ഓട്ടവ: ക്യുബെക്ക് പ്രവിശ്യയിൽ പാർട്ടി ക്യുബെക്കോയിസ് (പിക്യു) അധികാരത്തിലെത്തിയതോടെ ഫെഡറൽ സർക്കാരുമായുള്ള ബന്ധം വലിയ ചോദ്യചിഹ്നമാകുന്നു. പുതിയ പ്രീമിയറായി ചുമതലയേൽക്കുന്ന പോൾ സെന്റ്-പിയറി പ്ലാമണ്ടൻ, ഫെഡറൽ സർക്കാരുമായി വിവിധ വിഷയങ്ങളിൽ ശക്തമായ വിയോജിപ്പുകൾ നിലനിർത്തുന്ന വ്യക്തിയാണ്. അതുകൊണ്ടുതന്നെ കുടിയേറ്റ നയം, അതിവേഗ റെയിൽ പദ്ധതി, ഭരണഘടനാപരമായ അവകാശങ്ങൾ തുടങ്ങിയ നിരവധി വിഷയങ്ങളിൽ ഇരു സർക്കാരുകളും തമ്മിൽ വരുന്ന ദിവസങ്ങളിൽ വലിയ തർക്കങ്ങൾക്ക് സാധ്യതയുണ്ടെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
തിരഞ്ഞെടുപ്പ് വിജയത്തിന് ശേഷം ക്യുബെക്ക് സിറ്റിയിൽ നടന്ന ആദ്യ വാർത്താ സമ്മേളനത്തിൽ, പ്രധാനമന്ത്രി മാർക്ക് കാർണിയുമായി പ്രാഥമിക ചർച്ചകൾ നടത്തിയതായി പ്ലാമണ്ടൻ വ്യക്തമാക്കി. പ്രവിശ്യയിലെ ഭവനരഹിതരുടെ പ്രശ്നങ്ങൾ പരിഹരിക്കുന്നതിന് പരസ്പര സഹകരണത്തോടെ പ്രവർത്തിക്കുമെന്ന് ഇരുവരും അറിയിച്ചു. പുതിയ സർക്കാരുമായി ചേർന്ന് പ്രവർത്തിക്കാൻ തയ്യാറാണെന്ന് പ്രധാനമന്ത്രി മാർക്ക് കാർണിയും വ്യക്തമാക്കിയിട്ടുണ്ട്. എന്നാൽ, ക്യുബെക്കിന്റെ പരമാധികാരം ഉയർത്തിപ്പിടിക്കുന്ന പിക്യു പാർട്ടിയും ഫെഡറൽ സർക്കാരുമായി എത്രത്തോളം ഒത്തുപോകുമെന്ന കാര്യത്തിൽ സംശയങ്ങൾ നിലനിൽക്കുന്നു.
പ്രവിശ്യയിലേക്കുള്ള കുടിയേറ്റക്കാരുടെ എണ്ണം പകുതിയോളമായി കുറയ്ക്കണമെന്നാണ് പുതിയ പിക്യു സർക്കാരിന്റെ പ്രധാന ആവശ്യം. നിലവിലെ വർഷത്തിൽ 60,000 ആയിരുന്ന സ്ഥിര കുടിയേറ്റക്കാരുടെ എണ്ണം 35,000 ആയി ചുരുക്കാനും, താൽക്കാലിക തൊഴിലാളികളുടെയും വിദ്യാർത്ഥികളുടെയും എണ്ണം വൻതോതിൽ വെട്ടിക്കുറയ്ക്കാനും പാർട്ടി ആഗ്രഹിക്കുന്നു. എന്നാൽ, കുടിയേറ്റ വിസകളും അനുമതികളും നൽകാനുള്ള പൂർണ്ണ അധികാരം ഫെഡറൽ സർക്കാരിനാണ്. ഈ അധികാരം ക്യുബെക്കിന് വിട്ടുനൽകണമെന്ന ആവശ്യം മുൻപും ഫെഡറൽ സർക്കാർ നിരസിച്ചിട്ടുള്ളതാണ്.
ടൊറന്റോ, മോൺട്രിയൽ, ക്യുബെക്ക് സിറ്റി എന്നിവയെ ബന്ധിപ്പിച്ച് ഫെഡറൽ സർക്കാർ നടപ്പിലാക്കാൻ ഉദ്ദേശിക്കുന്ന അതിവേഗ റെയിൽ പാത പദ്ധതിയെ പുതിയ പ്രവിശ്യാ സർക്കാർ ശക്തമായി എതിർക്കുന്നുണ്ട്. ഈ പദ്ധതി ക്യുബെക്ക് ജനതയുടെ ആവശ്യങ്ങൾക്ക് അനുയോജ്യമല്ലെന്നാണ് പ്ലാമണ്ടന്റെ നിലപാട്. പ്രവിശ്യാ സർക്കാരിന്റെ പിന്തുണയില്ലാതെ ഈ വൻകിട പദ്ധതി മുന്നോട്ട് കൊണ്ടുപോകാൻ ഫെഡറൽ സർക്കാരിന് കടുത്ത വെല്ലുവിള നേരിടേണ്ടി വരും.
പൊതുപ്രവർത്തകർ ജോലിസ്ഥലത്ത് മതചിഹ്നങ്ങൾ ധരിക്കുന്നത് നിരോധിക്കുന്ന വിവാദപരമായ ‘ബിൽ 21’ നിയമവുമായി ബന്ധപ്പെട്ട് ഉടൻ തന്നെ കാനഡ സുപ്രീം കോടതിയുടെ വിധി വരാനിരിക്കുകയാണ്. കോടതി ഈ നിയമം റദ്ദാക്കിയാൽ അത് കടുത്ത രാഷ്ട്രീയ തർക്കങ്ങളിലേക്ക് വഴിതുറക്കും. കൂടാതെ, രണമേറ്റെടുത്ത് 100 ദിവസത്തിനുള്ളിൽ ബ്രിട്ടീഷ് രാജവാഴ്ചയുടെ ഭാഗമായ ലെഫ്റ്റനന്റ് ഗവർണർ ഓഫീസിനുള്ള ഫണ്ട് നിർത്തിവെക്കുമെന്നും പിക്യു സർക്കാർ പ്രഖ്യാപിച്ചു.
Also Read: കാനഡ വർക്കേഴ്‌സ് ബെനിഫിറ്റ് വിതരണം ഒക്ടോബർ 9-ന്: തുകയും മറ്റ് വിവരങ്ങളും അറിയാം
കാനഡ ഹെൽത്ത് ട്രാൻസ്ഫർ വഴിയും അഭയാർത്ഥികളുടെ ചെലവുകൾക്കായും ഫെഡറൽ സർക്കാരിൽ നിന്ന് 4.4 ബില്യൺ ഡോളറിന്റെ അധിക സാമ്പത്തിക സഹായം ക്യുബെക്ക് ആവശ്യപ്പെടുന്നുണ്ട്. ഫെഡറൽ സർക്കാരുമായി നിരന്തരം ഏറ്റുമുട്ടുന്നത് പ്രവിശ്യയുടെ സ്വതന്ത്ര പദവി എന്ന ലക്ഷ്യത്തിന് അനുകൂലമായ അന്തരീക്ഷം സൃഷ്ടിക്കുമെന്നാണ് പിക്യു കണക്കുകൂട്ടുന്നത്. അതേസമയം, ജനങ്ങൾക്ക് പ്രയോജനകരമായ രീതിയിൽ ഒന്നിച്ച് പ്രവർത്തിക്കാൻ സർക്കാരുകൾ തയ്യാറാകണമെന്ന ആവശ്യവും ശക്തമാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
