കാൽഗറി: ആഗോളതലത്തിൽ മികച്ച താമസസൗകര്യങ്ങൾ ഒരുക്കുന്ന ഹോട്ടലുകൾക്കായി നൽകുന്ന പ്രശസ്തമായ ‘മിഷേലിൻ കീ’ (Michelin Key) അംഗീകാരം ആൽബർട്ടയിലുള്ള ആറ് ഹോട്ടലുകൾ വീണ്ടും സ്വന്തമാക്കി. വെള്ളിയാഴ്ച പുറത്തുവിട്ട 2026 ലെ പുതിയ പട്ടികയിലാണ് ആൽബർട്ടയിലെ ഈ പ്രമുഖ ഹോട്ടലുകൾ തങ്ങളുടെ സ്ഥാനം നിലനിർത്തിയത്. നിർമ്മാണ രീതി, ഇന്റീരിയർ ഡിസൈൻ, മികച്ച സേവന നിലവാരം, ലാഭകരമായ സേവനം, പ്രാദേശിക തനിമ എന്നിവ മുൻനിർത്തിയാണ് മിഷേലിൻ ഗൈഡ് ഈ ഹോട്ടലുകളെ തെരഞ്ഞെടുത്തത്. ലോകമെമ്പാടുമുള്ള 2,832 ഹോട്ടലുകൾക്ക് അംഗീകാരം ലഭിച്ച പട്ടികയിൽ കാനഡയിൽ നിന്നുള്ള 42 ഹോട്ടലുകളാണ് ഉൾപ്പെട്ടിരിക്കുന്നത്.
കാനഡയിൽ നിന്നുള്ള ഹോട്ടലുകളിൽ രണ്ടെണ്ണത്തിന് ‘ത്രീ കീ’, എട്ടെണ്ണത്തിന് ‘ടു കീ’, 32 എണ്ണത്തിന് ‘വൺ കീ’ പദവികളാണ് ലഭിച്ചത്. ആൽബർട്ടയിൽ നിന്നും തെരഞ്ഞെടുക്കപ്പെട്ട ആറ് ഹോട്ടലുകൾക്കും ‘വൺ കീ’ (One Key) പദവിയാണ് ലഭിച്ചിരിക്കുന്നത്. ബാൻഫിലെ ഫെയർമോണ്ട് ബാൻഫ് സ്പ്രിംഗ്സ്, കാൽഗറിയിലെ ദി ഡോറിയൻ (ഓട്ടോഗ്രാഫ് കളക്ഷൻ), എഡ്മിന്റണിലെ ഫെയർമോണ്ട് ഹോട്ടൽ മക്ഡൊണാൾഡ്, ലേക്ക് ലൂയിസിലെ ഫെയർമോണ്ട് ചാറ്റോ ലേക്ക് ലൂയിസ്, പോസ്റ്റ് ഹോട്ടൽ & സ്പാ, ബോ ലേക്കിലെ ലോഡ്ജ് എന്നിവയാണ് അംഗീകാരം നേടിയ ആൽബർട്ടയിലെ ഹോട്ടലുകൾ.
Also Read : 2,430 കോടി ഡോളറിന്റെ ആയുധക്കരാർ: സൗദിക്ക് എഫ്-35 യുദ്ധവിമാനങ്ങൾ കൈമാറാൻ അനുമതിയുമായി അമേരിക്ക
റസ്റ്റോറന്റുകൾക്ക് നൽകുന്ന ‘മിഷേലിൻ സ്റ്റാർ’ പോലെ, ലോകത്തിലെ ഏറ്റവും മികച്ച ഹോട്ടലുകളെ കണ്ടെത്തി ആദരിക്കാനാണ് 2023 മുതൽ മിഷേലിൻ ‘കീ’ (Key) പുരസ്കാരം നൽകാൻ തുടങ്ങിയത്. 2024-ലാണ് കനേഡിയൻ ഹോട്ടലുകളെ ഈ പട്ടികയിൽ ഉൾപ്പെടുത്തിത്തുടങ്ങിയത്. തുടർച്ചയായി മൂന്നാം തവണയും ഈ അംഗീകാരം നേടാൻ കഴിഞ്ഞതിൽ ഏറെ സന്തോഷമുണ്ടെന്ന് കാൽഗറിയിലെ ‘ദി ഡോറിയൻ’ ഹോട്ടൽ അധികൃതർ പറഞ്ഞു. ഹൗസ് കീപ്പിംഗ് വിഭാഗം, കുക്കിംഗ് ടീം, ഫ്രണ്ട് ഡെസ്ക് തുടങ്ങി ഹോട്ടലിലെ എല്ലാ ജീവനക്കാരുടെയും ആത്മാർത്ഥമായ അധ്വാനത്തിന് ലഭിച്ച അംഗീകാരമാണിതെന്ന് ഹോട്ടൽ മാർക്കറ്റിംഗ് ഡയറക്ടർ ജെഹാൻ ഖാൻ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
