അഭയാർഥികളെയും കുടിയേറ്റക്കാരെയും അവരുടെ മാതൃരാജ്യത്തിലേക്ക് അയക്കില്ലെന്ന് ഡൊണാൾഡ് ട്രംപ്. പകരം കേട്ടുകേൾവി പോലുമില്ലാത്ത മറ്റ് രാജ്യങ്ങളിലേക്ക് അടിയന്തരമായി നാടുകടത്താനുള്ള പ്രസിഡന്റ് ഡൊണാൾഡ് ട്രംപിന്റെ നയത്തിന് യുഎസ് സുപ്രീം കോടതിയുടെ ഇടക്കാല അനുമതി. മൂന്നാം രാജ്യങ്ങളിലേക്ക് അയക്കുന്നതിന് മുൻപ് കുടിയേറ്റക്കാർക്ക് തങ്ങൾ നേരിട്ടേക്കാവുന്ന അപകടങ്ങൾ ബോധിപ്പിക്കാൻ അവസരം നൽകാതെയുള്ള നാടുകടത്തൽ ഭരണഘടനാ വിരുദ്ധമാണെന്ന ബോസ്റ്റൺ ഫെഡറൽ ജഡ്ജി ബ്രയാൻ മർഫിയുടെ ഉത്തരവ് സുപ്രീം കോടതി സ്റ്റേ ചെയ്തു. ആറ് കൺസർവേറ്റീവ് ജഡ്ജിമാർ അനുകൂലിച്ചും മൂന്ന് ലിബറൽ ജഡ്ജിമാർ വിയോജിച്ചും പുറപ്പെടുവിച്ച ഈ ഇടക്കാല ഉത്തരവ് ട്രംപ് ഭരണകൂടത്തിന്റെ നാടുകടത്തൽ പദ്ധതികൾക്ക് വലിയ നിയമപരമായ പിന്തുണയാണ് നൽകുന്നത്. ഈ വിഷയത്തിൽ അന്തിമ വാദം ഡിസംബറിൽ കേൾക്കുമെന്നും കോടതി വ്യക്തമാക്കിയിട്ടുണ്ട്.
കുടിയേറ്റ നയം കർശനമാക്കുന്നതിന്റെ ഭാഗമായി നടപ്പിലാക്കിയ ഈ സംവിധാനത്തിലൂടെ കഴിഞ്ഞ ഒരു വർഷത്തിനിടെ 25,000-ത്തിലധികം ആളുകളെയാണ് 29 രാജ്യങ്ങളിലേക്ക് യുഎസ് നാടുകടത്തിയത്. ഇതിൽ ഭൂരിഭാഗം പേരെയും മെക്സിക്കോയിലേക്കാണ് അയച്ചതെങ്കിലും, കൊടിയ അക്രമങ്ങളും ആഭ്യന്തര സംഘർഷങ്ങളും നിലനിൽക്കുന്ന സൗത്ത് സുഡാൻ, ഉഗാണ്ട, ഇക്വറ്റോറിയൽ ഗിനിയ, ലൈബീരിയ, സെൻട്രൽ ആഫ്രിക്കൻ റിപ്പബ്ലിക് തുടങ്ങിയ അതീവ സുരക്ഷാ ഭീഷണിയുള്ള രാജ്യങ്ങളിലേക്കും ആളുകളെ നാടുകടത്തിയിട്ടുണ്ട്. തങ്ങൾ നാടുകടത്തപ്പെടുന്ന രാജ്യങ്ങളിൽ പീഡനമോ ജീവഹാനിയോ നേരിടേണ്ടി വരുമെന്ന് വ്യക്തമാക്കാൻ പോലും മുൻകൂർ നോട്ടീസോ ഹിയറിങ്ങോ നൽകാതെയുള്ള ഈ നടപടി യുഎസ് ഭരണഘടനയുടെ അഞ്ചാം ഭേദഗതി ഉറപ്പുനൽകുന്ന ‘ഡ്യൂ പ്രോസസ്’ തത്വങ്ങളുടെ ലംഘനമാണെന്നാണ് മനുഷ്യാവകാശ സംഘടനകളുടെ വാദം.
രാജ്യത്തെ ക്രിമിനൽ കുറ്റവാളികളായ വിദേശികളെയും അതിർത്തി ലംഘകരെയും വേഗത്തിൽ പുറത്താക്കാൻ ഇത്തരം മൂന്നാം രാജ്യങ്ങളിലേക്കുള്ള നാടുകടത്തൽ അത്യന്താപേക്ഷിതമാണെന്ന് ജസ്റ്റിസ് ഡിപ്പാർട്ട്‌മെന്റും ഹോംലാൻഡ് സെക്യൂരിറ്റിയും വാദിക്കുന്നു. സുപ്രീം കോടതിയുടെ ഉത്തരവ് സുരക്ഷാ നിയമങ്ങളുടെ വിജയമാണെന്ന് ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റി ജനറൽ കൗൺസൽ ജെയിംസ് പെർസിവൽ പ്രതികരിച്ചു. സ്വന്തം രാജ്യത്തേക്ക് തിരികെ അയക്കാൻ സാധിക്കാത്ത സാഹചര്യമുള്ളവരെ, പീഡനങ്ങൾ ഏൽക്കില്ലെന്ന നയതന്ത്ര ഉറപ്പുള്ള മൂന്നാം രാജ്യങ്ങളിലേക്കാണ് സാധാരണഗതിയിൽ മാറ്റുന്നത് എന്നാണ് ഔദ്യോഗിക വിശദീകരണം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
