എഡ്മിന്റൻ: ഡ്രൈവിങ് ലൈസൻസും തിരിച്ചറിയൽ കാർഡുകളും പുതുക്കുന്നതിൽ ജനങ്ങൾക്ക് നേരിട്ട ബുദ്ധിമുട്ടുകൾ പരിഹരിക്കുന്നതിനായി സമർപ്പിക്കേണ്ട രേഖകളുടെ പട്ടിക വിപുലീകരിച്ച് ആൽബർട്ട സർക്കാർ. കാനഡയിൽ നിയമപരമായി താമസിക്കാൻ അർഹതയുണ്ടെന്ന് തെളിയിക്കുന്ന രേഖകൾ, കാലാവധി കഴിഞ്ഞ് ഒരു വർഷത്തിൽ താഴെയുള്ള പാസ്പോർട്ടുകൾ, എല്ലാ തരത്തിലുള്ള പൗരത്വ സർട്ടിഫിക്കറ്റുകൾ എന്നിവ ഇനിമുതൽ ഐഡി പുതുക്കലിനായി സ്വീകരിക്കും. ജൂലൈ മാസത്തിൽ ആരംഭിച്ച പുതിയ ഐഡി കാർഡ് വിതരണത്തെ തുടർന്ന് നിരവധി അപേക്ഷകർക്ക് നേരിടേണ്ടിവന്ന സാങ്കേതിക തടസ്സങ്ങളും കാലതാമസവും കണക്കിലെടുത്താണ് സർക്കാർ നടപടികൾ ലളിതമാക്കിയത്.
കഴിഞ്ഞ ജൂലൈ മുതൽ പൗരത്വ വിവരവും ആരോഗ്യപരിചരണ കാർഡ് നമ്പറും ഉൾപ്പെടുത്തിയുള്ള പുതിയ ഡ്രൈവിങ് ലൈസൻസുകളാണ് പ്രവിശ്യയിൽ നൽകിവരുന്നത്. എന്നാൽ, പഴയ ലൈസൻസുകൾ പുതുക്കുന്നതിന് പൗരത്വം തെളിയിക്കുന്ന കൂടുതൽ രേഖകൾ നിർബന്ധമാക്കിയത് പൊതുജനങ്ങൾക്ക് വലിയ ബുദ്ധിമുട്ട് സൃഷ്ടിച്ചു. വിദേശത്ത് ജനിച്ചവർക്കും വിവാഹശേഷം പേരുമാറിയ സ്ത്രീകൾക്കും രേഖകൾ നൽകുന്നതിൽ കാലതാമസം നേരിട്ടതായി പരാതികൾ ഉയർന്ന പശ്ചാത്തലത്തിലാണ് സർവീസ് ആൽബർട്ടയും റെഡ് ടേപ്പ് റിഡക്ഷൻ മന്ത്രിയുമായ ഡെയിൽ നാളി നയം വ്യക്തമാക്കിയത്. ജനങ്ങളുടെ പ്രതികരണങ്ങൾ കണക്കിലെടുത്താണ് സർക്കാരിന്റെ മാനദണ്ഡങ്ങളിൽ മാറ്റം വരുത്തിയതെന്നും, താൽക്കാലിക ലൈസൻസുകൾ നൽകി പ്രതിസന്ധി പരിഹരിക്കാൻ ശ്രമിച്ചിട്ടുണ്ടെന്നും അദ്ദേഹം വ്യക്തമാക്കി.
Also Read: വിന്നിപെഗിൽ ഈ വാരാന്ത്യത്തിൽ തണുപ്പ് കൂടും; താപനില 15 ഡിഗ്രിയിലേക്ക് താഴാൻ സാധ്യത
പുതിയ പരിഷ്കരണത്തിലൂടെ പേപ്പർ കാർഡുകൾക്ക് പകരം ഫോട്ടോയും കാലാവധി തീയതിയുമുള്ള കൂടുതൽ സുരക്ഷിതമായ ഐഡി കാർഡുകളാണ് പൊതുജനങ്ങൾക്ക് ലഭ്യമാകുന്നത്. ഹെൽത്ത് കെയർ നമ്പറും പൗരത്വ വിവരങ്ങളും ഒരേ കാർഡിൽ ഉൾപ്പെടുത്തുന്നത് വഴി സ്വകാര്യതാ ലംഘനം ഉണ്ടാകില്ലെന്ന് അധികൃതർ വ്യക്തമാക്കി. ബ്രിട്ടീഷ് കൊളംബിയ ഉൾപ്പെടെയുള്ള മറ്റ് പ്രവിശ്യകളിലും സമാനമായ സംവിധാനം നിലവിലുണ്ടെന്നും, നിലവിലുള്ള രേഖകളിലെ സുരക്ഷാ പോരായ്മകൾ പരിഹരിക്കാൻ പുതിയ ഒന്നിപ്പിച്ച കാർഡുകളിലൂടെ സാധിക്കുമെന്നും സർക്കാർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
