ടെഹ്റാൻ : ഇറാനും ഗള്ഫ് രാജ്യങ്ങളും തമ്മില് സലാലയില് നടക്കാനിരുന്ന നിര്ണ്ണായക ചര്ച്ചകള് മാറ്റിവെച്ചതായി ഒമാന് വിദേശകാര്യ മന്ത്രാലയം ഔദ്യോഗികമായി സ്ഥിരീകരിച്ചു. ഹോര്മൂസ് കടലിടുക്കുമായി ബന്ധപ്പെട്ട സുപ്രധാന വിഷയങ്ങള് ചര്ച്ച ചെയ്യാന് നിശ്ചയിച്ചിരുന്ന യോഗമാണ് പരസ്പര ധാരണയുടെ പുറത്ത് തല്ക്കാലത്തേക്ക് മാറ്റിവെച്ചിരിക്കുന്നത്. മേഖലയിലെ ചില രാജ്യങ്ങളുടെ പ്രത്യേക ആവശ്യപ്രകാരമാണ് ഈ തീരുമാനമെടുത്തതെന്നും ഒമാന് വിദേശകാര്യ മന്ത്രി ബാദര് അല്ബുസൈയ്ദി എക്സ് പോസ്റ്റിലൂടെ വ്യക്തമാക്കിയിട്ടുണ്ട്.
ചര്ച്ചകളില് പങ്കെടുക്കുന്ന കാര്യത്തില് ജിസിസി രാജ്യങ്ങള്ക്കിടയില് വ്യക്തതയില്ലാതിരുന്നതും യോഗം മാറ്റിവെക്കുന്നതിന് കാരണമായി. തിങ്കളാഴ്ച നടക്കുന്ന ചര്ച്ചയില് ഏതൊക്കെ രാജ്യങ്ങള് പങ്കെടുക്കുമെന്ന് ആദ്യം വ്യക്തമാക്കിയിരുന്നില്ല. ഇതിനിടയില് ബഹ്റൈന് തങ്ങള് ചര്ച്ചയില് പങ്കെടുക്കില്ലെന്ന് ഔദ്യോഗികമായി വ്യക്തമാക്കുകയും ചെയ്തിരുന്നു. അഭിപ്രായവ്യത്യാസങ്ങളും തടസ്സങ്ങളും പൂർണ്ണമായി പരിഹരിച്ച് കൃത്യമായ പരിഹാരത്തിലെത്താനുള്ള അനുകൂല സാഹചര്യം ഉറപ്പാക്കാനാണ് തീയതി നീട്ടിവെച്ചതെന്ന് ഒമാന് വാര്ത്താ ഏജന്സി റിപ്പോര്ട്ട് ചെയ്യുന്നു.
ഈ വര്ഷം ഫെബ്രുവരി മുതല് ഹോര്മൂസ് കടലിടുക്കില് ഇറാന്റെയും അമേരിക്കയുടെയും നേതൃത്വത്തിലുള്ള ഉപരോധ നടപടികൾ തുടരുകയാണ്. ജൂണില് ഇരു രാജ്യങ്ങളും തമ്മില് ഒരു കരാറിലെത്താന് ശ്രമം നടന്നുവെങ്കിലും ഹോര്മൂസ് കടലിടുക്കിന്റെ നിയന്ത്രണവുമായി ബന്ധപ്പെട്ട അഭിപ്രായവ്യത്യാസങ്ങളെ തുടര്ന്ന് ആ നീക്കം പരാജയപ്പെടുകയായിരുന്നു. ഇതിനിടയില് യെമനിലെ ഹൂതി വിമതര് ബാബ് അല് മാന്ദാബ് കടലിടുക്കിലെ പിടിമുറുക്കിയത് അന്താരാഷ്ട്ര തലത്തില് ഇറാന്റെ സ്വാധീനം വര്ദ്ധിപ്പിച്ചിട്ടുണ്ട്.
പ്രധാനപ്പെട്ട രണ്ട് ജലപാതകളുടെ മേല് തങ്ങള്ക്കുള്ള സ്വാധീനം പ്രയോജനപ്പെടുത്താനാണ് ഇറാന്റെ നീക്കം. എന്നാല് ഹോര്മൂസ് കടലിടുക്കിലെ നിലവിലുള്ള ഉപരോധം കാരണം അന്താരാഷ്ട്ര വിപണിയില് എണ്ണവില കുതിച്ചുയരുന്ന സാഹചര്യമാണ് ഇപ്പോഴുള്ളത്. പ്രാദേശികമായ സഹകരണവും സമാധാനവും നിലനിര്ത്താനുള്ള എല്ലാ ശ്രമങ്ങള്ക്കും എക്കാലത്തും പിന്തുണ നല്കുമെന്ന് ഒമാന് ആവര്ത്തിച്ചു വ്യക്തമാക്കിയിട്ടുണ്ടെങ്കിലും, പശ്ചിമേഷ്യയിലെ നിലവിലെ സംഘര്ഷാവസ്ഥയ്ക്ക് പെട്ടെന്നൊരു പരിഹാരം കാണാനാകാത്ത വിധം കാര്യങ്ങള് സങ്കീര്ണ്ണമായി തുടരുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
