വാഷിങ്ടൺ : നവംബറിൽ നടക്കാനിരിക്കുന്ന യുഎസ് ഇടക്കാല തെരഞ്ഞെടുപ്പിന് പിന്നാലെ ഇറാനുമായുള്ള യുദ്ധം അവസാനിക്കുമെന്ന് അമേരിക്കൻ പ്രസിഡന്റ് ഡോണൾഡ് ട്രംപ് വ്യക്തമാക്കി. റിപ്പബ്ലിക്കൻ നാഷണൽ കൺവെൻഷനിൽ പങ്കെടുക്കാൻ ഡാലസിലേക്ക് പുറപ്പെടുന്നതിന് മുൻപ് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. തെരഞ്ഞെടുപ്പിനെ സ്വാധീനിക്കാൻ ഇറാൻ ശ്രമിക്കുന്നുണ്ടെങ്കിലും, അമേരിക്കയുടെ കടുത്ത സാമ്പത്തിക ഉപരോധത്തിന് മുന്നിൽ അവർക്ക് അധികനാൾ പിടിച്ചുനിൽക്കാനാകില്ലെന്നും ട്രംപ് ആത്മവിശ്വാസം പ്രകടിപ്പിച്ചു.
ഇടക്കാല തെരഞ്ഞെടുപ്പ് കഴിയുന്നതോടെ എണ്ണവില ഗണ്യമായി കുറയുമെന്ന് ട്രംപ് അവകാശപ്പെട്ടു. ഇറാൻ – യുഎസ് സംഘർഷം ഏഴാം മാസത്തിലേക്ക് കടക്കുന്നതിനിടയിലാണ് അദ്ദേഹത്തിന്റെ ഈ പ്രതികരണം. ഇരുരാജ്യങ്ങളും തമ്മിൽ നയതന്ത്ര ചർച്ചകൾക്ക് സാധ്യതയുണ്ടെങ്കിലും, നിലവിൽ അതിനല്ല യുഎസ് മുൻഗണന നൽകുന്നതെന്നും അദ്ദേഹം വ്യക്തമാക്കിയിട്ടുണ്ട്.
പശ്ചിമേഷ്യയിലെ സംഘർഷാവസ്ഥ വീണ്ടും രൂക്ഷമായതിനെ തുടർന്ന് അന്താരാഷ്ട്ര വിപണിയിൽ എണ്ണവില വീണ്ടും ഉയർന്നിരിക്കുകയാണ്. ജൂലൈ മാസത്തിന് ശേഷം ആദ്യമായാണ് എണ്ണവില ബാരലിന് 100 ഡോളർ കടക്കുന്നത്. കഴിഞ്ഞ ദിവസം ഇറാന്റെ അഞ്ച് എണ്ണക്കപ്പലുകൾ അമേരിക്ക തകർത്തിരുന്നു. ഇതിന് മറുപടിയായി ഹോർമൂസ് കടലിടുപ്പിൽ പത്ത് കപ്പലുകൾ ആക്രമിച്ചതായി ഇറാനും സ്ഥിരീകരിച്ചിട്ടുണ്ട്.
ഇറാനിലെ ഹോർമോസ്ഗൻ പ്രവിശ്യയിലെ ഖ്വേഷം ദ്വീപിലും സമീപപ്രദേശങ്ങളായ സിറിഖ്, മിനാബ് എന്നിവിടങ്ങളിലും ശക്തമായ സ്ഫോടനങ്ങൾ നടന്നതായി ഇറാന്റെ ഔദ്യോഗിക മാധ്യമങ്ങൾ റിപ്പോർട്ട് ചെയ്യുന്നു. ഇറാന്റെ ആണവ അടിസ്ഥാന സൗകര്യങ്ങൾ തകർക്കാൻ ലക്ഷ്യമിട്ട് അമേരിക്ക കൂടുതൽ ആക്രമണങ്ങൾ നടത്തുമെന്ന യുഎസ് ഊർജ്ജ സെക്രട്ടറി ക്രിസ് റൈറ്റിന്റെ പ്രസ്താവനയ്ക്ക് പിന്നാലെയാണ് പുതിയ സംഭവവികാസങ്ങൾ ഉണ്ടായിരിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
