ഓട്ടവ: ഫെഡറൽ ബജറ്റിലെ വലിയ സാമ്പത്തിക പ്രഖ്യാപനങ്ങൾക്കൊപ്പം സാധാരണക്കാരുടെ ദൈനംദിന ജീവിതത്തെ ബാധിക്കുന്ന സുപ്രധാന മാറ്റങ്ങളും കാനഡ സർക്കാർ പ്രഖ്യാപിച്ചു. ധനമന്ത്രി ഫ്രാൻസ്വാ-ഫിലിപ്പ് ഷാംപെയ്ൻ അവതരിപ്പിച്ച പുതിയ ബജറ്റിൽ കലാകാരന്മാർ, കായികപ്രേമികൾ, തപാൽ സേവനങ്ങൾ ഉപയോഗിക്കുന്നവർ എന്നിവർക്കായി പ്രത്യേക പ്രഖ്യാപനങ്ങളാണുള്ളത്.
തപാൽ വകുപ്പിന്റെ നഷ്ടം ഒഴിവാക്കാനാണ് പ്രധാന മാറ്റങ്ങളിലൊന്ന്. നിലവിൽ 1.44 ഡോളറുള്ള ഒരു തപാൽ സ്റ്റാമ്പിന്റെ വില രണ്ട് ഡോളറായി ഉയർത്തി. ഇത് ഏകദേശം 40 ശതമാനത്തോളം വർധനവാണ്. ഇതിനു പുറമെ തുടർന്നുള്ള വർഷങ്ങളിൽ പ്രതിവർഷം 7 ശതമാനം വീതം നിരക്ക് വീണ്ടും വർധിപ്പിക്കും.
കായിക രംഗത്തെ വളർത്താനായി അടുത്ത ഒമ്പത് വർഷത്തിനുള്ളിൽ 1.5 ബില്യൺ ഡോളറാണ് സർക്കാർ മാറ്റിവെച്ചിരിക്കുന്നത്. ഇതിൽ പകുതി തുകയായ 750 ദശലക്ഷം ഡോളർ ഐസ് റിങ്കുകൾ നവീകരിക്കാനും ബാക്കി 750 ദശലക്ഷം ഡോളർ മറ്റ് കമ്മ്യൂണിറ്റി വിനോദ കേന്ദ്രങ്ങൾക്കുമായി ഉപയോഗിക്കും.
രാജ്യത്തെ സർഗ്ഗാത്മക മേഖലയ്ക്ക് ഊർജ്ജം പകരാൻ ‘കാനഡ ക്രിയേറ്റീവ് ക്രെഡിറ്റ്’ എന്ന പേരിൽ പുതിയ നികുതി ഇളവ് നടപ്പിലാക്കുന്നുണ്ട്. ഇതനുസരിച്ച് കലാകാരന്മാർക്ക് 45,000 ഡോളർ വരെ നികുതി ഇളവ് ലഭിക്കും. കൂടാതെ, 25 വയസ്സിൽ താഴെയുള്ളവർക്ക് രാജ്യത്തെ പ്രധാന മ്യൂസിയങ്ങളിൽ പ്രവേശനം പൂർണ്ണമായും സൗജന്യമാക്കിയിട്ടുണ്ട്. ഇതിനായി അടുത്ത അഞ്ച് വർഷത്തേക്ക് 500 ദശലക്ഷം ഡോളറിലധികം തുക വകയിരുത്തി.
ALSO READ: യു.എസ് ആശ്രയം അവസാനിപ്പിക്കുന്നു; ചരിത്ര ബജറ്റ് പ്രഖ്യാപിച്ച് കാനഡ
സാധാരണക്കാർക്ക് തിരിച്ചടിയാകുന്ന മറ്റൊരു പ്രധാന മാറ്റം നികുതി കുടിശ്ശികയുമായി ബന്ധപ്പെട്ടുള്ളതാണ്. കാനഡ റവന്യൂ ഏജൻസിക്ക് 50,000 ഡോളറിലധികം നികുതി നൽകാനുള്ളവരുടെ വിവരങ്ങൾ ഇനിമുതൽ ക്രെഡിറ്റ് റേറ്റിംഗ് ഏജൻസികൾക്ക് കൈമാറും. ഇത് വ്യക്തികളുടെ ക്രെഡിറ്റ് സ്കോറിനെ ബാധിക്കും. അതേസമയം, ആരോഗ്യ മേഖലയ്ക്ക് ആശ്വാസമായി മസാജ് തെറാപ്പിസ്റ്റുകളുടെ സേവനങ്ങളെ ജി.എസ്.ടി/എച്ച്.എസ്.ടി നികുതികളിൽ നിന്ന് ഒഴിവാക്കിയിട്ടുമുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
