സസ്കാറ്റൂൺ: രാജ്യത്ത് വീടില്ലാത്തവരുടെ എണ്ണം പൂജ്യമാക്കുക എന്ന ഫെഡറൽ സർക്കാരിന്റെ വലിയ ലക്ഷ്യം കൈവരിക്കാൻ വീടുകൾ മാത്രം നിർമ്മിച്ചാൽ പോരെന്നും മറ്റ് സഹായങ്ങൾ കൂടി നൽകണമെന്നും വിദഗ്ധരും സന്നദ്ധ പ്രവർത്തകരും ചൂണ്ടിക്കാണിക്കുന്നു. സസ്കാറ്റൂൺ നഗരത്തിൽ ശൈത്യകാലത്ത് രാത്രികാല അഭയകേന്ദ്രം നടത്തുന്ന സാൽവേഷൻ ആർമി എന്ന സംഘടനയാണ് ഈ നിർദ്ദേശം മുന്നോട്ടുവെച്ചിരിക്കുന്നത്.
സർക്കാരിന്റെ പുതിയ പദ്ധതിയെ സംഘടനയുടെ വക്താവായ ഡെറക് കെർ സ്വാഗതം ചെയ്തു. രാജ്യത്ത് തെരുവിൽ കഴിയുന്നവരുടെ എണ്ണം ഇല്ലാതാക്കാൻ കഴിയും, എന്നാൽ വ്യക്തിപരമായ പ്രയാസങ്ങൾ പൂർണ്ണമായി ഒഴിവാക്കാനാവില്ലെന്ന് അദ്ദേഹം പറഞ്ഞു. തണുപ്പുകാലത്ത് അഭയകേന്ദ്രങ്ങളിൽ എത്തുന്നവരുടെ എണ്ണം വളരെ കൂടുതലാണ്. താമസസ്ഥലം നൽകുന്നതിനൊപ്പം മാനസിക പിന്തുണയും വരുമാന മാർഗ്ഗങ്ങളും ഉറപ്പാക്കിയാൽ മാത്രമേ ഇവർക്ക് സാധാരണ ജീവിതത്തിലേക്ക് മടങ്ങാൻ കഴിയൂ. ഇതിനായി 100 കോടി ഡോളറിന്റെ (1 ബില്യൺ) പദ്ധതി പ്രഖ്യാപിച്ചിരിക്കുകയാണ് ഫെഡറൽസർക്കാരും മാനിറ്റോബ സർക്കാരും.
കനേഡിയൻ പ്രധാനമന്ത്രി മാർക്ക് കാർണിയും മാനിറ്റോബ പ്രീമിയർ വാബ് കിന്യൂവും ചേർന്നാണ് ഈ സഹകരണം പ്രഖ്യാപിച്ചത്. ഈ തുക ഉപയോഗിച്ച് താൽക്കാലികമായി താമസിക്കാൻ 2,000 വീടുകളും മാനസികാരോഗ്യത്തിനും ലഹരിമുക്തിക്കുമായി പ്രത്യേക കേന്ദ്രവും നിർമ്മിക്കും. എന്നാൽ നേരിടാനുള്ള പ്രശ്നത്തിന്റെ വലിപ്പം വെച്ച് നോക്കുമ്പോൾ പദ്ധതിക്ക് വകയിരുത്തിയ തുക കുറവാണെന്ന് സാമ്പത്തിക വിദഗ്ധനായ മാർക്ക് ലീ അഭിപ്രായപ്പെടുന്നു. തദ്ദേശ സ്ഥാപനങ്ങളുടെ കൂട്ടായ്മയായ ഫെഡറേഷൻ ഓഫ് കനേഡിയൻ മുനിസിപ്പാലിറ്റീസും പദ്ധതിയെ പിന്തുണച്ചു.
ചികിത്സ, ലഹരിമുക്തി, മറ്റ് സാമൂഹിക സേവനങ്ങൾ എന്നിവ പ്രവിശ്യാ സർക്കാരുകളുടെ ചുമതലയിലാണ് വരുന്നത്. അതിനാൽ ഫെഡറൽസർക്കാരിന്റെ ഈ ശ്രമത്തോട് പ്രവിശ്യാ സർക്കാരുകൾ കൂടി പൂർണ്ണമായി സഹകരിച്ചാൽ മാത്രമേ ഭവനരഹിതരില്ലാത്ത രാജ്യമായി കാനഡയ്ക്ക് മാറാൻ സാധിക്കൂ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
