റെജൈന : സസ്കാച്വാൻ പ്രവിശ്യയിലെ ഇന്ത്യൻ ഹെഡ് റിസർച്ച് ഫാമിലെ പ്രവർത്തനങ്ങൾ ഘട്ടംഘട്ടമായി അവസാനിപ്പിക്കുമെന്ന് ഫെഡറൽ സർക്കാർ. ഇവിടെയുള്ള സീഡ് ഇൻക്രീസ് യൂണിറ്റ് 2028-ഓടെ സസ്‌കാടൂൺ റിസർച്ച് ആൻഡ് ഡെവലപ്‌മെന്റ് സെന്ററിലേക്ക് മാറ്റാനാണ് തീരുമാനം. മാറ്റം സുഗമമാക്കുന്നതിനായി 2027-ൽ ഈ യൂണിറ്റ് രണ്ട് കേന്ദ്രങ്ങളിൽ നിന്നും പ്രവർത്തിക്കുമെന്ന് അഗ്രികൾച്ചർ ആൻഡ് അഗ്രി-ഫുഡ് കാനഡ വാർത്താക്കുറിപ്പിൽ വ്യക്തമാക്കി.
പെഡിഗ്രീ കർഷകർക്ക് വിത്ത് നൽകി ഗുണനിലവാരം ഉറപ്പാക്കുന്നതാണ് ഈ യൂണിറ്റിന്റെ പ്രധാന ചുമതല. ഇന്ത്യൻ ഹെഡ്, സ്കോട്ട് റിസർച്ച് ഫാമുകൾ നിലനിർത്തുന്നതിനായി ഫെഡറൽ-പ്രവിശ്യാ സർക്കാരുകൾ നേരത്തെ ധാരണാപത്രത്തിൽ ഒപ്പുവെച്ചിരുന്നു. ഫെഡറൽ സർക്കാർ പ്രവർത്തനങ്ങൾ അവസാനിപ്പിക്കുമ്പോൾ പ്രവിശ്യാ സർക്കാർ ഈ ഭൂമിയുടെ നിയന്ത്രണം ഏറ്റെടുക്കും.
എന്നിരുന്നാലും, സീഡ് ഇൻക്രീസ് യൂണിറ്റ് മാറ്റുന്നതോടെ ഇന്ത്യൻ ഹെഡ്, സ്കോട്ട് ഫാമുകളുടെ ഭാവി എന്താകുമെന്ന കാര്യത്തിൽ വ്യക്തത വന്നിട്ടില്ല. ഫെഡറൽ സർക്കാരുമായി ചർച്ചകൾ തുടരുകയാണെന്നും കാർഷിക വ്യവസായവുമായി ചേർന്ന് പുതിയ പദ്ധതികൾ വികസിപ്പിച്ചുവരികയാണെന്നും പ്രവിശ്യാ കൃഷി മന്ത്രി ഡേവിഡ് മാരിറ്റ് അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
