ലോകത്തെ ഏറ്റവും മികച്ച നഗരങ്ങളുടെ പട്ടികയായ 2026-ലെ ഗ്ലോബൽ സിറ്റീസ് ഇൻഡെക്സ് പുറത്തുവന്നു. സാമ്പത്തിക കരുത്തിനുപരിയായി ഭരണം, മാനവികശേഷി, പരിസ്ഥിതി, ജീവിതനിലവാരം തുടങ്ങിയ വിവിധ ഘടകങ്ങളെ അടിസ്ഥാനമാക്കിയാണ് 1,000 നഗരങ്ങളെ ഓക്സ്ഫോർഡ് ഇക്കണോമിക്സ് റാങ്ക് ചെയ്തത്. പട്ടികയിൽ ന്യൂയോർക്ക്, ലണ്ടൻ, പാരീസ് എന്നീ നഗരങ്ങൾ ആദ്യ മൂന്ന് സ്ഥാനങ്ങൾ കരസ്ഥമാക്കി.
മികച്ച നഗരങ്ങളുടെ പട്ടികയിൽ ഒന്നാം സ്ഥാനത്തുള്ള ന്യൂയോർക്കിന് പിന്നാലെ ലണ്ടൻ, പാരീസ്, സിയാറ്റിൽ, സാൻ ഫ്രാൻസിസ്കോ, ഡബ്ലിൻ, ബോസ്റ്റൺ, സാൻ ജോസ്, ടോക്യോ, സൂറിച്ച് എന്നീ നഗരങ്ങളാണ് ആദ്യ പത്തിൽ ഇടംപിടിച്ചിട്ടുള്ളത്. ജനങ്ങളുടെ വൈദഗ്ധ്യവും വിദ്യാഭ്യാസവും വൈവിധ്യവും അടയാളപ്പെടുത്തുന്ന മാനവികശേഷി വിഭാഗത്തിൽ ലണ്ടൻ ഒന്നാം സ്ഥാനത്താണ്. ഇവിടുത്തെ ജനസംഖ്യയുടെ ഏകദേശം 40 ശതമാനവും വിദേശത്തുനിന്നുള്ളവരാണ്.
പട്ടികയിൽ മൂന്നാം സ്ഥാനത്തുള്ള പാരീസ് ജീവിതനിലവാരത്തിലും സാംസ്കാരിക രംഗത്തും മികച്ചുനിൽക്കുന്നു. നഗരത്തിലെ മ്യൂസിയങ്ങളും സൗജന്യ പ്രവേശന സംവിധാനങ്ങളും സന്ദർശകരെ ആകർഷിക്കുന്നു. ബോസ്റ്റൺ, ഡബ്ലിൻ തുടങ്ങിയ നഗരങ്ങൾ മികച്ച സർവകലാശാലകളുടെയും സാങ്കേതിക വ്യവസായങ്ങളുടെയും സാന്നിധ്യം കൊണ്ട് ശ്രദ്ധേയമാണ്. വലിയ ജനസംഖ്യയുണ്ടെങ്കിലും കർശനമായ മലിനീകരണ നിയന്ത്രണ നയങ്ങളിലൂടെ ലണ്ടൻ പരിസ്ഥിതി സംരക്ഷണത്തിൽ മുന്നിലെത്തുന്നുണ്ട്.
സാങ്കേതിക മുന്നേറ്റമാണ് മറ്റൊരു പ്രധാന പ്രത്യേകത. സിലിക്കൺ വാലിയുടെ ഭാഗമായ സാൻ ജോസ് ഏറ്റവും ഉയർന്ന പ്രതിശീർഷ ജിഡിപി രേഖപ്പെടുത്തിയപ്പോൾ, സാൻ ഫ്രാൻസിസ്കോ ഡ്രൈവറില്ലാ കാറുകൾ ഉൾപ്പെടെയുള്ള നവീന യാത്രാ സംവിധാനങ്ങളിലൂടെ ശ്രദ്ധിക്കപ്പെടുന്നു. ആർട്ടിഫിഷ്യൽ ഇന്റലിജൻസ് സാങ്കേതികവിദ്യയുടെ ഉപയോഗത്തിലും ഡിജിറ്റൽ റെയിൽവേ പദ്ധതികളിലും മുന്നേറുന്ന എസ്തോണിയയുടെ തലസ്ഥാനമായ ടാലിൻ ശ്രദ്ധേയമായ വളർച്ചയാണ് കൈവരിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
