കാൽഗറി: ആൽബർട്ടയിൽ കുടിയേറ്റ നയങ്ങളുമായി ബന്ധപ്പെട്ട അഞ്ച് പ്രധാന വിഷയങ്ങൾ ഉൾപ്പെടെ 10 ചോദ്യങ്ങളിൽ ഒക്ടോബർ 19-ന് റഫറണ്ടം നടക്കാൻ ഒരുങ്ങുകയാണ്. പ്രവിശ്യയിലെ സാമ്പത്തിക നില ഭദ്രമാക്കാനും പുതിയതായി എത്തുന്ന കുടിയേറ്റക്കാരുടെ എണ്ണം പ്രാദേശിക സർക്കാരിന് തന്നെ നേരിട്ട് നിയന്ത്രിക്കാനും വേണ്ടിയാണ് ഈ റഫറണ്ടം സംഘടിപ്പിക്കുന്നത്. കാനഡ ഭരണകൂടവുമായുള്ള ആൽബർട്ടയുടെ ഭാവി എങ്ങനെ വേണമെന്ന് തീരുമാനിക്കാനും ഈ വോട്ടെടുപ്പ് വഴിയൊരുക്കും.
പുതുതായി പ്രവിശ്യയിലെത്തുന്നവർക്ക് സൗജന്യ ചികിത്സയും വിദ്യാഭ്യാസവും നൽകുന്നതിന് പകരം പ്രത്യേക ഫീസ് ഏർപ്പെടുത്തണോ എന്നതാണ് പ്രധാന ചോദ്യങ്ങളിലൊന്ന്. ഒക്ടോബർ 19-ന് ജനങ്ങൾ അനുകൂലമായി വോട്ട് ചെയ്താൽ മാത്രമേ എത്ര ഫീസ് വാങ്ങണം, എന്ന് മുതൽ നടപ്പാക്കണം തുടങ്ങിയ കാര്യങ്ങളിൽ തീരുമാനമെടുക്കൂ എന്ന് ധനകാര്യമന്ത്രി ജേസൺ നിക്സണും വ്യക്തമാക്കി.
താൽക്കാലിക വിദേശ തൊഴിലാളികളുടെ ആരോഗ്യത്തിനും വിദ്യാഭ്യാസത്തിനുമായി വർഷംതോറും 100 കോടി ഡോളറോളം സർക്കാരിന് ചെലവാകുന്നുണ്ട്. എന്നാൽ ഇവരിൽ നിന്ന് നികുതിയായി 15 കോടി ഡോളർ മാത്രമാണ് തിരികെ ലഭിക്കുന്നത്. അതിനാൽ പ്രാദേശികവാസികളായ നികുതിദായകർക്ക് പൊതുസേവനങ്ങളിൽ ആദ്യ പരിഗണന നൽകാനാണ് ഈ മാറ്റങ്ങൾ കൊണ്ടുവരുന്നതെന്ന് കുടിയേറ്റ മന്ത്രി ജോസഫ് ഷോവ് വിശദീകരിച്ചു.
നിലവിൽ ആൽബർട്ടയിലുള്ള താമസക്കാരെ ഈ പുതിയ നിയമങ്ങൾ ബാധിക്കുമോ എന്നതിൽ സർക്കാരിന് വ്യക്തതയില്ലെന്ന് പ്രതിപക്ഷമായ ന്യൂ ഡെമോക്രാറ്റിക് പാർട്ടി (NDP) ആരോപിച്ചു. പുതിയ ആളുകളിൽ നിന്ന് അധിക ഫീസ് വാങ്ങുന്നത് വിവേചനമാണെന്നും സ്വന്തം ഭരണപരാജയം മറയ്ക്കാനാണ് സർക്കാർ കുടിയേറ്റക്കാരെ കുറ്റപ്പെടുത്തുന്നതെന്നും എൻഡിപി നേതാവ് നാഹീദ് നെൻഷി പറഞ്ഞു. എന്നാൽ മറ്റ് രാജ്യങ്ങളിലും താൽക്കാലിക താമസക്കാരിൽ നിന്ന് ഇത്തരം ഫീസുകൾ ഈടാക്കാറുണ്ടെന്ന് പറഞ്ഞ് പ്രീമിയർ ഡാനിയേൽ സ്മിത്ത് ഈ വാദങ്ങളെ തള്ളി.
Also Read: 250 ഔട്ട്ലെറ്റുകൾ പൂട്ടുന്നു: കാനഡ അടക്കമുള്ള വിപണികളിൽ വൻ മാറ്റവുമായി സ്റ്റാർബക്സ്
തിരഞ്ഞെടുപ്പിൽ വിജയിച്ചാൽ പ്രവിശ്യയിലെ തൊഴിൽ ആവശ്യകത മുൻനിർത്തിയാകും കുടിയേറ്റ നിയമങ്ങൾ പരിഷ്കരിക്കുക. ലഭ്യമായ തൊഴിലവസരങ്ങൾക്ക് അനുസൃതമായി കുടിയേറ്റക്കാരുടെ എണ്ണത്തിൽ വർഷം തോറും മാറ്റങ്ങൾ വരുത്തും. പുതിയ നിയമങ്ങളുടെ സമ്പൂർണ്ണ വിവരങ്ങൾ വോട്ടെടുപ്പിന് ശേഷമേ പുറത്തുവിടൂ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
