാശ ദൗത്യം നടക്കുന്നത്. കൺകോർഡിയ സർവകലാശാലയിലെ സ്പേസ് കൺകോർഡിയ റോക്കറ്ററി ഡിവിഷനും പ്രാദേശിക ക്രീ കമ്മ്യൂണിറ്റിയുമായി സഹകരിച്ചാണ് ഈ പദ്ധതി പൂർത്തിയാക്കിയത്. ബഹിരാകാശ പര്യവേക്ഷണത്തിൽ തദ്ദേശീയ പങ്കാളിത്തം എത്രത്തോളം വലുതാണെന്ന് ഈ ദൗത്യം അടിവരയിടുന്നു.
ഏകദേശം ഏഴ് വർഷത്തെ കഠിനാധ്വാനത്തിന്റെ ഫലമാണ് ഈ റോക്കറ്റ്. ഏകദേശം 13 മീറ്റർ നീളമുള്ള ദ്രാവക ഇന്ധന റോക്കറ്റാണ് സ്റ്റാർസെയിലർ. വെള്ളിയാഴ്ച പുലർച്ചെ 5:30-നാണ് റോക്കറ്റ് വിക്ഷേപിച്ചത്. എന്നാൽ വിക്ഷേപണം ആസൂത്രണം ചെയ്തതുപോലെ കൃത്യമായിരുന്നില്ല. റോക്കറ്റ് പറന്നുയർന്ന ഉടൻ തന്നെ കഷണങ്ങളായി വേർപെട്ട് പോയതിനാൽ ബഹിരാകാശത്ത് എത്താൻ സാധിച്ചില്ല. റോക്കറ്റ് ബഹിരാകാശത്തേക്ക് വിക്ഷേപിക്കുകയും പാരാച്യൂട്ട് ഉപയോഗിച്ച് ഭൂമിയിലേക്ക് തിരിച്ച് ഇറക്കി വീണ്ടെടുക്കുക എന്നതുമായിരുന്നു വിദ്യാർത്ഥികളുടെ ലക്ഷ്യം.
നിർഭാഗ്യകരമായ ഈ സംഭവം ഉണ്ടായിട്ടും, തങ്ങളുടെ ദൗത്യം ഒരു വിജയമായിരുന്നുവെന്ന് വിദ്യാർത്ഥികൾ പറഞ്ഞു. “ഞങ്ങൾ വിക്ഷേപണ ഗോപുരം ലക്ഷ്യമാക്കി റോക്കറ്റ് പറത്തി. സുരക്ഷിതമായി സ്ഥിരമായ ഒരു പാതയിൽ യാത്ര തുടങ്ങി, ഞങ്ങളുടെ ടെലിമെട്രി സാധാരണ നിലയിൽ പ്രവർത്തിച്ചു,” സ്പേസ് കൺകോർഡിയ ഗ്രൂപ്പിന്റെ പ്രസിഡന്റ് സൈമൺ റാൻഡി പറഞ്ഞു. ഈ ദൗത്യത്തിൽ നിന്ന് വളരെയധികം കാര്യങ്ങൾ പഠിക്കാൻ സാധിച്ചുവെന്നും അദ്ദേഹം കൂട്ടിച്ചേർത്തു. കഴിഞ്ഞ 25 വർഷത്തിനിടയിൽ കനേഡിയൻ മണ്ണിൽ നിന്ന് ബഹിരാകാശത്തേക്ക് ശ്രമിച്ച ആദ്യത്തെ ദൗത്യമായിരുന്നു ഇത്. അതുപോലെ തന്നെ വിദ്യാർത്ഥികൾ നിർമ്മിച്ചതിൽ വെച്ച് ഏറ്റവും വലിയ റോക്കറ്റും സ്റ്റാർസെയിലർ ആണെന്ന് റാൻഡി കൂട്ടിച്ചേർത്തു.
A dream that took off from northern Quebec; Columbia University's StarSailor rocket successfully launched
