ഓട്ടവ: ഇന്ത്യയും കാനഡയും തമ്മിലുള്ള ഉഭയകക്ഷി വ്യാപാരം നിലവിലെ 30 ബില്യൺ ഡോളറിൽ നിന്ന് അടുത്ത അഞ്ചുവർഷത്തിനകം 70 ബില്യൺ ഡോളറായി ഉയർത്താൻ ധാരണയായി. ഇരു രാജ്യങ്ങളും തമ്മിലുള്ള സാമ്പത്തിക പങ്കാളിത്ത കരാർ (CEPA) സംബന്ധിച്ച ചർച്ചകൾ അവസാനഘട്ടത്തിലാണെന്ന് കാനഡയുടെ അന്താരാഷ്ട്ര വ്യാപാര മന്ത്രി മനീന്ദർ സിദ്ധു അറിയിച്ചു. 2026-ലെ ജി20 വ്യാപാര മന്ത്രിമാരുടെ സമ്മേളനത്തിൽ സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. ഇന്ത്യയും കാനഡയും തമ്മിലുള്ള വ്യാപാര ബന്ധം ശക്തമാക്കുന്നതിനും സാമ്പത്തിക വളർച്ച വേഗത്തിലാക്കുന്നതിനുമാണ് ഈ പുതിയ നീക്കം.
വ്യാപാര കരാറുമായി ബന്ധപ്പെട്ട അഞ്ചാംഘട്ട ചർച്ചകൾ ഒക്ടോബർ 5 തിങ്കളാഴ്ച ഒട്ടാവയിൽ നടക്കും. കരാർ ചർച്ചകൾ വേഗത്തിലാക്കാൻ ഇരുരാജ്യങ്ങളും ധാരണയായതായി കേന്ദ്ര വാണിജ്യ മന്ത്രി പിയൂഷ് ഗോയലും വ്യക്തമാക്കിയിട്ടുണ്ട്. ഏതാനും ദിവസങ്ങൾക്ക് മുമ്പ് മുംബൈയിൽ വെച്ച് ഇരു മന്ത്രിമാരും കൂടിക്കാഴ്ച നടത്തി മുൻപത്തെ ചർച്ചകളുടെ പുരോഗതി വിലയിരുത്തിയിരുന്നു. വ്യാപാര കരാറിലെ വ്യവസ്ഥകൾ ഇരു രാജ്യങ്ങളുടെയും സാമ്പത്തിക മേഖലയ്ക്ക് ഒരുപോലെ ഗുണം ചെയ്യുന്ന രീതിയിലാണ് തയ്യാറാക്കുന്നത്.
ഇന്ത്യയിൽ 100 ബില്യൺ യുഎസ് ഡോളറിലധികം നിക്ഷേപമുള്ള ഏറ്റവും വലിയ നിക്ഷേപകരാണ് കാനഡ. വിമാനത്താവളങ്ങൾ, ഹൈവേകൾ തുടങ്ങിയ വലിയ അടിസ്ഥാന സൗകര്യ വികസന പദ്ധതികളിൽ കനേഡിയൻ കമ്പനികൾ ഇപ്പോൾത്തന്നെ സജീവമാണ്. ഇതിന് പുറമെ കാനഡയിലെ ഖനന, ഊർജ പദ്ധതികളിൽ കൂടുതൽ ഇന്ത്യൻ കമ്പനികളുടെ നിക്ഷേപം സ്വാഗതം ചെയ്യുന്നതായും കാനഡ വ്യക്തമാക്കിയിട്ടുണ്ട്. ഇരു രാജ്യങ്ങളും തമ്മിലുള്ള ശക്തമായ നിക്ഷേപ ബന്ധം കൂടുതൽ മേഖലകളിലേക്ക് വ്യാപിപ്പിക്കാനാണ് സർക്കാരുകൾ പദ്ധതിയിടുന്നത്.
ഊർജം, നിർണായക ധാതുക്കൾ എന്നിവ ഇരു രാജ്യങ്ങളുടെയും ഭാവി സഹകരണത്തിലെ പ്രധാന മേഖലകളാണ്. അതിവേഗം വളരുന്ന ഇന്ത്യൻ സമ്പദ്‌വ്യവസ്ഥയ്ക്ക് വരും വർഷങ്ങളിൽ വലിയ അളവിൽ ഊർജം ആവശ്യമായി വരും. ഇലക്ട്രിക് വാഹനങ്ങൾക്കും ബാറ്ററികൾക്കും ആവശ്യമായ ധാതുക്കൾ ലഭ്യമാക്കുന്നതിൽ കാനഡയ്ക്ക് വലിയ പങ്കുവഹിക്കാൻ സാധിക്കും. കൂടാതെ എയ്‌റോസ്‌‌പേസ്, ടെക്‌നോളജി തുടങ്ങിയ മേഖലകളിലും ഇരുരാജ്യങ്ങൾക്കും ഒന്നിച്ചു പ്രവർത്തിക്കാനുള്ള വലിയ സാധ്യതകളുണ്ട്.
Also Read: കുടിയേറ്റ നയം മാറുമോ? ഫെഡറൽ സർക്കാരിന്റെ ‘ 2027-2029 ഇമിഗ്രേഷൻ ലെവൽസ് പ്ലാൻ’ ഉടൻ
കാനഡയുമായി വ്യാപാര കരാറിനായുള്ള ചർച്ചകൾ ഇന്ത്യ ഒരു പതിറ്റാണ്ടിലേറെയായി തുടരുകയാണ്. 2023-ൽ ഉണ്ടായ ചില നയതന്ത്ര തടസ്സങ്ങളെ തുടർന്ന് ചർച്ചകൾ നിർത്തിവെച്ചിരുന്നെങ്കിലും 2025-ൽ നടപടികൾ വീണ്ടും ആരംഭിച്ചു. 2026 മാർച്ചിൽ നടന്ന പുതിയ കരാർ നിബന്ധനകളുടെ അടിസ്ഥാനത്തിൽ ഈ വർഷം അവസാനത്തോടെ ചർച്ചകൾ പൂർത്തിയാക്കാനാണ് ഇരു രാജ്യങ്ങളും ലക്ഷ്യമിടുന്നത്. നിലവിൽ 2025-26 സാമ്പത്തിക വർഷത്തിൽ ഇരുരാജ്യങ്ങളും തമ്മിൽ ഏകദേശം 8 ബില്യൺ ഡോളറിന്റെ ഉഭയകക്ഷി വ്യാപാരം നടന്നിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
