ടൊറന്റോ: നീണ്ട 32 കൊല്ലമായി തങ്ങളെ വേട്ടയാടിയ അപൂർവ്വ രോഗം ഒടുവിൽ ഗൂഗിൾ സെർച്ചിലൂടെ കണ്ടെത്തി കനേഡിയൻ സ്വദേശിയായ ഇയാൻ സ്റ്റെഡ്മാനും മകളും. ഡോക്ടർമാർക്ക് പോലും തിരിച്ചറിയാൻ കഴിയാതിരുന്ന രോഗം ഒരു ഗൂഗിൾ തിരച്ചിലിലൂടെ കണ്ടെത്തിയ അനുഭവമാണ്, കൃത്യമായ രോഗനിർണ്ണയത്തിന് ആർട്ടിഫിഷ്യൽ ഇന്റലിജൻസ് (എഐ) ഉപയോഗിക്കണമെന്ന പ്രചാരണത്തിലേക്ക് 43-കാരനായ ഇയാനെ നയിച്ചത്.
കാനഡയിലെ വുഡ്ബ്രിഡ്ജ് സ്വദേശിയായ ഇയാന് കുട്ടിക്കാലം മുതലേ ചർമ്മത്തിലെ തിണർപ്പ്, കണ്ണിലെ ചുവപ്പ്, തലവേദന, സന്ധിവേദന, കേൾവിക്കുറവ് തുടങ്ങിയ പ്രശ്നങ്ങളുണ്ടായിരുന്നു. ഇരുനൂറോളം തവണ ഡോക്ടർമാരെ കാണിച്ചെങ്കിലും രോഗമെന്താണെന്ന് ആർക്കും മനസ്സിലായില്ല. എന്നാൽ, തന്റെ ചെറിയ മകൾക്കും ഇതേ ലക്ഷണങ്ങൾ കണ്ടതോടെയാണ് ഇയാൻ ഇന്റർനെറ്റിൽ വിശദമായി തിരയാൻ തുടങ്ങിയത്. രോഗലക്ഷണങ്ങളുടെ ചിത്രങ്ങൾ ഒത്തുനോക്കി തങ്ങൾക്ക് ‘മക്കിൾ-വെൽസ് സിൻഡ്രോം’ (Muckle-Wells syndrome) എന്ന അപൂർവ്വ ജനിത രോഗമാണെന്ന് ഇയാൻ തനിയെ കണ്ടെത്തി. പിന്നീട് ഡോക്ടർമാർ ഇത് സ്ഥിരീകരിക്കുകയും ഇരുവരും ചികിത്സ ആരംഭിക്കുകയും ചെയ്തു.
ALSO READ ; കൊറിയർ വഴി വൻ മയക്കുമരുന്ന് വിതരണം; കാനഡയിൽ 25 കോടിയുമായി 5 പേർ പിടിയിൽ
ഈ സംഭവത്തിന് ശേഷം, രോഗികൾക്ക് പെട്ടെന്ന് ഉത്തരം കിട്ടാനായി എഐ സാങ്കേതികവിദ്യ ഉപയോഗിച്ചുള്ള പുതിയ പദ്ധതിക്ക് ഇയാൻ മുന്നിട്ടിറങ്ങി. ഇതിന്റെ ഭാഗമായി ഒട്ടാവയിലെ കുട്ടികളുടെ ആശുപത്രിയിൽ ‘തിങ്ക് റെയർ’ (ThinkRare) എന്ന എഐ സിസ്റ്റം വികസിപ്പിച്ചു. കുട്ടികളുടെ മെഡിക്കൽ റെക്കോർഡുകൾ പരിശോധിച്ച് അപൂർവ്വ രോഗ സാധ്യത മുന്നറിയിപ്പ് നൽകുന്നതാണ് ഈ സംവിധാനം. ഇതുവരെ 250 കുട്ടികളിൽ ഈ എഐ രോഗസാധ്യത കണ്ടെത്തുകയും 7 പേർക്ക് കൃത്യമായ ചികിത്സ തുടങ്ങാൻ സഹായിക്കുകയും ചെയ്തു. സാങ്കേതികവിദ്യ ദുരുപയോഗം ചെയ്യാതെ കൃത്യമായ മുൻകരുതലുകളോടെ ഉപയോഗിച്ചാൽ ആയിരക്കണക്കിന് ആളുകളുടെ ജീവൻ രക്ഷിക്കാൻ എഐക്ക് കഴിയുമെന്ന് ഇയാൻ വ്യക്തമാക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
