ഓട്ടവ: 2026-ലെ ഫെഡറല്‍ ബജറ്റ് ധനമന്ത്രി ഫ്രാന്‍സ്വാ-ഫിലിപ്പ് ഷാംപെയ്ന്‍ ഇന്ന് പാര്‍ലമെന്റില്‍ അവതരിപ്പിക്കും. യു.എസ് തീരുവ ഭീഷണികളും വർധിച്ചുവരുന്ന ജീവിതച്ചെലവും ഉയർത്തുന്ന വെല്ലുവിളികൾക്കിടയിൽ, രാജ്യത്തിന്റെ സാമ്പത്തിക സ്വയംപര്യാപ്തത ശക്തിപ്പെടുത്തുകയാണ് ബജറ്റിന്റെ പ്രധാന ലക്ഷ്യം. പ്രധാനമന്ത്രി മാര്‍ക്ക് കാര്‍ണിയുടെ നേതൃത്വത്തിലുള്ള ലിബറല്‍ സര്‍ക്കാരിന്റെ രണ്ടാമത്തെ ബജറ്റാണിത്.
’മൈത്ര് ഷേ നൂ’ (Maîtres chez nous) അഥവാ ‘നമ്മുടെ ഭാവിയുടെ നിയന്ത്രണം നമുക്ക് തന്നെ’ എന്ന പ്രമേയത്തിലാണ് ഇത്തവണത്തെ ബജറ്റ് തയ്യാറാക്കിയിരിക്കുന്നത്. അമേരിക്കയെ അമിതമായി ആശ്രയിക്കുന്നത് കുറയ്ക്കുന്നതിനും ആഭ്യന്തര വ്യവസായങ്ങളെ സംരക്ഷിക്കുന്നതിനും ഒപ്പം പ്രതിരോധം, അടിസ്ഥാനസൗകര്യ വികസനം തുടങ്ങിയ മേഖലകളില്‍ കൂടുതല്‍ നിക്ഷേപം ഉറപ്പാക്കാനും സര്‍ക്കാര്‍ ലക്ഷ്യമിടുന്നു.
സാമ്പത്തിക ഉല്‍പ്പാദനക്ഷമത വര്‍ധിപ്പിക്കുക, സ്വകാര്യ നിക്ഷേപങ്ങള്‍ പ്രോത്സാഹിപ്പിക്കുക, പ്രാദേശിക കമ്പനികള്‍ക്ക് ആഗോള വിപണിയില്‍ കൂടുതല്‍ ഇടം കണ്ടെത്തുക എന്നിവയ്ക്കാണ് ബജറ്റിൽ മുൻഗണന നൽകുന്നത്. ചെറുകിട-ഇടത്തരം സംരംഭങ്ങൾക്ക് നികുതിയിളവുകൾ പ്രഖ്യാപിച്ചേക്കും. കമ്പനികള്‍ പുതിയ യന്ത്രസാമഗ്രികളിലും ആധുനിക ഉപകരണങ്ങളിലും നിക്ഷേപം നടത്തുമ്പോൾ ഇളവുകൾ നൽകുന്ന ‘പ്രൊഡക്ടിവിറ്റി മെഗാ ഡിഡക്ഷന്‍’ പദ്ധതിക്കായി അടുത്ത അഞ്ചുവര്‍ഷത്തിനിടെ 36 ബില്യണ്‍ ഡോളറിലധികം ചെലവ് പ്രതീക്ഷിക്കുന്നുണ്ട്.
അതേസമയം, ഉയര്‍ന്ന സര്‍ക്കാര്‍ ചെലവഴിക്കലും വർധിച്ചുവരുന്ന കടമെടുപ്പും ബജറ്റിലും തുടരുമെന്നാണ് സാമ്പത്തിക വിദഗ്ധരുടെ വിലയിരുത്തൽ. കടത്തിന്റെ പലിശ തിരിച്ചടവാണ് സർക്കാരിന്റെ ബാധ്യതകളിൽ ഏറ്റവും വേഗത്തിൽ വർധിക്കുന്നതെന്ന് പാര്‍ലമെന്ററി ബജറ്റ് ഓഫീസര്‍ മുന്നറിയിപ്പ് നല്‍കിയിട്ടുണ്ട്. ഉയർന്ന കടബാധ്യത മറ്റ് വികസന പദ്ധതികളുടെ ഫണ്ടിംഗിനെ ബാധിക്കുമോ എന്ന ആശങ്കയും ശക്തമാണ്.
പുതിയ ധനവിനിയോഗങ്ങൾക്കും സാമ്പത്തിക പദ്ധതികൾക്കും പുറമെ, പ്രവാസികളും തൊഴിലന്വേഷകരും ഉറ്റുനോക്കുന്ന രാജ്യത്തിന്റെ പുതുക്കിയ ഇമിഗ്രേഷൻ ലക്ഷ്യങ്ങളും ബജറ്റിന്റെ ഭാഗമായി പ്രഖ്യാപിക്കും. പാര്‍ലമെന്റില്‍ അവതരിപ്പിച്ച ശേഷം വരും ആഴ്ചകളില്‍ ബജറ്റിന്മേൽ വിശദമായ ചര്‍ച്ചകൾ നടക്കും. ഭൂരിപക്ഷമുള്ളതിനാൽ പാർലമെന്റിൽ ബജറ്റ് പാസാക്കിയെടുക്കാൻ ലിബറൽ സർക്കാരിന് തടസ്സങ്ങളുണ്ടാകില്ല.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Canada’s 2026 Federal Budget’
