ഓട്ടവ: കാനഡയിലെ മുതിർന്ന പൗരന്മാർക്കുള്ള ഓൾഡ് ഏജ് സെക്യൂരിറ്റി (OAS) പെൻഷൻ, ഗ്യാരന്റീഡ് ഇൻകം സപ്ലിമെന്റ് (GIS) എന്നിവയുടെ അടുത്ത പേയ്മെന്റ് 2026 സെപ്റ്റംബർ 25 വെള്ളിയാഴ്ച വിതരണം ചെയ്യുമെന്ന് സർവീസ് കാനഡ അറിയിച്ചു. ജൂലൈ മുതൽ സെപ്റ്റംബർ വരെയുള്ള കാലയളവിലെ മൂന്നാമത്തെയും അവസാനത്തെയും വിതരണമാണിത്. ജൂലൈയിൽ വരുത്തിയ 1.2 ശതമാനം വർധനവിന് ശേഷമുള്ള അവസാന പേയ്മെന്റാണിത്.
നിലവിൽ 65 നും 74 നും ഇടയിൽ പ്രായമുള്ളവർക്ക് പ്രതിമാസം പരമാവധി 751.97 ഡോളറും, 75 വയസ്സിന് മുകളിലുള്ളവർക്ക് 827.17 ഡോളറുമാണ് OAS ആയി ലഭിക്കുന്നത്. വരുമാനമില്ലാത്ത മുതിർന്ന പൗരന്മാർക്ക് GIS തുക കൂടി ചേർത്ത് 65-74 പ്രായക്കാർക്ക് പ്രതിമാസം 1,875.14 ഡോളറും, 75 വയസ്സിന് മുകളിലുള്ളവർക്ക് 1,950.34 ഡോളറും വരെ ലഭിക്കും. 18 വയസ്സിന് ശേഷം കാനഡയിൽ താമസിച്ച വർഷങ്ങളുടെ അടിസ്ഥാനത്തിലാണ് തുക നിശ്ചയിക്കുന്നത്. പൂർണ ആനുകൂല്യം ലഭിക്കാൻ 40 വർഷത്തെ താമസം ആവശ്യമാണ്.
2026 ഒക്ടോബർ മുതൽ ഡിസംബർ വരെയുള്ള മൂന്ന് മാസത്തെ പെൻഷൻ നിരക്കുകളിൽ 1.4 ശതമാനത്തിന്റെ വർധനവുണ്ടാകും. ഒക്ടോബർ 28-ന് വിതരണം ചെയ്യുന്ന പേയ്മെന്റ് മുതൽ പുതിയ നിരക്ക് പ്രാബല്യത്തിൽ വരും. ഇതോടെ 65-74 പ്രായക്കാരുടെ OAS തുക ഏകദേശം 762.50 ഡോളറായും, 75 വയസ്സിന് മുകളിലുള്ളവരുടേത് 838.75 ഡോളറായും ഉയരും. അർഹരായവർക്ക് ഒഎഎസും ജിഐഎസും ചേർത്ത് യഥാക്രമം 1,901.39 ഡോളറും 1,977.64 ഡോളറും വരെ ലഭിക്കും.
കാനഡയിൽ നിയമപരമായി താമസിക്കുന്ന 65 വയസ്സ് തികഞ്ഞവർക്കാണ് ഈ പെൻഷന് അർഹതയുള്ളത്. 18 വയസ്സിന് ശേഷം കുറഞ്ഞത് 10 വർഷമെങ്കിലും കാനഡയിൽ ജീവിച്ചവർക്ക് ചെറിയൊരു തുക ലഭിക്കും. എന്നാൽ ഉയർന്ന വരുമാനമുള്ളവർക്ക് പെൻഷൻ തുകയിൽ കുറവ് വരുത്തും. കൊല്ലത്തിൽ 93,454 ഡോളറിന് മുകളിൽ വരുമാനമുള്ളവരുടെ പെൻഷൻ കുറയാൻ തുടങ്ങും. എന്നാൽ 65-74 വയസ്സുള്ളവരുടെ വരുമാനം 152,062 ഡോളറോ, 75 വയസ്സിന് മുകളിലുള്ളവരുടെ വരുമാനം 157,923 ഡോളറോ കടന്നാൽ പെൻഷൻ തുക മുഴുവനായി സർക്കാരിലേക്ക് തിരിച്ചടയ്ക്കേണ്ടി വരും.
Also Read: കാനഡ ഭരണഘടന മാറ്റിമറിക്കുമോ? ആൽബർട്ടയിലെ വോട്ടർമാർക്ക് മുന്നിൽ നിർണായക ചോദ്യം
സെപ്റ്റംബർ 25-ലെ പേയ്മെന്റോടെ മൂന്നാം മാസ വിതരണം പൂർത്തിയാകും. ഈ വർഷത്തെ ശേഷിക്കുന്ന പേയ്മെന്റുകൾ ഒക്ടോബർ 28, നവംബർ 26, ഡിസംബർ 22 എന്നീ തീയതികളിൽ അക്കൗണ്ടുകളിലേക്ക് എത്തും. വർധിപ്പിച്ച പുതിയ നിരക്കുകളിലായിരിക്കും ഒക്ടോബർ മുതലുള്ള ആനുകൂല്യങ്ങൾ വിതരണം ചെയ്യുക.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
