ഫ്രാൻസിസ് മാർപാപ്പയുടെ സംസ്കാരച്ചടങ്ങിൽ കാനഡയെ പ്രതിനിധീകരിച്ചുകൊണ്ട് ഗവർണർ ജനറൽ മേരി സൈമൺ പങ്കെടുക്കും. അവരോടൊപ്പം ഒരു മുതിർന്ന പ്രതിനിധി സംഘവും ചടങ്ങുകളിൽ പങ്കെടുക്കാനായി വത്തിക്കാനിലേക്ക് പുറപ്പെടും. നിലവിൽ പ്രതിനിധി സംഘത്തിലെ മറ്റുള്ളവരെ അന്തിമമായി തീരുമാനിച്ചിട്ടില്ലെന്ന് പ്രധാനമന്ത്രിയുടെ ഓഫീസ് അറിയിച്ചു. ഏപ്രിൽ 28 തിങ്കളാഴ്ച കാനഡയിൽ വോട്ടെടുപ്പ് നടക്കുന്നതിനാൽ പ്രധാനമന്ത്രി മാർക്ക് കാർണി പ്രചാരണത്തിരക്കിലായതിനാലാണ് മാർപ്പാപ്പയുടെ സംസ്കാര ചടങ്ങിൽ പങ്കെടുക്കാൻ സാധിക്കാത്തതെന്നും പ്രധാനമന്ത്രിയുടെ ഓഫീസ് വ്യക്തമാക്കി.
2022 ജൂലൈ 24 മുതൽ 29 വരെ ഫ്രാൻസിസ് മാർപാപ്പ കാനഡ സന്ദർശിച്ചിരുന്നു. ആൽബെർട്ട , ക്യൂബെക്ക് പ്രവിശ്യകളിലും നുനാവട്ടിന്റെ പ്രദേശത്തുമാണ് അദ്ദേഹം അന്ന് താമസിച്ചത്. കനേഡിയൻ ഇന്ത്യൻ റെസിഡൻഷ്യൽ സ്കൂൾ സംവിധാനത്തിൽ കത്തോലിക്കാ സഭയുടെ പങ്കിന് ക്ഷമാപണം നടത്തുന്നതിലും രാജ്യത്തെ തദ്ദേശീയ ജനങ്ങളുമായുള്ള അനുരഞ്ജനത്തിനുമാണ് ഈ യാത്രയിൽ അദ്ദേഹം പ്രധാനമായും ശ്രദ്ധ കേന്ദ്രീകരിച്ചത്.
