ലണ്ടൻ: യുകെയിലെ രണ്ട് പ്രമുഖ ഡയറി ഫാമുകളിലെ കന്നുകാലികളിൽ ഷാമോണ്ട വൈറസ് (SHAV) സ്ഥിരീകരിച്ചത് കർഷകർക്കിടയിൽ ആശങ്ക പരത്തിയിട്ടുണ്ട്. ഇംഗ്ലണ്ടിലെ ഷ്രോപ്ഷെയറിലും വെയിൽസിലെ പവീസിലുമുള്ള ഡയറി ഫാമുകളിലാണ് ഈ വൈറസ് ബാധ കണ്ടെത്തിയത്. പ്രാണികളിലൂടെ പകരുന്ന ഈ രോഗം കന്നുകാലികളെ ഗുരുതരമായി ബാധിക്കാമെങ്കിലും, മനുഷ്യർക്ക് ഇത് എത്രത്തോളം ഭീഷണിയാണെന്ന ആശങ്ക ആരോഗ്യ വിദഗ്ധർ പരിശോധിക്കുന്നുണ്ട്.
കറവപ്പശുക്കളിൽ പനി, കടുത്ത വയറിളക്കം, പാൽ ഉൽപാദനത്തിൽ പെട്ടെന്നുണ്ടാകുന്ന കുറവ് എന്നിവയാണ് പ്രധാന ലക്ഷണങ്ങളായി കണ്ടുവരുന്നത്. ഗർഭിണികളായ മൃഗങ്ങൾക്ക് രോഗം ബാധിച്ചാൽ ഗർഭം അലസിപ്പോകാനോ, പ്രസവത്തിൽ കഠിനമായ ബുദ്ധിമുട്ടുകൾ ഉണ്ടാകാനോ, വൈകല്യമുള്ള കുഞ്ഞുങ്ങൾ ജനിക്കാനോ സാധ്യതയുണ്ടെന്ന് ലോകാരോഗ്യ സംഘടന മുന്നറിയിപ്പ് നൽകുന്നു. പശുക്കൾക്ക് പുറമെ ആട്, ചെമ്മരിയാട്, കുതിര എന്നിവയെയും രോഗം ബാധിക്കാം.
ചെറിയ പ്രാണികളുടെയും കൊതുകുകളുടെയും കടിയിലൂടെയാണ് ഈ വൈറസ് മൃഗങ്ങളിലേക്ക് പകരുന്നത്. സാധാരണ രീതിയിൽ മൃഗങ്ങൾ തമ്മിൽ നേരിട്ട് തൊടുമ്പോഴോ ഒന്നിച്ചിരിക്കുമ്പോഴോ രോഗം പകരില്ല. 1960-കളിൽ നൈജീരിയയിൽ കണ്ടെത്തിയ ഈ വൈറസ്, അടുത്തിടെ യൂറോപ്പിലെ വിവിധ ഭാഗങ്ങളിൽ കന്നുകാലികൾക്കിടയിൽ പടർന്നുപിടിക്കുന്നതായി കണ്ടെത്തിയിട്ടുണ്ട്. ഷ്മല്ലൻബെർഗ്, അകാബേൻ തുടങ്ങിയ വൈറസുകളുമായി ഇതിന് സാമ്യമുണ്ട്.
കഴിഞ്ഞ ഒക്ടോബറിൽ ഫ്രാൻസിൽ ഒരാൾക്ക് ഈ വൈറസ് ബാധിച്ചതായി റിപ്പോർട്ട് ചെയ്തിരുന്നെങ്കിലും, മനുഷ്യരിലേക്ക് ഇത് പെട്ടെന്നൊന്നും പകരില്ലെന്ന് ആരോഗ്യ ഏജൻസികൾ വ്യക്തമാക്കുന്നു. രോഗബാധിതരായ മൃഗങ്ങളുമായി അടുത്തിടപഴകുന്നതുകൊണ്ട് മാത്രം മനുഷ്യർക്ക് വൈറസ് ബാധിക്കില്ല. അതുപോലെ, ഒരാളിൽ നിന്ന് മറ്റൊരാളിലേക്ക് രോഗം പടരുന്നതായി നിലവിൽ തെളിവുകളൊന്നുമില്ല.
Also Read: NLPNP/AIP ഡ്രോ: 2026 നവംബറിൽ നടന്ന 2 നറുക്കെടുപ്പുകളുടെ വിശദാംശങ്ങൾ അറിയാം
യുകെയിലെ കർഷകർ നിലവിൽ ഭയപ്പെടേണ്ടതില്ലെന്നും എന്നാൽ ജാഗ്രത പാലിക്കണമെന്നും ആനിമൽ ആൻഡ് പ്ലാന്റ് ഹെൽത്ത് ഏജൻസി നിർദ്ദേശിച്ചിട്ടുണ്ട്. ഫാമുകളിൽ പ്രാണികളെ നിയന്ത്രിക്കാനുള്ള പ്രതിരോധ നടപടികൾ ഊർജ്ജിതമാക്കിയിട്ടുണ്ട്. സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണെന്നും നിലവിൽ ആശങ്കപ്പെടേണ്ട സാഹചര്യമില്ലെന്നും അധികൃതർ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
