ഓട്ടവ: കാനഡയിൽ നിന്ന് കുറച്ച് മാസത്തേക്ക് മറ്റൊരു രാജ്യത്തേക്ക് മാറാൻ പദ്ധതിയിടുന്നുണ്ടോ? എങ്കിൽ നിങ്ങളുടെ പ്രവിശ്യാ ആരോഗ്യ ഇൻഷുറൻസ് കവറേജ് നിങ്ങളോടൊപ്പം വരില്ലെന്ന കാര്യം ഓർക്കുക. വിദേശത്തേക്ക് പോകുന്ന കനേഡിയൻ പൗരന്മാരെ കാത്തിരിക്കുന്നത് വൻ സാമ്പത്തിക ബാധ്യതകളാണെന്ന് ഫിനാൻഷ്യൽ പ്ലാനിംഗ് വിദഗ്ദ്ധനായ ക്രിസ്റ്റഫർ ലിയു മുന്നറിയിപ്പ് നൽകുന്നു.
കാനഡയിലെ ഓരോ പ്രവിശ്യയ്ക്കും ടെറിട്ടറികൾക്കും സ്വന്തമായ ഹെൽത്ത് പ്ലാനുകളുണ്ട്. ഇവയെല്ലാം നിങ്ങൾ അവിടെ സ്ഥിരമായി താമസിക്കുന്നുണ്ടോ എന്നതിനെ അടിസ്ഥാനമാക്കിയാണ് പ്രവർത്തിക്കുന്നത്. ഓന്റാരിയോ, ആൽബർട്ട, ബി.സി തുടങ്ങിയ പ്രവിശ്യകളിൽ നിശ്ചിത ദിവസങ്ങളിൽ കൂടുതൽ രാജ്യത്തിന് പുറത്ത് കഴിഞ്ഞാൽ സൗജന്യ ആരോഗ്യ പരിരക്ഷ റദ്ദാക്കപ്പെടും. അതിനാൽ യാത്ര പ്ലാൻ ചെയ്യുന്നതിന് മുൻപ് നിങ്ങളുടെ പ്രവിശ്യയുടെ കൃത്യമായ നിയമങ്ങളും ദിവസപരിധിയും പരിശോധിക്കേണ്ടത് അത്യാവശ്യമാണ്.
നിങ്ങൾ സ്ഥിരമായി കാനഡ വിടുകയാണെങ്കിൽ, ബി.സി പോലുള്ള സ്ഥലങ്ങളിൽ നിങ്ങൾ രാജ്യം വിടുന്ന മാസത്തിന്റെ അവസാനത്തോടെ ഹെൽത്ത് കവറേജ് പൂർണ്ണമായും അവസാനിക്കും. കൂടാതെ, ടാക്സ് ആവശ്യങ്ങൾക്കായി നോൺ-റെസിഡന്റ് പദവി നേടാൻ ശ്രമിക്കുന്നവർ പ്രവിശ്യാ ഹെൽത്ത് കാർഡ് ദുരുപയോഗം ചെയ്യുന്നത് നിയമപ്രശ്നങ്ങൾക്കും ടാക്സ് തിരിച്ചടികൾക്കും കാരണമാകും.
വിദേശത്തായിരിക്കുമ്പോൾ സംഭവിക്കുന്ന അടിയന്തര വൈദ്യസഹായങ്ങൾക്ക് കനേഡിയൻ പ്രവിശ്യാ പ്ലാനുകൾ നൽകുന്ന തുക വളരെ തുച്ഛമാണ്. ഉദാഹരണത്തിന്, യു.എസ്സിലെ ആശുപത്രി ചെലവുകൾ പ്രതിദിനം 1,000 ഡോളറിന് മുകളിലായിരിക്കുമ്പോൾ ഓന്റാരിയോയുടെ ഔട്ട്-ഓഫ്-കൺട്രി പ്രോഗ്രാം നൽകുന്നത് വളരെ ചെറിയ തുക മാത്രമാണ്. എയർ ആംബുലൻസ് പോലുള്ള സേവനങ്ങൾ പ്രവിശ്യാ പ്ലാനുകൾ കവർ ചെയ്യില്ല.
ALSO READ: പ്രകൃതിദുരന്തമോ സൈബർ ആക്രമണമോ? 3 ദിവസത്തേക്ക് ഭക്ഷണവും വെള്ളവും കരുതണം; മുന്നറിയിപ്പുമായി കാനഡ
അതുകൊണ്ട്, ഒരു താൽക്കാലിക സന്ദർശനത്തിനാണ് പോകുന്നതെങ്കിൽ നല്ലൊരു ടൂറിസ്റ്റ് മെഡിക്കൽ ഇൻഷുറൻസും, സ്ഥിരമായ മാറ്റമാണെങ്കിൽ ഇന്റർനാഷണൽ പ്രൈവറ്റ് മെഡിക്കൽ ഇൻഷുറൻസും (IPMI) നിർബന്ധമായും എടുക്കണം.
തിരികെ കാനഡയിൽ എത്തുമ്പോഴും കവറേജ് ഉടനടി ലഭിക്കണമെന്നില്ല. പല പ്രവിശ്യകളിലും 3 മാസം വരെ കാത്തിരിപ്പ് കാലാവധി (Waiting Period) ആവശ്യമാണ്. ഈ സമയത്ത് ഉണ്ടാകുന്ന ചികിത്സാ ചെലവുകൾ ഒഴിവാക്കാൻ മുൻകൂട്ടി ഷോർട്ട്-ടേം ഇൻഷുറൻസ് എടുത്ത് തയ്യാറെടുക്കണമെന്ന് വിദഗ്ദ്ധർ ഓർമ്മിപ്പിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
