ഓട്ടവ: ഒരേ തുക ചെലവാക്കിയിട്ടും രാജ്യത്തെ ജനങ്ങൾക്ക് മികച്ച ചികിത്സ നൽകുന്നതിൽ കാനഡയേക്കാൾ മുന്നിൽ സ്വീഡനാണെന്ന് ഫ്രേസർ ഇൻസ്റ്റിറ്റ്യൂട്ടിന്റെ പുതിയ പഠന റിപ്പോർട്ട്. രണ്ടു രാജ്യങ്ങളും തങ്ങളുടെ ആകെ വരുമാനത്തിന്റെ (ജി.ഡി.പി) 11.1 ശതമാനമാണ് ആരോഗ്യ കാര്യങ്ങൾക്കായി മാറ്റിവെക്കുന്നത്. എന്നാൽ രോഗികൾക്ക് വേഗത്തിൽ ഡോക്ടറെ കാണാനും ചികിത്സ ഉറപ്പാക്കാനും സ്വീഡന് കഴിയുന്നുണ്ട്. സൗജന്യ സർക്കാരാരോഗ്യ പദ്ധതികൾക്കൊപ്പം സ്വകാര്യ ആശുപത്രികളെയും ഇൻഷുറൻസ് കമ്പനികളെയും കൂടി പങ്കാളികളാക്കിയതാണ് സ്വീഡന്റെ ഈ നേട്ടത്തിന് കാരണം.
സ്വീഡനിൽ ഒരു ശസ്ത്രക്രിയയ്ക്ക് കാനഡയേക്കാൾ വളരെ കുറഞ്ഞ ദിവസങ്ങൾ മാത്രം കാത്തിരുന്നാൽ മതിയാകും. ഉദാഹരണത്തിന്, ഇടുപ്പ് മാറ്റിവെക്കൽ ശസ്ത്രക്രിയയ്ക്ക് സ്വീഡനിൽ 80 ദിവസം കാത്തിരിക്കുമ്പോൾ കാനഡയിൽ 125 ദിവസം വരെ എടുക്കുന്നുണ്ട്. 1,000 ആളുകൾക്ക് സ്വീഡനിൽ നാലിലധികം ഡോക്ടർമാരുടെ സേവനം കിട്ടുമ്പോൾ കാനഡയിൽ ഇത് മൂന്നിൽ താഴെ മാത്രമാണ്. സ്വീഡനിൽ സർക്കാർ പണം നൽകുന്ന വലിയൊരു ശതമാനം ചികിത്സകളും നടത്തുന്നത് മികച്ച സ്വകാര്യ ആശുപത്രികൾ വഴിയാണ്.
Also Read : ഇന്ധനവില കുതിക്കുന്നു; സർവീസുകൾ വെട്ടിക്കുറച്ച് വിമാനക്കമ്പനികൾ
നിലവിലെ നിയമങ്ങൾ കാരണം കാനഡയിൽ സർക്കാരിന്റെ സൗജന്യ ചികിത്സയുള്ള കാര്യങ്ങൾക്ക് സ്വകാര്യ ഇൻഷുറൻസ് എടുക്കാൻ കഴിയില്ല. എന്നാൽ സ്വീഡനിലെ പോലെ സ്വകാര്യ ഇൻഷുറൻസുകൾക്കും ആശുപത്രികൾക്കും കൂടുതൽ അവസരം നൽകിയാൽ ചികിത്സാ രംഗം മെച്ചപ്പെടുമെന്നാണ് റിപ്പോർട്ട് പറയുന്നത്. ഇത് ഇൻഷുറൻസ് കമ്പനികൾക്ക് വലിയ അവസരങ്ങൾ നൽകുമെങ്കിലും, നിലവിൽ ഇത്തരമൊരു മാറ്റത്തിന് കാനഡ സർക്കാർ തീരുമാനമെടുത്തിട്ടില്ല.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
