കാൽഗറി: രാജ്യത്ത് വിലക്കയറ്റം തുടരുന്നതിനിടയിൽ, ചെലവ് ചുരുക്കാനായി ഉപഭോക്താക്കൾ ഉപയോഗിച്ച സാധനങ്ങൾ കൂടുതലായി വാങ്ങാൻ തുടങ്ങിയതോടെ പുതിയ കച്ചവട സാധ്യത തേടി പ്രമുഖ ആഗോള ബ്രാൻഡുകൾ. ലുലുലെമൺ, കാനഡ ഗൂസ്, ഐക്കിയ തുടങ്ങിയ വൻകിട കമ്പനികളാണ് ഉപഭോക്താക്കളിൽ നിന്ന് പഴയ സാധനങ്ങൾ തിരികെ വാങ്ങി വൃത്തിയാക്കി മറ്റുള്ളവർക്ക് കുറഞ്ഞ വിലയിൽ മറിച്ച് വിൽക്കുന്ന ‘റീസെയിൽ’ പദ്ധതിയുമായി കാനഡയിൽ രംഗത്തെത്തിയിരിക്കുന്നത്. ഉപയോഗിച്ച സാധനങ്ങളുടെ വിപണിയിൽ ബ്രാൻഡിന്റെ ഗുണനിലവാരം ഉറപ്പാക്കാനും, പുതിയ ഉപഭോക്താക്കളെ ആകർഷിക്കാനും സാധിക്കുമെന്നതിനാലാണ് കമ്പനികൾ നേരിട്ട് ഈ മേഖലയിലേക്ക് ഇറങ്ങുന്നത്.
ഈ മാറ്റം ലക്ഷ്യമിട്ട് ഉപയോഗിച്ച സാധനങ്ങൾ വൃത്തിയാക്കി വിൽപനയ്ക്ക് സജ്ജമാക്കുന്ന ബിസിനസ് ശൃംഖലകളും ശക്തിപ്പെടുകയാണ്. ലുലുലെമണിന്റെ ‘ലൈക്ക് ന്യൂ’ പദ്ധതിക്കായി അമേരിക്കൻ കമ്പനിയായ ‘ടെർസസ് സൊല്യൂഷൻസ്’ കാൽഗറിയിൽ 25,000 ചതുരശ്ര അടിയുടെ കൂറ്റൻ കേന്ദ്രം ആരംഭിച്ചു. സാധാരണ വെള്ളത്തിന് പകരം സമ്മർദ്ദമുള്ള ലിക്വിഡ് കാർബൺ ഡയോക്സൈഡ് ഉപയോഗിച്ചാണ് ഇവിടുത്തെ വസ്ത്രങ്ങൾ ഉണക്കാതെ തന്നെ വൃത്തിയാക്കുന്നത്. ഒരു പ്രാവശ്യത്തെ കഴുകലിൽ ഏകദേശം 1,100 ലിറ്റർ വെള്ളം ലാഭിക്കാൻ ഈ സാങ്കേതികവിദ്യ സഹായിക്കുന്നു. ലുലുലെമണ് പുറമെ ഓൺ ഷൂസ്, ദി നോർത്ത് ഫേസ് തുടങ്ങിയ പ്രമുഖ കമ്പനികളും ഈ സംവിധാനം ഉപയോഗിക്കുന്നുണ്ട്.
വസ്ത്രങ്ങൾക്ക് പുറമെ ഫർണിച്ചർ വിപണിയിലും ഈ മാറ്റം പ്രകടമാണ്. ഐക്കിയ ഉപഭോക്താക്കളിൽ നിന്ന് പഴയ ഫർണിച്ചറുകൾ തിരികെ വാങ്ങി ഗിഫ്റ്റ് കാർഡുകൾ നൽകുകയും, അവ ‘ആസ്-ഈസ്’ വിഭാഗം വഴി കുറഞ്ഞ വിലയിൽ മറ്റുള്ളവർക്ക് വിൽക്കുകയും ചെയ്യുന്നു. സെക്കൻഡ് ഹാൻഡ് സാധനങ്ങൾ വാങ്ങുന്നത് ഇപ്പോൾ ഒരു പോരായ്മയായി കാണാതെ, സാമ്പത്തിക ലാഭമായും പരിസ്ഥിതിയെ സംരക്ഷിക്കാനുള്ള നല്ലൊരു വഴിയായുമാണ് ജനങ്ങൾ കാണുന്നത്. പ്രമുഖ ബ്രാൻഡുകൾ കൂടി ഈ രംഗത്തേക്ക് എത്തിയതോടെ സെക്കൻഡ് ഹാൻഡ് വിപണി കൂടുതൽ സജീവമായിരിക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
