വിന്നിപെഗ്: മാനിറ്റോബയിൽ മേഘം മൂടിയ അന്തരീക്ഷവും വടക്കൻ മേഖലകളിൽ ശക്തമായ മഴയും തുടരുന്നതായി കാലാവസ്ഥാ നിരീക്ഷണ കേന്ദ്രം അറിയിച്ചു. സെപ്റ്റംബർ 11 വെള്ളിയാഴ്ച പുറത്തുവിട്ട ഏറ്റവും പുതിയ റിപ്പോർട്ടിലാണ് ഇത് വ്യക്തമാക്കുന്നത്. തുടർച്ചയായി മഴ ലഭിക്കുന്നതിനാൽ വടക്കൻ മാനിറ്റോബയിലെ പാർക്കുകൾ, വനപ്രദേശങ്ങൾ, മുൻപ് കാട്ടുതീ ബാധിച്ച സ്ഥലങ്ങൾ എന്നിവിടങ്ങളിൽ മണ്ണൊലിപ്പ് ഭീഷണി നിലനിൽക്കുന്നുണ്ട്.
വെള്ളിയാഴ്ച ദക്ഷിണ മാനിറ്റോബയിൽ പൊതുവെ മങ്ങിയ അന്തരീക്ഷമാണ്. വിന്നിപെഗ് ഉൾപ്പെടെയുള്ള തെക്കുകിഴക്കൻ പ്രദേശങ്ങളിൽ വെള്ളിയാഴ്ച വൈകുന്നേരം വരെ ഇടയ്ക്കിടെ മഴയ്ക്ക് സാധ്യതയുണ്ട്. കഴിഞ്ഞ ദിവസങ്ങളിലെ ചൂടുമായി താരതമ്യം ചെയ്യുമ്പോൾ വെള്ളിയാഴ്ച താപനില 20 ഡിഗ്രി സെൽഷ്യസിന് മുകളിലായിരിക്കും. എന്നാൽ വടക്കുപടിഞ്ഞാറൻ ദിശയിൽ നിന്ന് ശക്തമായ കാറ്റ് വീശുന്നതിനാൽ തണുപ്പ് കൂടുതൽ അനുഭവപ്പെടാം. അയൽ പ്രദേശമായ വടക്കുപടിഞ്ഞാറൻ ഒന്റാറിയോയിലും സമാന കാലാവസ്ഥയായിരിക്കും. അവിടെ താപനില 20 ഡിഗ്രിക്ക് മുകളിലേക്ക് ഉയർന്നേക്കും.
ന്യൂനമർദ്ദത്തിന്റെ ഫലമായി വടക്കൻ മാനിറ്റോബയിൽ തുടർച്ചയായ രണ്ടാം ദിവസവും മഴ പെയ്യുകയാണ്. ചർച്ചിൽ, യോർക്ക് മേഖലകളിൽ എൻവയോൺമെന്റ് ആൻഡ് ക്ലൈമറ്റ് ചേഞ്ച് കാനഡ മഴ മുന്നറിയിപ്പ് നൽകിയിട്ടുണ്ട്. ഇവിടെ 25 മുതൽ 40 മില്ലിമീറ്റർ വരെ മഴ ലഭിക്കാൻ സാധ്യതയുണ്ട്. മഴ ശക്തമാകുന്നതോടെ ചരിവുകളുള്ള പ്രദേശങ്ങളിലും വനമേഖലകളിലും നാശനഷ്ടങ്ങൾ സംഭവിക്കാൻ സാധ്യതയുള്ളതിനാൽ അധികൃതർ ജാഗ്രതാ നിർദേശം നൽകി.
Also Read : സ്കൂൾ സോണുകളിൽ വേഗത കൂട്ടിയാൽ പണി ഉറപ്പ്; ആദ്യദിനം പിടിവീണത് നിരവധിയാളുകൾക്ക്
വിന്നിപെഗിൽ ശനിയാഴ്ച തണുപ്പുള്ള അന്തരീക്ഷമായിരിക്കും. പ്രിൻസസ് ഓട്ടോ സ്റ്റേഡിയത്തിൽ നടക്കുന്ന ബാഞ്ചോ ബൗൾ മത്സരം കാണാൻ എത്തുന്നവരും മറ്റ് ഔട്ട്ഡോർ പരിപാടികളിൽ പങ്കെടുക്കുന്നവരും കട്ടിയുള്ള വസ്ത്രങ്ങൾ കരുതണമെന്ന് നിർദേശമുണ്ട്. ശനിയാഴ്ച താപനില 15 ഡിഗ്രി സെൽഷ്യസിലേക്ക് കുറയുമെങ്കിലും ഞായറാഴ്ചയോടെ 17 മുതൽ 19 ഡിഗ്രി വരെ ഉയർന്ന് സാധാരണ നിലയിലാകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
Temperatures to drop in Winnipeg this weekend; likely to fall to 15 degrees.
