ടൊറന്റോ: ഈ മാസം നടക്കാനിരിക്കുന്ന ടൊറന്റോ നഗരസഭാ തിരഞ്ഞെടുപ്പിൽ സൈക്കിൾ പാതകൾ (Bike Lanes) പ്രധാന തർക്കവിഷയമായി മാറിയെന്ന് പുതിയ സർവേ റിപ്പോർട്ട്. നാനോസ് റിസർച്ച് നടത്തിയ സർവേയിലാണ് വോട്ടർമാർക്കിടയിലെ ഭിന്നത വ്യക്തമാകുന്നത്. പ്രധാന മേയർ സ്ഥാനാർത്ഥികളായ ഒലിവിയ ചൗവിന്റെയും ബ്രാഡ് ബ്രാഡ്‌ഫോർഡിന്റെയും പിന്തുണക്കാർക്കിടയിൽ സൈക്കിൾ പാത വികസനം വലിയ ആശയക്കുഴപ്പമാണ് സൃഷ്ടിച്ചിരിക്കുന്നത്.
ഒക്ടോബർ 8 മുതൽ 10 വരെയുള്ള തീയതികളിൽ 757 ടൊറന്റോ നിവാസികളിൽ നടത്തിയ സർവേയിൽ 46 ശതമാനം പേരും ഗതാഗതക്കുരുക്കാണ് നഗരം നേരിടുന്ന ഏറ്റവും വലിയ പ്രശ്നമായി ചൂണ്ടിക്കാണിച്ചത്. ടി.ടി.സി (TTC) പൊതുഗതാഗത സംവിധാനത്തിന്റെ കൃത്യതയില്ലായ്മയാണ് രണ്ടാമത്തെ പ്രശ്നം (19%). അതേസമയം, സൈക്കിൾ പാതകൾ വർധിക്കുന്നത് ഗതാഗത തടസ്സമുണ്ടാക്കുന്നുവെന്ന് 9 ശതമാനം പേർ അഭിപ്രായപ്പെട്ടപ്പോൾ, കൂടുതൽ സൈക്കിൾ പാതകൾ വേണമെന്ന് 8 ശതമാനം പേർ വാദിച്ചു.
സൈക്കിൾ പാത വിപുലീകരണത്തെ ഒലിവിയ ചൗവിനെ പിന്തുണയ്ക്കുന്നവരിൽ 74 ശതമാനം പേർ അനുകൂലിക്കുമ്പോൾ, ബ്രാഡ് ബ്രാഡ്‌ഫോർഡിന്റെ അനുഭാവികളിൽ 74 ശതമാനം പേരും ഇതിനെ എതിർക്കുന്നു. ബ്ലൂർ സ്ട്രീറ്റ് വെസ്റ്റിലെ സൈക്കിൾ പാതകൾ നീക്കം ചെയ്യുമെന്ന് ബ്രാഡ്‌ഫോർഡ് വാഗ്ദാനം ചെയ്യുമ്പോൾ, റോഡുകളുടെ വീതി കുറയ്ക്കാതെ തന്നെ സൈക്കിൾ നെറ്റ്‌വർക്ക് വികസിപ്പിക്കാനാണ് മേയർ ഒലിവിയ ചൗ ശ്രമിക്കുന്നത്. സൈക്കിൾ പാതകൾ നിർമ്മിക്കുന്ന കാര്യത്തിൽ സിറ്റി സ്റ്റാഫും വിദഗ്ധരുമാണ് അന്തിമ തീരുമാനമെടുക്കേണ്ടതെന്ന് 45 ശതമാനം പേർ അഭിപ്രായപ്പെട്ടു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
