ഓട്ടവ: കാനഡയിലെ പ്രധാന വികസന പദ്ധതികൾ വേഗത്തിലാക്കാൻ ലക്ഷ്യമിട്ട് സർക്കാർ കൊണ്ടുവന്ന ബിൽ സി-39 രാജ്യത്തെ തൊഴിൽ സ്ഥിരതയെ സാരമായി ബാധിക്കുമെന്ന് കനേഡിയൻ ലേബർ കോൺഗ്രസ് വ്യക്തമാക്കി. ഹൗസ് ഓഫ് കോമൺസ് നിയമനിർമ്മാണ സമിതിക്ക് മുന്നിൽ ഹാജരായാണ് യൂണിയൻ നേതാക്കൾ പുതിയ ഭേദഗതികളിലെ ആശങ്കകൾ പരസ്യമാക്കിയത്. കാനഡ ലേബർ കോഡിൽ വരുത്തുന്ന മാറ്റങ്ങൾ വർഷങ്ങളായി നിലനിൽക്കുന്ന തൊഴിലാളി അവകാശങ്ങളെ ഇല്ലാതാക്കുമെന്നും അവർ സമിതിയെ അറിയിച്ചു.
243 പേജുകളുള്ള പുതിയ ബില്ലിൽ പ്രധാന പദ്ധതികളുടെ അവലോകന സമയം വെട്ടിക്കുറയ്ക്കാനാണ് സർക്കാർ പ്രധാനമായും ലക്ഷ്യമിടുന്നത്. ഇതിനായി ചില പ്രത്യേക മേഖലകളെ “national interest” വിഭാഗത്തിൽ ഉൾപ്പെടുത്തി വേഗത്തിൽ മുൻകൂർ അംഗീകാരം നൽകാൻ വ്യവസ്ഥ ചെയ്യുന്നു. കൂടാതെ ഫെഡറൽ അധികാരപരിധിയിലുള്ള തൊഴിലുടമകളും തൊഴിലാളികളും തമ്മിൽ തർക്കമുണ്ടായാൽ തൊഴിൽ മന്ത്രിക്ക് നേരിട്ട് ഇടപെടാം. പ്രവർത്തനം പുനരാരംഭിക്കാൻ ഉത്തരവിടാനും നിർബന്ധിത മധ്യസ്ഥതയ്ക്ക് അയക്കാനും മന്ത്രിക്ക് അധികാരം നൽകുന്നതാണ് പുതിയ വ്യവസ്ഥ.
അതേസമയം പണിമുടക്കാനുള്ള അവകാശത്തെ സംരക്ഷിക്കുന്നതാണ് പുതിയ മാറ്റങ്ങളെന്നാണ് തൊഴിൽ മന്ത്രി പാറ്റി ഹാജ്ഡു വാദിക്കുന്നത്. തൊഴിൽ തടസ്സങ്ങൾ ഉണ്ടാകുന്നതിന് മുൻപ് ഇടപെടാനുള്ള വകുപ്പുകൾ നീക്കം ചെയ്തിട്ടുണ്ടെന്നും മന്ത്രി വ്യക്തമാക്കി. എന്നാൽ അടിയന്തര സാഹചര്യങ്ങളിൽ രാജ്യത്തിന്റെ പൊതുതാൽപര്യം മുൻനിർത്തി ഇടപെടാൻ സർക്കാരിന് ബാധ്യതയുണ്ടെന്നും മന്ത്രി കൂട്ടിച്ചേർത്തു. പദ്ധതികൾ വേഗത്തിലാക്കുന്നത് സാമ്പത്തിക വളർച്ചയ്ക്ക് അനിവാര്യമാണെന്നാണ് സർക്കാരിന്റെ നിലപാട്.
മന്ത്രിക്ക് ലഭിക്കുന്ന പുതിയ പ്രത്യേക അധികാരങ്ങൾ തൊഴിലാളികളുടെ പണിമുടക്കാനുള്ള അവകാശത്തെ ഇല്ലാതാക്കുമെന്ന് കനേഡിയൻ ലേബർ കോൺഗ്രസ് പ്രസിഡന്റ് ബിയ ബ്രൂസ്‌കെ പറഞ്ഞു. സർക്കാർ തലത്തിൽ ഇടപെടൽ ഉണ്ടാകുമെന്ന് ഉറപ്പുള്ളതിനാൽ കമ്പനികൾ കരാർ ചർച്ചകളിൽ തൊഴിലാളികൾക്ക് അനുകൂലമായ നിലപാട് എടുക്കില്ലെന്ന് കനേഡിയൻ യൂണിയൻ ഓഫ് പബ്ലിക് എംപ്ലോയീസ് പ്രസിഡന്റ് മാർക്ക് ഹാൻകോക്കും ചൂണ്ടിക്കാട്ടി. നിയമം പ്രാബല്യത്തിൽ വന്നാൽ അത് വരുംദിവസങ്ങളിൽ വലിയ തൊഴിൽ തർക്കങ്ങളിലേക്ക് നയിക്കുമെന്നും യൂണിയനുകൾ മുന്നറിയിപ്പ് നൽകി.
കാനഡയിൽ നിർമാണ, വ്യവസായ മേഖലകളിലെ വികസന പദ്ധതികൾ വൈകുന്നത് ഒഴിവാക്കാനാണ് ഫെഡറൽ സർക്കാർ ബിൽ സി-39 സഭയിൽ അവതരിപ്പിച്ചത്. നിലവിലുള്ള സങ്കീർണ്ണമായ അനുമതി നടപടികൾ ലളിതമാക്കുക എന്നതായിരുന്നു സർക്കാരിന്റെ പ്രാഥമിക ലക്ഷ്യം. എന്നാൽ ലേബർ കോഡിലെ സെക്ഷൻ 107-ൽ വരുത്തിയ മാറ്റങ്ങൾ തൊഴിൽ മേഖലയിൽ വലിയ പ്രതിഷേധത്തിന് കാരണമായി. ഇതോടെയാണ് ബിൽ പാർലമെന്ററി സമിതിയുടെ കൂടുതൽ പരിശോധനയ്ക്കായി മാറ്റിവെച്ചത്.
Also Read: കോൾ സെന്റർ വഴി ടിക്കറ്റെടുത്താൽ അധിക നിരക്ക്; പുതിയ പരിഷ്കാരവുമായി എയർ കാനഡ
നിലവിൽ ഹൗസ് ഓഫ് കോമൺസ് സമിതിക്ക് മുൻപിൽ വോട്ടെടുപ്പിനും ചർച്ചകൾക്കുമായി ബിൽ എത്തിനിൽക്കുകയാണ്. യൂണിയൻ നേതാക്കളുടെയും തൊഴിൽ വിദഗ്ധരുടെയും മൊഴികൾ സമിതി വിശദമായി രേഖപ്പെടുത്തി വരികയാണ്. വരുംദിവസങ്ങളിൽ പ്രതിപക്ഷ പാർട്ടികളുമായി കൂടുതൽ ചർച്ചകൾ നടത്തി ബില്ലിൽ മാറ്റങ്ങൾ വരുത്തണമോ എന്ന കാര്യത്തിൽ സമിതി തീരുമാനമെടുക്കും. പാർലമെന്റിന്റെ അടുത്ത സമ്മേളനത്തിൽ ബിൽ വോട്ടെടുപ്പിന് എത്തുന്നതോടെ മാത്രമേ അന്തിമ രൂപം വ്യക്തമാകൂ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
